Nehemiah 2

2 ¹Ní oṣù Nisani, ní ọdún ogún Ọba Artasasta, wáìnì wà níwájú rẹ̀; mo mú un, mo sì fi fún ọba—èmi kò tí ì ní ìbànújẹ́ rí níwájú rẹ̀ tẹ́lẹ̀. ^a a v1 Nisani ni oṣù kìíní ọdún àwọn Heberu, tí ó ṣubú ní ìbẹ̀rẹ̀ ìgbà ìrúwé (ní nǹkan bí oṣù March sí April). ²Ọba béèrè pé, “Èéṣe tí ojú rẹ fi bàjẹ́, bí ara rẹ kò tilẹ̀ ṣàìsàn? Èyí kò lè jẹ́ ohunkóhun mìíràn bí kò ṣe ọkàn tí ó bànújẹ́.” Nígbà náà ni ẹ̀rù bà mí gidigidi.

³Mo wí fún ọba pé, “Kí ọba kí ó pẹ́ títí láé! Èéṣe tí ojú mi kì yóò fi bàjẹ́, nígbà tí ìlú náà, ibi ìsìnkú àwọn baba ńlá mi, dùbúlẹ̀ ní ahoro, tí a sì ti fi iná sun àwọn ẹnu-bodè rẹ̀?”

⁴Ọba béèrè lọ́wọ́ mi pé, “Kín ni ìwọ ń béèrè fún?” Nígbà náà ni mo gbàdúrà sí Baba wa tí ń bẹ ní ọ̀run, ⁵mo sì wí fún ọba pé, “Bí ó bá wu ọba, bí ìránṣẹ́ yín bá sì rí ojú rere níwájú yín, ẹ rán mi lọ sí Juda, sí ìlú ibi ìsà òkú àwọn baba ńlá mi, kí n lè tún un kọ́.”

⁶Ọba, pẹ̀lú ayaba tí ó jókòó lẹ́gbẹ̀ẹ́ rẹ̀, béèrè lọ́wọ́ mi pé, “Yóò pẹ́ tó wo ni ìrìnàjò rẹ yóò gbà, nígbà wo ni ìwọ yóò sì padà?” Ó wu ú láti rán mi lọ, nítorí náà mo fún un ní àkókò kan.

⁷Mo tún wí fún ọba pé, “Bí ó bá wu ọba, ẹ fún mi ní àwọn lẹ́tà sí àwọn baálẹ̀ agbègbè Ìkọjá Odò, kí wọn lè jẹ́ kí n kọjá títí èmi yóò fi dé Juda. ⁸Àti pẹ̀lú lẹ́tà kan sí Asafu, olùtọ́jú igbó ọba, kí ó lè fún mi ní igi fún àwọn ìtì ẹnu-bodè odi-agbára tí ó wà lẹ́bàá tẹmpili, odi ìlú náà, àti ilé tí èmi yóò máa gbé.” Ọba sì gbà mí ní àwọn ìbéèrè mi, nítorí ọwọ́ rere Baba mi wà lára mi.

⁹Mo lọ sí ọ̀dọ̀ àwọn baálẹ̀ agbègbè Ìkọjá Odò, mo sì fún wọn ní àwọn lẹ́tà ọba. Ó ti rán àwọn olórí ọmọ-ogun àti àwọn ẹlẹ́ṣin pẹ̀lú mi. ¹⁰Nígbà tí Sanballati ará Horoni àti Tobiah ìjòyè ará Ammoni gbọ́ èyí, inú wọn bàjẹ́ gidigidi pé ẹnìkan ti wá láti wá àǹfààní rere fún àwọn ènìyàn Israẹli.

Rírìn Lẹ́bàá Odi Tí Ó Wó ní Òru

¹¹Nítorí náà mo dé Jerusalemu, mo sì wà níbẹ̀ fún ọjọ́ mẹ́ta. ¹²Mo dìde ní òru pẹ̀lú àwọn ọkùnrin díẹ̀. Èmi kò sọ fún ẹnikẹ́ni ohun tí Baba mi ti fi sí ọkàn mi láti ṣe fún Jerusalemu. Kò sí ẹranko kankan pẹ̀lú mi bí kò ṣe èyí tí mo gùn. ¹³Ní òru mo jáde gba Ẹnu-bodè Àfonífojì, síhà ọ̀dọ̀ Kànga Ìkookò, sí Ẹnu-bodè Ìdọ̀tí, mo ń yẹ odi Jerusalemu tí ó ti wó àti àwọn ẹnu-bodè rẹ̀ tí a ti fi iná sun wò. ¹⁴Mo kọjá lọ sí Ẹnu-bodè Orísun àti Adágún Ọba, ṣùgbọ́n kò sí ààyè fún ẹranko tí mo gùn láti kọjá. ¹⁵Ní òru mo gòkè lọ sí àfonífojì, mo ń yẹ odi náà wò, mo yípadà, mo wọ Ẹnu-bodè Àfonífojì, mo sì padà. ¹⁶Àwọn ìjòyè kò mọ ibi tí mo lọ tàbí ohun tí mo ń ṣe; èmi kò tí ì sọ fún àwọn Júù, àwọn àlùfáà, àwọn ọlọ́lá, àwọn ìjòyè, tàbí àwọn yòókù tí yóò ṣe iṣẹ́ náà. ¹⁷Nígbà náà ni mo wí pé, “Ẹ̀yin rí wàhálà wa: Jerusalemu dùbúlẹ̀ ní ahoro, a sì ti fi iná sun àwọn ẹnu-bodè rẹ̀. Ẹ wá, ẹ jẹ́ kí a tún odi Jerusalemu kọ́ kí àwa má bàa jẹ́ ẹ̀gàn mọ́.” ¹⁸Mo sọ fún wọn bí ọwọ́ rere Baba mi ti wà lára mi, àti ohun tí ọba ti sọ. Wọ́n wí pé, “Ẹ jẹ́ kí a dìde kí a sì kọ́.” Nítorí náà wọ́n mú ọwọ́ wọn lera fún iṣẹ́ rere náà.

¹⁹Nígbà tí Sanballati ará Horoni, Tobiah ìjòyè ará Ammoni, àti Geṣemu ará Arabia gbọ́, wọ́n fi wá ṣẹ̀fẹ̀, wọ́n sì gàn wá, wí pé, “Kín ni èyí tí ẹ̀yin ń ṣe? Ṣé ẹ̀yin ń ṣọ̀tẹ̀ sí ọba ni?”

²⁰Mo dáhùn pé, “Baba wa tí ń bẹ ní ọ̀run yóò fún wa ní àṣeyọrí. Àwa ìránṣẹ́ rẹ̀ yóò bẹ̀rẹ̀ sí í tún un kọ́, ṣùgbọ́n ẹ̀yin kò ní ìpín, ẹ̀tọ́, tàbí ìrántí kankan ní Jerusalemu.”