Chotei Puunik Poisyet
Kowirwiiryo Sanballat kole imuuchi pilisiet koilde irimeet ng'wony, ak koweek taunet koek ng'olyoot ne po lugeet. Kisaai icheek Kwandanyo ak kinde riibiik: koteech kebeberta ne po murenik, ak kotononi kebeberta ak kariik, koip age tugul rotweet, koboisyei kong'eetee karon agoi kong'eet topoik.
4 1Ye kogas Sanballat kole kiteechi kogeny irimeet, konereech miising' ak kong'waan eng' nereegek, ak kochota Yahudik. 2Kole eng' taitap tupchosyekyik ak lugeetap Samaria, “Yaei nee Yahudichu che majinjin? Iweekyinigei irimeet? Igoitoi tiseiywek? Kogees eng' peetuut agenge? Imuuchi koisoboot koik kong'etu eng' keburusyegap kot, che kagocharu?”
3Ki mi Tobiah Amonindet ole neegitee ineendet, ak ki le, “Irimeetap koik ne teech icheek, agot kotogosta pilisiet parak, koilde ng'wony!”
4Igaswech, Kwandanyo, amu kagisasech. Iweekyi taunennywa metowekwak, ak igooch icheek koek luutik eng' emetap kamutet. 5Meun yaityennywa, ak mecham kowech tengekwogikwak eng' taing'ung', amu kagiwiirchi kalilanet eng' taitap teegik.
6Ki keteech anyun irimeet, kot konamgei komugul agoi kebebertap koindonyi, amu ki poisyei piik eng' muguleldonywa komugul.
7Ago ye kogas Sanballat, ak Tobiah, ak Arabuuk, ak Amonik, ak Ashdodik kole koek myee repaigap irimoigap Jerusalem, ak koigei komoswek che ng'ootiin koeny, konereech miising'. 8Ki tet icheek tugul ng'aleek togeennyi kole si konyo kobar Jerusalem, ak kowiir eng' nyalilda.
9Ago ki kisaai Kwandanyo, ak ki kinde riibiik koriibei agobo icheek peetuut ak kemeut.
10Kole anyun piigap Judah, “Kameny kimnateetap piik che boisyei, ak mi kot ne chaang' miising', si ma kimuuch keteech irimeet.” 11Ak kole puunikyok, “Kingo tomo konai anan koger echeek, kibwa kemi kwenutap icheek, kibar icheek ak kigees poisyet.”
12Yeityo ki pwa Yahudik che menyei ye neegitee icheek, ak ki mwaiwech konyil taman, “Ole tugul ne iwendi, kobwa koonech.”
13Ki ainde anyun piik eng' let eng' komoswegap irimeet che rektoot, eng' komoswek che ng'ootiin, ainde icheek ko uu ortinwekwak kobooto rotonikwak, ak ng'otwek, ak kwangok. 14Ye kaageer tuguuk, atonon ak amwachi piik che taagunotiin, ak kiptainik, ak piik alak tugul, “Among'u komuok. Obwaat Kiptaiyat Kwanda, ne oo ak ne po kwong'eet, ak obargei tupchosyekwok, ak weeriikwok ak cheepichokwok, ak osotikwok ak kooriikwok.”
15Ye kogas puunikyok kole ki kinai ng'aleekwak, ak kole kagoisto Kwandanyo, ki keeweekyigei echeek tugul irimeet, chii tugul poisyennyi. 16Kobooch peetuunooto, ko ki yaei kebebertap piikyuk poisyet, ko ki kainach kebeber age ng'otwek, ak long'onik, ak kwangok, ak kariik. Ki tonon kiptainik eng' let eng' piigap Judah tugul, 17che teech irimeet. Icheek che ibei matesak, ki yaei poisyet eng' eut age, ak ki namei kariik eng' age, 18ak ki rat chii tugul eng' teegik rotwennyi po chok eng' tuuyennyi, kingo ta koboisyei. Ago ki tebee ole mi anee chiito ne kuutei iryageet. 19Yeityo amwachi piik che taagunotiin, ak kiptainik, ak piik alak tugul, “Oo poisyet ak kayaam miising', ak kisepamgei echeek eng' irimeet. 20Ole tugul ne igase kuutetap iryageet, oiyumgei okweek ole mi echeek. Baryeech Kwandanyo!”
21Ki kiboisyei anyun, ko ki namei kebebertap piik ng'otwek, kobooch karon kogairir emet agoi kong'etu kecheik. 22Eng' sainooto amwachi kora piik, “Ingomeny chii tugul kobooto ne toreti ineendet kwenutap Jerusalem kemeut, si koegu riibiik kemeut ak labotik peetuut.” 23Ki ma kireek echeek ngoroikyok, anee, anan tupchosyekyuk, anan piikyuk, anan riibiik che sube anee; ki namei chii tugul kariik eng' eunnyi, agot ye wendi koramei peek.