ነህምያ 3

3 ¹ሊቀ ካህናቱ ኤልያሲብና ባልንጀሮቹ ካህናት ተነሥተው የበጎችን በር ሠሩ። ቀደሱትም፤ መዝጊያዎቹንም አቆሙ፤ እስከ መቶው ግንብ፣ እስከ ሐናንኤል ግንብ ድረስ ቀደሱት። ²በአጠገባቸውም የኢያሪኮ ሰዎች ሠሩ፤ በአጠገባቸውም የአምሪ ልጅ ዛኩር ሠራ።

³የሃሰናአ ልጆች የዓሣ በርን እንደ ገና ሠሩ፤ ግንዶቹን ጣሉ፤ መዝጊያዎቹን፣ መወርወሪያዎቹንና መቀርቀሪያዎቹን አቆሙ። ⁴በአጠገባቸውም የኮስ የልጅ ልጅ፣ የኦርዮ ልጅ ሜሬሞት ጠገነ። በአጠገባቸውም የመሼዛቤል የልጅ ልጅ፣ የበራክያ ልጅ መሱላም ጠገነ። በአጠገባቸውም የባዓና ልጅ ሳዶቅ ጠገነ። ⁵በአጠገባቸውም ተቆዓውያን ጠገኑ፤ መኳንንቶቻቸው ግን ለጌቶቻቸው ሥራ ጫንቃቸውን አላስገዙም።

⁶የፋሴሕ ልጅ ዮዳሄና የበሶድያ ልጅ መሱላም አሮጌውን በር ጠገኑ፤ ግንዶቹን ጣሉ፤ መዝጊያዎቹን፣ መወርወሪያዎቹንና መቀርቀሪያዎቹን አቆሙ። ⁷በአጠገባቸውም ገባዖናዊው መላጥያና ሜሮኖታዊው ያዶን፣ የገባዖንና የሚጽጳ ሰዎች፣ ከወንዝ ማዶ ያለውን አገር የሚገዛው ገዥ ወንበር የሚገኝበትን ክፍል ጠገኑ። ^a a v7 “ከወንዝ ማዶ ያለው አገር” ይሁዳን ጨምሮ ከኤፍራጥስ ወንዝ በስተ ምዕራብ ያሉትን አገሮች ሁሉ ያጠቃለለ የፋርስ የአስተዳደር ክልል ነበር። ⁸በአጠገቡም ከወርቅ አንጥረኞች አንዱ የሆነው የሃርሃያ ልጅ ዩዚኤል ጠገነ። በአጠገቡም ሽቶ ቀማሚው ሐናንያ ጠገነ። ኢየሩሳሌምንም እስከ ሰፊው ቅጥር ድረስ መለሱ። ⁹በአጠገባቸውም የኢየሩሳሌም አውራጃ እኩሌታ ገዥ የሆነው የሁር ልጅ ሬፋያ ጠገነ። ¹⁰በአጠገባቸውም የሃሩማፍ ልጅ ይዳያ ከቤቱ ትይዩ ጠገነ፤ በአጠገቡም የሃሻብንያ ልጅ ሃጡስ ጠገነ። ¹¹የሃሪም ልጅ መልክያና የጳሃት ሞዓብ ልጅ ሃሱብ ሌላውን ክፍልና የእቶኖችን ግንብ ጠገኑ። ¹²በአጠገቡም የኢየሩሳሌም አውራጃ እኩሌታ ገዥ የሆነው የሃሎሔስ ልጅ ሻሉም እርሱና ሴቶች ልጆቹ ጠገኑ።

¹³ሃኑንና የዛኖሐ ሰዎች የሸለቆውን በር ጠገኑ፤ እንደ ገና ሠርተው መዝጊያዎቹን፣ መወርወሪያዎቹንና መቀርቀሪያዎቹን አቆሙ፤ እስከ ጕድፍ በር ድረስም 1,500 ጫማ ያህል ቅጥር ጠገኑ።

¹⁴የቤትከሬም አውራጃ ገዥ የሆነው የራካብ ልጅ መልክያ የጕድፍን በር ጠገነ፤ እንደ ገና ሠርቶም መዝጊያዎቹን፣ መወርወሪያዎቹንና መቀርቀሪያዎቹን አቆመ።

