Nehemiah 2

2 ¹Nisan kachāng, Awunga Ar-ta-xerxeswui khamaga̱ kum, drakhāra̱ awui mangāli leilakha ina chi khuilaga awungali mi. Ina chili lāngda awui mangāli khikhana wukhanang maleilakmana. ^a a v1 Nisan chi Hebrewbingwui kumwui kachāng khareina, kaphrengwui achikhamli (March eina April chithada) rā. ²Awungana ngahāna, "Na kagazā maningla, khisāda namai wukhanangkhala? Hi ning wukkakhanang maningla khikha maningmana." Chieina ina ngacheemeihaowa.

³Ina awungali hānga, "Awunga mashimānda ringranu! Iwui awova̱ ngarāwui chikhurpam keinung chi ja̱ta ngasāda leilakha, kala chiwui ngaveibing mei eina riktāhairakha, khisāda imai wukhanang masāpaimana?"

⁴Awungana ili ngahāna, "Na khi po khavākhala?" Chieina ina kazingramli khalei ithumwui Avāli seihā sai, ⁵kala awungali hānga, "Awungali ningyāng ungngasakakha, kala nawui rao ina nawui mikyanli ngahānkhangai leiakha, iwui awova̱ ngarāwui chikhur khalei keinung chi sakāluishit khavai ili Judahli chihovāhaolu."

⁶Awungva̱ awui khanili pamlakha awungana ili ngahāna, "Nawui shongzā karankha sāngra, kala katharān nana latungrakhala?" Ili chihovā khavai ana ningyāng unga, chieina ina ali atam akha mihaira.

⁷Ina awungalila hānga, "Awungali ningyāng ungngasakakha, Kong Kānda ngaleiwui governorbingli chithi ili mihaolu, chi eina Judahli I vāshung eina tangda athumna ili kān ngasakmilu. ⁸Kala awungawui ngahongwui khamayona Asaphli, khorumshimli ngasunkhui raipanwui ngaveibing, keinungwui phākho, kala ina pamvāki shimwui vang khangen sākhavai thing ili mihaolu da, chithi akha mihaolu." Awungana iwui kapobing mihaira, kaja iwui Avāwui kaphā pāng iwuitungli leihaowa.

⁹Ina Kong Kānda ngaleiwui governorbingli vāda awungawui chithibing athumli mihaira. Kala awungana raimiwui otva̱bing kala sigui raimibinglila ili ngasoda chihoi. ¹⁰Hi kashā tharan, Horonpa Sanballat eina Ammonpa otva̱ Tobiahna, mi akha Israelnaobingwui phākhavai sā khavai kharāhairakha da, ningyāng maunglakthuwa.

Ngayā Phākho Sakhaibingli Zatyanghai

¹¹Chieina ina Jerusalemli vāshungda, chili zimiksho kathumthang pamsanga. ¹²Ngayāda ina mi kateokha ngasoda ngakarthui. Jerusalemwui vang sā khavai iwui Avāna iwui lungli haikahai chi ina khipākhalila matamchitheimana. I katonga animang akha maningla, khangatei animang ili ngasoda maleimana. ¹³Ngayāda ina Tampāk Ngaveiwui eina ngashokta, Ramfa Ura̱shong, Thothap Ngaveili vāda, Jerusalemwui phākho sakhaibing kala mei eina riktā ngaveibing chi yangkhui. ¹⁴Ura̱ Ngavei kala Awungawui Ra̱khongshong ina kānhaowa, kha iwui katonga sā kānkhavai pam maleithuwa. ¹⁵Ngayāda ina phākho yangkhuida tampākshong kāhaowa. Chieina ngalanlaga Tampāk Ngaveiwui eina zangda latunghaowa. ¹⁶Ina kali vākhala kala khi sālikhala kaji otva̱bingna matheimana; Jehudinaobing, pāngmonbing, wungnaobing, otva̱bing, kala ot sākhavai miun kateibing saikorali ina khikhana mahāngmirangsai. ¹⁷Chieina ina hānga, "Ithumwui kakhanang chi nathumna thei: Jerusalem ja̱tāhaowa, kala chiwui ngaveibing mei eina riktāhaowa. Rālu, Jerusalemwui phākho sakāluishitsa, chieina ithum khikhana maikashi maningluimana." ¹⁸Ina athumli iwui Avāwui kaphā pāng iwuitungli leikahai kaji, kala awungana ili hāngkahai chi hānga. Athumna hānga, "Ithum ngakarthuida sākāra." Chieina athumna kaphā otwui vang athumwui pāng pangngasaka.

¹⁹Horonpa Sanballat, Ammonwui ahonga Tobiah, kala Arabpa Geshemna kashā tharan, athumna ithumli zeikharuida mikpaishi ngasaka, kala hānga, "Nathumna sāda khalei hi khikhala? Nathumna awungali thuingararda leila?"

²⁰Ina ngahānkāda hānga: "Kazingramli khalei ithumwui Avāna ithumli ungshung ngasakmira. Ithum awui raobingna sākā phokra, kha nathumna Jerusalemli yar, ngatangkhui, lah shimluiyar khikha maleimana."