ኢድ ኣቦ ንነህምያ ሰደደት

ጕሁይ ገፅ እቲ ኣቕራቢ ወይኒ ተፈለጠ፥ ፅብቕቲ ኢድ ኣቦኡ ኣብ ልዕሊኡ ስለ ዝነበረት ድማ፥ ነህምያ ንጉስ ነቲ ዑና ዝኾነ ኸተማ ኣቦታቱ ክሰርሓ፥ ገመላት ኣእዋምን ክሳዕ ዝበፅሕ ዘሕልፍዎ ፍቓድን ለመነ። ቅድሚ ንዝኾነ ሰብ ምንጋሩ፥ ብለይቲ በይኑ ነቲ ዑናታት ኢየሩሳሌም ዞረ፥ ሽዑ ነደቕቲ ኣኣከበ፥ ሳንበላጥን ጦብያን ከዓ የላግፁ ነበሩ።

ምዕራፍ 2።

ኣብ ወርሒ ኒሳን፥ ኣብ መበል ዕስራ ዓመቱ ንንጉስ ኣርጤክስስ፥ ወይኒ ኣብ ቅድሚኡ ነበረ፤ ኣነ ድማ ኣልዒለ ነቲ ንጉስ ሃብክዎ፤ ቅድሚ ሕዚ ኣብ ቅድሚኡ ጐሃየ ኣይፈልጥን ነይረ። ^a ንጉስ ድማ “ዘይሓመምካ እንተለኻ፥ ገፅካ ስለ ምንታይ ጕሁይ ኮይኑ? እዙይ ጕህዩ ልቢ እምበር ካልእ ክኸውን ኣይኽእልን” ኢሉ ጠየቐኒ። ሽዑ የመና ፈራሕኹ።

ነቲ ንጉስ ድማ “ንጉስ ንዘለኣለም ይንበር! እታ ኸተማ፥ መቓብር ኣቦታተይ ዘለዋ፥ ዑና ኾይና እንተላ፥ ደገታታ ድማ ብሓዊ ተቓፂለን እንተለዋ፥ ገፀይ ስለ ምንታይ ኣይጕሂ?” በልክዎ።

ንጉስ ድማ “እንታይ ኢኻ እትልምን?” ኢሉ ጠየቐኒ። ሽዑ ናብቲ ኣብ ሰማያት ዝነብር ኣቦና ፀለኹ፥ ነቲ ንጉስ ድማ “ንጉስ ደስ እንተ ኢልዎ፥ ባርያኻ ኣብ ቅድሜኻ ሞገስ እንተ ረኺቡ ድማ፥ ናብ ይሁዳ፥ ናብታ መቓብር ኣቦታተይ ዘለዋ ኸተማ፥ ክሰርሓ ስደደኒ” በልክዎ።

ንጉስ ድማ፥ እታ ንግስቲ ኣብ ጐድኑ ተቐሚጣ እንተላ፥ “ጕዕዞኻ ኽንደይ ይወስድ? መዓስከ ኽትምለስ ኢኻ?” ኢሉ ጠየቐኒ። ክሰደኒ ድማ ደስ በሎ እሞ፥ ጊዜ ነገርክዎ።

ነቲ ንጉስ ድማ ከምዙይ በልክዎ፦ “ንጉስ ደስ እንተ ኢልዎ፥ ክሳዕ ናብ ይሁዳ ዝበፅሕ ምእንቲ ኸሕልፉኒ፥ ናብቶም ኣብ ስግር ፈለግ ዘለዉ መኳንንቲ ኣውራጃ መልእኽቲ ሃበኒ። ከምኡውን ናብ ኣሳፍ፥ ሓላዊ ዱር ንጉስ፥ ነቲ ኣብ ጥቓ ቤተ መቕደስ ዘሎ ደገታት ዕርዲ፥ ነቲ ቅፅሪ ኸተማ፥ ነታ ኣነ ዝነብረላ ገዛ ድማ ዝኸውን ገመላት ኣእዋም ክህበኒ መልእኽቲ ሃበኒ።” ንጉስ ድማ፥ ፅብቕቲ ኢድ ኣቦይ ኣብ ልዕለይ ስለ ዝነበረት፥ ልመናይ ፈፀመለይ።