¹⁵የሚጽጳ አውራጃ ገዥ የሆነው የኮልሖዜ ልጅ ሻሉን የምንጭን በር ጠገነ፤ እንደ ገና ሠርቶ ጣሪያ ሠራለት፤ መዝጊያዎቹን፣ መወርወሪያዎቹንና መቀርቀሪያዎቹን አቆመ። ደግሞም በንጉሡ የአትክልት ስፍራ አጠገብ ያለውን የሰሊሆምን ኵሬ ቅጥር ከዳዊት ከተማ እስከሚወርደው ደረጃ ድረስ ጠገነ። ¹⁶ከእርሱም በኋላ የቤትጹር አውራጃ እኩሌታ ገዥ የሆነው የዐዝቡቅ ልጅ ነህምያ ከዳዊት መቃብሮች ትይዩ፣ እስከ ሠራሽ ኵሬውና እስከ ኀያላን ቤት ድረስ ጠገነ። ¹⁷ከእርሱም በኋላ ሌዋውያን ጠገኑ፤ የባኒ ልጅ ረሁም ጠገነ። በአጠገቡም የቅዒላ አውራጃ እኩሌታ ገዥ የሆነው ሐሻብያ ስለ አውራጃው ጠገነ። ¹⁸ከእርሱም በኋላ ባልንጀሮቻቸው ሌዋውያን ጠገኑ፤ የቅዒላ አውራጃ እኩሌታ ገዥ የሆነው የሔናዳድ ልጅ ቢኑዪ ጠገነ። ¹⁹በአጠገቡም የሚጽጳ ገዥ የሆነው የኢያሱ ልጅ ዔዘር በማዕዘኑ ካለው የጦር ዕቃ ቤት ዕርገት ትይዩ ሁለተኛውን ክፍል ጠገነ። ²⁰ከእርሱም በኋላ የዛባይ ልጅ ባሮክ ከማዕዘኑ ጀምሮ እስከ ሊቀ ካህናቱ ኤልያሲብ ቤት መግቢያ ድረስ ሌላውን ክፍል በትጋት ጠገነ። ²¹ከእርሱም በኋላ የኮስ የልጅ ልጅ፣ የኦርዮ ልጅ ሜሬሞት ከመግቢያው ጀምሮ እስከ ኤልያሲብ ቤት መጨረሻ ድረስ ሌላውን ክፍል ጠገነ። ²²ከእርሱም በኋላ በዙሪያው ካለው ሜዳ የመጡ ካህናት ጠገኑ። ²³ቀጥሎም ብንያምና ሃሱብ ከቤታቸው ትይዩ ጠገኑ። ቀጥሎም የዐናንያ የልጅ ልጅ፣ የመዓሤያ ልጅ ዐዛርያ ከገዛ ቤቱ አጠገብ ጠገነ። ²⁴ከእርሱም በኋላ የሔናዳድ ልጅ ቢኑዪ ከዐዛርያ ቤት ጀምሮ እስከ ማዕዘኑና እስከ ጥጉ ድረስ ሌላውን ክፍል ጠገነ። ²⁵የኡዛይ ልጅ ፓላል ከማዕዘኑና ከንጉሡ የላይኛ ቤተ መንግሥት ከወጣው ግንብ ትይዩ፣ በዘበኞች አደባባይ አጠገብ ጠገነ። ከእርሱም በኋላ የፋሮስ ልጅ ፈዳያ ጠገነ። ²⁶በዖፌል የሚኖሩ የቤተ መቅደስ አገልጋዮች በስተ ምሥራቅ ካለው የውሃ በር ትይዩና ከወጣው ግንብ ድረስ ጠገኑ። ²⁷ከእነርሱም በኋላ ተቆዓውያን ከወጣው ታላቅ ግንብ ትይዩ ጀምሮ እስከ ዖፌል ቅጥር ድረስ ሁለተኛውን ክፍል ጠገኑ።

²⁸ከፈረስ በር በላይ ካህናት እያንዳንዳቸው ከየራሳቸው ቤት ትይዩ ጠገኑ። ²⁹ከእርሱም በኋላ የኢሜር ልጅ ሳዶቅ ከቤቱ ትይዩ ጠገነ። ከእርሱም በኋላ የምሥራቅ በር ጠባቂ የሆነው የሰኬንያ ልጅ ሸማያ ጠገነ። ³⁰ከእርሱም በኋላ የሼሌምያ ልጅ ሐናንያና የጻላፍ ስድስተኛ ልጅ ሃኑን ሌላውን ክፍል ጠገኑ። ከእነርሱም በኋላ የበራክያ ልጅ መሱላም ከመኖሪያ ክፍሉ ትይዩ ጠገነ። ³¹ከእርሱም በኋላ ከወርቅ አንጥረኞች አንዱ የሆነው መልክያ ከፍተሻ በር ትይዩ እስከ ቤተ መቅደስ አገልጋዮችና ነጋዴዎች ቤት ድረስ፣ እስከ ጥጉም ላይኛ ክፍል ድረስ ጠገነ። ³²በጥጉ ላይኛ ክፍልና በበጎች በር መካከል ያለውን የወርቅ አንጥረኞችና ነጋዴዎች ጠገኑ።