尼希米記 2

2 ¹ 喺尼散月,即係亞達薛西王第二十年,酒擺喺王面前;我攞起酒,遞畀王。以前我喺佢面前從來冇試過咁愁眉苦臉。 ^a a v1 尼散月係希伯來曆嘅正月,喺初春嘅時候(大約三月至四月)。 ²王問我:「你又冇病,做乜面色咁憂愁呢?呢啲一定係心裏面有愁苦。」我聽見就好驚。

³我對王講:「願王萬歲!我祖宗墳墓所在嘅城荒廢晒,城門又畀火燒毀咗,我點會唔面帶愁容呢?」

⁴王問我:「噉你想求乜嘢呢?」我就向我哋在天嘅父禱告, ⁵然後對王講:「王若果覺得好,僕人喺你眼前又蒙恩,求你差我去猶大,去到我祖宗墳墓所在嘅城,等我可以重建佢。」

⁶當時王后坐喺王側邊,王問我:「你去嘅路程要幾耐?幾時返嚟呢?」王樂意差我去,我就講咗個日期畀佢。

⁷我又對王講:「王若果覺得好,求你賜我文書,畀大河對岸嘅省長,等佢哋畀我通行,直到我到達猶大; ⁸又賜一封文書畀掌管王園林嘅亞薩,等佢畀木材我,好做聖殿旁邊城樓嘅門梁,又做城牆同我要住嘅屋。」王就應允咗我一切嘅請求,因為我父恩慈嘅手幫助我。

⁹於是我去到大河對岸嘅省長嗰度,將王嘅文書交畀佢哋。王亦都派咗軍官同馬兵同我一齊去。 ¹⁰和倫人參巴拉同亞捫人嘅臣僕多比雅聽見呢件事,就好嬲,因為有人嚟為以色列人謀求好處。

夜晚巡視倒塌嘅城牆

¹¹我就到咗耶路撒冷,喺嗰度留咗三日。 ¹²我夜晚起身,同幾個人一齊出去。我父放喺我心裏面要為耶路撒冷做嘅事,我冇同任何人講。除咗我騎嘅嗰隻,冇第二隻牲口同我一齊。 ¹³我趁夜晚出咗谷門,向住野狗井,去到糞廠門,一路察看耶路撒冷倒塌嘅城牆同畀火燒毀嘅城門。 ¹⁴我再過去到泉門同王池,但係冇地方畀我騎嘅牲口通過。 ¹⁵我夜晚沿住山谷上去,察看城牆,然後轉返頭,由谷門入返嚟,返咗屋企。 ¹⁶眾官長都唔知我去咗邊,亦唔知我做緊乜;我當時仲未同猶大人、祭司、貴冑、官長、同其餘要做工嘅人講。 ¹⁷然後我對佢哋講:「你哋見到我哋所受嘅困苦:耶路撒冷荒廢晒,城門畀火燒毀咗。嚟啦,我哋重建耶路撒冷嘅城牆,等我哋唔再受人恥笑。」 ¹⁸我又話畀佢哋知,我父恩慈嘅手點樣幫助我,同埋王對我講嘅說話。佢哋就話:「我哋起身嚟建造啦。」於是佢哋奮勇去做呢件善工。

¹⁹和倫人參巴拉、亞捫人嘅臣僕多比雅、同阿拉伯人基善聽見,就譏笑我哋,睇我哋唔起,話:「你哋做緊乜嘢呀?係咪要背叛王呀?」

²⁰我回答佢哋:「我哋在天嘅父必定會使我哋亨通。我哋做佢僕人嘅要起身建造;但係你哋喺耶路撒冷無份、無權、亦都冇任何名分。」