ሽዑ ናብቶም ኣብ ስግር ፈለግ ዘለዉ መኳንንቲ ኣውራጃ ኸይደ፥ መልእኽቲ ንጉስ ሃብክዎም። ንጉስ ድማ ኣሕሉቕ ሰራዊትን ፈረሰኛታትን ምሳይ ሰዲዱ ነበረ። ሳንበላጥ ሆሮናዊን ጦብያ እቲ ኣሞናዊ ሹምን ድማ፥ እዙይ ምስ ሰምዑ፥ ንፅቡቕ ህዝቢ እስራኤል ዝደሊ ሰብ ስለ ዝመፀ፥ የመና ኸፍኣሎም።

ብለይቲ ነቲ ዝፈረሰ ቅፅሪ ምዝዋር

ናብ ኢየሩሳሌም ድማ በፃሕኩ፤ ኣብኡ ኸዓ ሰለስተ መዓልቲ ፀናሕኩ። ብለይቲ ምስ ቑሩብ ሰባት ተሲአ። ኣቦይ ንኢየሩሳሌም ክገብሮ ኣብ ልበይ ዘንበሮ ነገር ድማ ንሓደ እኳ ኣይነገርክዎን። ብዘይ እታ ኣነ ዝተቐመጥኩላ እንስሳ፥ ካልእ እንስሳ ምሳይ ኣይነበረን። ብለይቲ ድማ ብደገ ለሰ ወፂአ፥ ናብ ዒላ ወኻርያ ገፅ ኣቢለ፥ ናብ ደገ ድዅዒ ኸድኩ፤ ነቲ ዝፈረሰ ቅፅሪ ኢየሩሳሌምን ነቲ ብሓዊ ዝተቓፀለ ደገታታን እናመርመርኩ። ናብ ደገ ዒላን ናብ ቃላይ ንጉስን ድማ ሓለፍኩ፤ እታ ዝተቐመጥኩላ እንስሳ እትሓልፈሉ ቦታ ግና ኣይነበረን። ብለይቲ ድማ በቲ ለሰ ደየብኩ፥ ነቲ ቅፅሪ እናመርመርኩ፤ ተመሊሰ ኸዓ ብደገ ለሰ ኣትየ ተመለስኩ። እቶም ሹማምንቲ ኣበይ ከም ዝኸድኩን እንታይ ከም ዝገብርን ኣይፈለጡን፤ ነቶም ኣይሁድ፥ ነቶም ካህናት፥ ነቶም ክቡራት፥ ነቶም ሹማምንቲ፥ ነቶም ነቲ ስራሕ ዝሰርሑ ዝተረፉ ድማ፥ ክሳዕ ሕዚ ኣይነገርክዎምን ነይረ። ሽዑ ድማ ከምዙይ በልክዎም፦ “ኣብ ዘለናዮ መከራ ትርእዩ ኣለኹም፦ ኢየሩሳሌም ዑና ኾይና፥ ደገታታ ድማ ተቓፂሉ ኣሎ። ንዑ፥ ደጊም ውርደት ምእንቲ ኸይንከውን፥ ነቲ ቅፅሪ ኢየሩሳሌም ንስርሓዮ።” ፅብቕቲ ኢድ ኣቦይ ኣብ ልዕለይ ከመይ ከም ዝነበረት፥ እቲ ንጉስ ዝበለኒ ቓል ድማ ነገርክዎም። ንሳቶም ከዓ “ንተስእ እሞ ንስራሕ” በሉ። ስለዙይ ነቲ ፅቡቕ ስራሕ ኣእዳዎም ኣበርትዑ።

ሳንበላጥ ሆሮናዊን ጦብያ እቲ ኣሞናዊ ሹምን ጌሸም ዓረባዊን ድማ እዙይ ምስ ሰምዑ፥ ኣባጨዉልናን ነዓቑናን፥ “እዝ እትገብርዎ ዘለኹም እንታይ እዩ? ኣብ ልዕሊ ንጉስዶ ዓሊኹም ኣለኹም?” ድማ በሉ።

ኣነ ድማ ከምዙይ ኢለ መለስኩሎም፦ “ኣብ ሰማያት ዝነብር ኣቦና ኼሳልጠልና እዩ። ንሕና ባሮቱ ኸዓ ክንሰርሕ ክንጅምር ኢና፤ ንስኻትኩም ግና ኣብ ኢየሩሳሌም ግደ ኾነ መሰል ወይ ዝኽሪ የብልኩምን።”