Nehemiah 4

4 ¹Nígbà tí Sanballati gbọ́ pé àwa ń tún odi náà kọ́, ìbínú mú un, ó sì kún fún ìrunú gidigidi, ó sì fi àwọn Júù ṣẹ̀fẹ̀. ²Ó sọ níwájú àwọn arákùnrin rẹ̀ àti ọmọ ogun Samaria pé, “Kí ni àwọn Júù aláìlera wọ̀nyí ń ṣe? Ṣé wọn yóò tún odi náà kọ́ fún ara wọn? Ṣé wọn yóò rú ẹbọ? Ṣé wọn yóò parí rẹ̀ ní ọjọ́ kan ṣoṣo? Ṣé wọn lè sọ àwọn òkúta di ààyè padà láti inú àwọn òkìtì àjẹkù, tí wọ́n ti jóná báyìí?”

³Tobiah ará Ammoni wà lẹ́gbẹ̀ẹ́ rẹ̀, ó sì wí pé, “Odi òkúta tí wọ́n ń kọ́ yẹn—bí kọ̀lọ̀kọ̀lọ̀ kan bá tilẹ̀ gùn ún, yóò wó o palẹ̀!”

⁴Gbọ́ tiwa, Baba wa, nítorí a gàn wá. Yí ẹ̀gàn wọn padà sí orí ara wọn, kí o sì fi wọ́n lélẹ̀ bí ìkógun sí ilẹ̀ ìgbèkùn. ⁵Má ṣe fojú fo ẹ̀bi wọn, má sì jẹ́ kí ẹ̀ṣẹ̀ wọn parẹ́ kúrò níwájú rẹ, nítorí wọ́n ti ṣá ẹ̀gàn lu àwọn tí ń kọ́lé.

⁶Báyìí ni a tún odi náà kọ́ títí gbogbo rẹ̀ fi so pọ̀ dé ààbọ̀ gíga rẹ̀, nítorí àwọn ènìyàn náà fi gbogbo ọkàn wọn ṣiṣẹ́.

⁷Ṣùgbọ́n nígbà tí Sanballati, Tobiah, àwọn ará Arabia, àwọn ará Ammoni, àti àwọn ará Aṣdodu gbọ́ pé iṣẹ́ àtúnṣe odi Jerusalemu ń tẹ̀síwájú, àti pé àwọn ihò náà ti bẹ̀rẹ̀ sí í dí, ìbínú kún inú wọn. ⁸Gbogbo wọn jọ gbìmọ̀ pọ̀ láti wá bá Jerusalemu jà àti láti dà á rú.

⁹Ṣùgbọ́n a gbàdúrà sí Baba wa, a sì gbé olùṣọ́ kalẹ̀ láti ṣọ́ wọn lọ́sàn-án àti lóru.

¹⁰Nígbà náà àwọn ènìyàn Juda wí pé, “Agbára àwọn òṣìṣẹ́ ti ń dín kù, àjẹkù sì pọ̀ tó bẹ́ẹ̀ tí àwa kò fi lè tún odi náà kọ́.” ¹¹Àwọn ọ̀tá wa sì wí pé, “Kí wọn tó mọ̀ tàbí kí wọn tó rí wa, àwa yóò ti wà láàrin wọn; àwa yóò pa wọ́n, a ó sì fi òpin sí iṣẹ́ náà.”

¹²Nígbà náà àwọn Júù tí ń gbé nítòsí wọn wá, wọ́n sì sọ fún wa ní ìgbà mẹ́wàá pé, “Ibikíbi tí ẹ bá yà sí, wọn yóò dojú ìjà kọ wá.”

¹³Nítorí náà mo fi àwọn ènìyàn sí ẹ̀yìn àwọn apá odi tí ó kúrú jùlọ, ní àwọn ibi tí ó ṣí sílẹ̀, mo gbé wọn kalẹ̀ ní ìdílé ní ìdílé pẹ̀lú idà wọn, ọ̀kọ̀ wọn, àti ọrun wọn. ¹⁴Lẹ́yìn tí mo ti wo gbogbo rẹ̀ yíká, mo dìde dúró, mo sì sọ fún àwọn ọlọ́lá, àwọn ìjòyè, àti àwọn ènìyàn yòókù pé, “Ẹ má bẹ̀rù wọn. Ẹ rántí Baba Olódùmarè, ẹni ńlá tí ó sì ní ẹ̀rù, kí ẹ sì jà fún àwọn arákùnrin yín, àwọn ọmọkùnrin àti ọmọbìnrin yín, àwọn aya yín àti àwọn ilé yín.”

¹⁵Nígbà tí àwọn ọ̀tá wa gbọ́ pé àwa ti mọ̀ nípa ète wọn, àti pé Baba wa ti bà á jẹ́, gbogbo wa padà sí odi náà, olúkúlùkù sí iṣẹ́ ara rẹ̀. ¹⁶Láti ọjọ́ náà lọ, ìdajì àwọn ọkùnrin mi ń ṣe iṣẹ́ náà, nígbà tí ìdajì yòókù dìhámọ́ra pẹ̀lú ọ̀kọ̀, asà, ọrun, àti ẹ̀wù irin. Àwọn olórí dúró sí ẹ̀yìn gbogbo àwọn ènìyàn Juda, ¹⁷tí ń kọ́ odi náà. Àwọn tí ń rẹ́rù ohun èlò fi ọwọ́ kan ṣe iṣẹ́ wọn, wọ́n sì fi ọwọ́ kejì di ohun ìjà mú, ¹⁸olúkúlùkù àwọn akọ́lé sì so idà rẹ̀ mọ́ ìhà rẹ̀ bí ó ṣe ń ṣiṣẹ́. Ṣùgbọ́n ọkùnrin tí ń fun ìpè dúró lẹ́gbẹ̀ẹ́ mi. ¹⁹Nígbà náà mo sọ fún àwọn ọlọ́lá, àwọn ìjòyè, àti àwọn ènìyàn yòókù pé, “Iṣẹ́ náà tóbi, ó sì tàn káàkiri, àwa sì yà sọ́tọ̀ kúrò lọ́dọ̀ ara wa ní etí odi náà. ²⁰Níbikíbi tí ẹ bá gbọ́ ìró ìpè, ẹ kó ra yín jọ sọ́dọ̀ wa síbẹ̀. Baba wa yóò jà fún wa!”

²¹Báyìí ni a ṣe ń ṣiṣẹ́ lọ, ìdajì àwọn ọkùnrin sì di ọ̀kọ̀ mú, láti àfẹ̀mọ́júmọ́ títí àwọn ìràwọ̀ fi yọ. ²²Ní àkókò náà mo tún sọ fún àwọn ènìyàn pé, “Jẹ́ kí olúkúlùkù àti olùrànlọ́wọ́ rẹ̀ dúró nínú Jerusalemu lóru, kí wọ́n lè máa ṣọ́ ní òru, kí wọ́n sì máa ṣiṣẹ́ ní ọ̀sán.” ²³Nítorí náà bẹ́ẹ̀ ni èmi, tàbí àwọn arákùnrin mi, tàbí àwọn ọkùnrin mi, tàbí àwọn olùṣọ́ tí ń tẹ̀lé mi, kò bọ́ aṣọ wa rárá; olúkúlùkù mú ohun ìjà rẹ̀ lọ́wọ́, kódà nígbà tí ó bá ń lọ pọn omi.