Mi eng' bukuit

Nehemiah 2 FHB Father's Heart Bible™

Kiistoi 15% eng' kiy ne iale korook →
Bukuit

Iyookto Euutap Kwanda Nehemia

Ki keer chii koarageni taitap ne iibei divai, ak kingo mi eunetap Kwandanyi ne myee agobo ineendet, kosoomei Nehemiah laitoryat keetiik ak ooreet ne po kalya si koteech kogeny nganaseetap kwanisyekyik ne ki kobek. Ki laanyei kererisyegap Jerusalem ineegei kemout kingo tomo komwachi chii age tugul, yeityo koyum teegik, ye koinyeere Sanballat ak Tobiah.

Sura 2.

Eng' arawetap Nisan, eng' kenyiitap tiptem ne po laitornatetap Artaxerxes, ki mi divai eng' tainnyi; kaanam ak kaagoochi laitoryat—amu kitom akiek anee ne arageni muguleldanyu eng' tainnyi ng'o tai. a a v1 Ki Nisan arawet ne tai eng' kenyiitap Yahudik, ne tuiyei ak taunetap robta (arawekap March ak April). Kiteebe laitoryat kole, “Amu nee si koarageni taing'ung', ago ma imyani? Niito ko ma kiy age kobatee muguleldo ne arageni.” Yeityo koywei anee miising'.

Kaaleenji laitoryat ale, “Ingosap laitoryat koigeny! Amu nee si ma koarageni tainnyu, ye mi nganaseet, ole kitupchin kwanisyekyuk, koek karaatya ak kobeel kurgotikyik eng' maat?”

Kiteebe laitoryat anee kole, “Nee ne isoom?” Yeityo kasa anee Kwandanyo ne mi kipsengwet, ak kaaleenji laitoryat ale, “Ngot ko myee eng' laitoryat, ak ngot kochamak otwogindeng'ung' eng' taing'ung', iyookwo Judah, nganaseet ole mi kereeriisyegap kwanisyekyuk, si ateech kogeny.”

Kiteebe laitoryat anee, kotebee laitoryandanooto eng' kurgoonennyi, kole, “Oik ata oldang'ung', ak inyone ou?” Ki ibaibai koyookwo, si kagoochi sait.

Kaaleenji kole laitoryat ale, “Ngot ko myee eng' laitoryat, igoono paronok che po pounigap emet ne po Komosta Aineet, si kochamwo alanda agoi ait Judah. ak parweet age ne po Asap, riibindetap timdap laitoryat, si kogoono keetiik che po pambanik che po kurgotigap irimeet ne neegitee Hekaluut, ak irimoigap nganaseet, ak koot ne amenyini.” Kigoono laitoryat tuguuk che ki asoom, amu ki mi eutap Kwandanyu ne myee paragunnyu.

Kaawo ole mi pounigap emet ne po Komosta Aineet ak kaagoochi icheek paronogap laitoryat. Ki iyookto kobooto anee kiboitinigap lugeet ak piik che ketei paraisisyek. Kingo kas Sanballat Horonindet ak Tobiah Amonindet, kiboityot, konereechi icheek miising' amu konyo chii age kocheeng' ne myee eng' piigap Israel.

Awendo Irimoik che Kagil eng' Kemeut

Kaait anyun Jerusalem ak katebi olooto peetuusyek somok. Kang'eet eng' kemeut kobooto piik che ng'ering'. Ma kamwachi chii age tugul kiit ne ki inde Kwandanyu muguleldanyu si ayachi Jerusalem. Ma mi tyong' age kobooten kobatee ne ki alaany. Kamanda eng' kemeut aba Kurgeetap Kererut, agebun Soteetap Kibset, agoi Kurgeetap Eiyat, ageere irimoigap Jerusalem che ki gil ak kurgotikyik che ki beel. Kaasiirto agoi Kurgeetap Kondo ak Pooldetap Laitoryat, ago ki ma mi ooreet ne kesiirtoi tyong' ne ki alaany. Katogosta eng' kemeut aba kererut, ageere irimeet, yeityo kawekyo, kachut Kurgeetap Kererut, ak kaweeksei kogeny. Ma ki ngen pounik ole kaawendi anan kiit ne kaayai; amu kitom amwachi Yahudik, tisiik, piik che taagunotiin, pounik, anan alak che ki yaei poisyet. Yeityo kaale, “Ogeere nyalildanyo: ko mi karaatya Jerusalem, kobeel kurgotikyik. Owo, keteech irimeetap Jerusalem si ma keek kogeny teweernat.” Kaamwachi icheek ou kiga mi eutap Kwandanyu ne myee paragunnyu, ak kiit ne ki mwa laitoryat. Kole icheek, “Keng'eet si keteech.” Kogimit anyun eunekwak agobo poisyet ne myee.

Kingo kas Sanballat Horonindet, ak Tobiah Amonindet, kiboityot, ak Geshem Arabindet, ko ki nyaarin ak kosasech, kole, “Nee niito ne oyaei? Tos obargei ak laitoryat?”

Kaawol ale, “Igoonech Kwandanyo ne mi kipsengwet ng'omnateet. Keng'eet acheek otwogikyik si keteech kogeny, ago ma otinye emosto, anan kabeet, anan kainet eng' Jerusalem.”