Poribar khan mili kene deal tu aru bonaise
Dorja pichete dorja, bhag pichete bhag, sob sheher pora hathiyar uthai lai: purohit khan, sona laga kaam kora manuh khan, ekjon gondho-tel bonai thaka manuh, elaka laga shasok khan, Jericho aru Tekoa pora aha manuh khan, aru Shallum tai laga suwali khan logot kaam kore. Khali Tekoa laga bara manuh khan he eneka kaam koribole jhuki nidi.
3 1Moha purohit Eliashib aru tar sathi purohit khan uthi kene Mer Duar tu bonaise. Taikhan etu ke samarpan kori kene tar dorja khan lagaise; Eksoh laga Burj aru Hananel laga Burj tak taikhan etu samarpan korise. 2Tarkhan laga usorte Jericho sheher laga manuh khan bonaise, aru tarkhan laga usorte Imri laga chokra Zaccur bonaise.
3Hassenaah laga chokra khan Maas Duar tu aru bonaise, tar kaath khan lagaise, aru tar dorja khan, sikol khan, aru gari khan lagaise. 4Tarkhan laga usorte, Hakkoz laga chokra Uriah laga chokra Meremoth pora thik korise. Tarkhan laga usorte, Meshezabel laga chokra Berechiah laga chokra Meshullam pora thik korise. Tarkhan laga usorte, Baana laga chokra Zadok pora thik korise. 5Tarkhan laga usorte Tekoa laga manuh khan thik korise, kintu tarkhan laga dangor manuh khan pora tarkhan laga malik laga kaam te gola narakhise.
6Paseah laga chokra Joiada aru Besodeiah laga chokra Meshullam pora Purana Duar tu thik korise: tar kaath khan lagaise, tar dorja khan, sikol khan, aru gari khan lagaise. 7Tarkhan laga usorte, Gibeon laga Melatiah aru Meronoth laga Jadon—Gibeon aru Mizpah laga manuh khan—pora Nodi Paar laga desh laga shasok laga boha jagah logote thaka bhag tu thik korise. a a v7 Nodi Paar laga desh tu Persia pora cholua ekta jagah thakise, jun te Euphrates Nodi laga paschim phale thaka sob desh thakise, Judah bhi etu bhitorte thakise. 8Tar usorte, shuna bona ekjon Harhaiah laga chokra Uzziel pora thik korise. Tar usorte, sugandh bona ekjon Hananiah pora thik korise. Taikhan Chaura Deal tak Jerusalem ke aru thik korise. 9Tarkhan usorte Jerusalem laga adha jila laga cholawta, Hur laga chokra Rephaiah pora thik korise. 10Tarkhan usorte Harumaph laga chokra Jedaiah pora tar ghor laga samne te thik korise; tar usorte, Hashabneiah laga chokra Hattush pora thik korise. 11Harim laga chokra Malkijah aru Pahath-moab laga chokra Hasshub pora aru ekta bhag aru Chulha laga Burj thik korise. 12Tar usorte Jerusalem laga adha jila laga cholawta, Hallohesh laga chokra Shallum pora thik korise—tai aru tar chukri khan.
13Hanun aru Zanoah laga manuh khan pora Upotyoka Duar tu thik korise, etu ke aru bonaise, tar dorja khan, sikol khan, aru gari khan lagaise, aru Gobor Duar tak lagi deal laga 1,500 feet nisena thik korise.
14Beth-haccherem jila laga cholawta, Rechab laga chokra Malkijah pora Gobor Duar tu thik korise—etu ke aru bonai kene tar dorja khan, sikol khan, aru gari khan lagaise.
15Mizpah jila laga cholawta, Col-hozeh laga chokra Shallun pora Jhorna Duar tu thik korise—etu ke aru bonai, chath lagai, aru tar dorja khan, sikol khan, aru gari khan lagaise. Aru tai Raja laga Bagan usorte thaka Siloam laga Pukhuri laga deal, David laga Sheher pora nichete jua siri tak, thik korise. 16Tar pichete Beth-zur laga adha jila laga cholawta, Azbuk laga chokra Nehemiah pora David laga kobor khan laga samne, bona pukhuri, aru Sipahi khan laga Ghor tak thik korise. 17Tar pichete Levi manuh khan pora thik korise: Bani laga chokra Rehum. Tar usorte, Keilah laga adha jila laga cholawta Hashabiah pora tar jila nimite thik korise. 18Tar pichete tarkhan laga sathi Levi manuh khan pora thik korise: Keilah laga adha jila laga cholawta, Henadad laga chokra Binnui. 19Tar usorte, Mizpah laga cholawta, Jeshua laga chokra Ezer pora Kona te hathiyar rakha ghor te uthi jua rasta laga samne dusra bhag thik korise. 20Tar pichete Zabbai laga chokra Baruch pora mon di kene aru ekta bhag, Kona pora moha purohit Eliashib laga ghor laga ghusa jagah tak, thik korise. 21Tar pichete Hakkoz laga chokra Uriah laga chokra Meremoth pora aru ekta bhag, ghusa jagah pora Eliashib laga ghor laga shes tak, thik korise. 22Tar pichete usor pakhe laga samtol jagah pora aha purohit khan pora thik korise. 23Tar pichete, Benjamin aru Hasshub pora tarkhan laga ghor laga samne te thik korise. Tar pichete, Ananiah laga chokra Maaseiah laga chokra Azariah pora nijor ghor laga usorte thik korise. 24Tar pichete Henadad laga chokra Binnui pora aru ekta bhag, Azariah laga ghor pora Kona aru kinar tak, thik korise. 25Uzai laga chokra Palal pora Kona aru raja laga upor raj mahal pora bahar ulai thaka burj laga samne, pohora manuh laga anga usorte, thik korise. Tar pichete, Parosh laga chokra Pedaiah. 26Ophel te thaka mondir laga noukar khan pora purab phale Pani Duar laga samne tak, aru bahar ulai thaka burj tak, thik korise. 27Tarkhan pichete Tekoa laga manuh khan pora dusra bhag, dangor bahar ulai thaka burj laga samne pora Ophel laga deal tak, thik korise.
28Ghora Duar laga uporte purohit khan pora thik korise, sob jon nijor ghor laga samne te. 29Tar pichete Immer laga chokra Zadok pora tar ghor laga samne te thik korise. Tar pichete Purab Duar laga rukhiya, Shecaniah laga chokra Shemaiah pora thik korise. 30Tar pichete Shelemiah laga chokra Hananiah aru Zalaph laga choi number chokra Hanun pora aru ekta bhag thik korise. Tarkhan pichete Berechiah laga chokra Meshullam pora tar thaka kamra laga samne te thik korise. 31Tar pichete shuna bona ekjon Malkijah pora mondir laga noukar khan aru bebshai khan laga ghor tak, Bisar Duar laga samne, aru kona te thaka upor kamra tak, thik korise. 32Kona te thaka upor kamra aru Mer Duar laga majot te, shuna bona manuh khan aru bebshai khan pora thik korise.