Maitwangnu rwanna chwanlaang ding choi banuiye
Sanballat na lousa uina kapan ding pi raita thanglune diga choi banui ngaake, khatle bani om choi banuinu chong ga takhum baan lang koi hung rwe. Banina ani Pa khou kabia thouluga rangkaannu han thang rwe: mi nun baang khatna kapan ding bacha towe, baang khatna kraan sin basoiga han ongme, pakhat pakhatna kraan choiluga, babaan natainu bina sen chan swaknu tangga chwanlaang towe.
4 1Anina kapan ga bacha thou lat ongme dinu Sanballat na ngaisunu kaan bi, maan balung pwanga sung souga, Jihudi rwan ding choi banui ngaake. 2Maanna bau banao rwan khatle Samaria kraanmi rwan meithaan bi rinne, “Hei ngam maknu Jihudi rwan nga pa-aam toga ongnubo? Banina baraanto lang kapan ga han thou lat ngamlu dingbo? Banina chaak lan pi thanglu dingbo? Banina kani khat pi loi thanglu dingbo? Charut ongnu raita damnu pwannu bing khouna, banina lung bing ga ring thou lat thangnu ngamlu dingbo?”
3Ammon mi Tobiah na bakim bi ongluga rinne, “Banina bacha thou lat ongnu haba lung kapan ga, lousa ui khatna balu chung bi bazaak dabe le, pi raita thanglune!”
4Ani Pa, anina kabianu ngaisuru, balangbe ani ga phaang batanu rwanne. Bani om choi banuinu chong ga bani raanto lu chung bi han pi thangro, khatle bani ding kraan bina nam thou damnu taram khou, kasem danga pi thangro. 5Bani om koi ga banim mako, khatle bani om noh ga Nameithaan bina mut sat thang mako, balangbe banina intok mi nun meithaan bi rin basiat rwe.
6Atibriakpina anina kapan ga bacha thou latluga, pi suiga basaangnu baang khat tangga khatcha thang rwe; balangbe mi nunna balung sei brumzana chwan to ngaake.
7Atiyeda Sanballat, Tobiah, Arab rwan, Ammon rwan khatle Ashdod rwanna, Jerusalem kapan bing ga to thou latnu khut thang ongme khatle baota damnu riak bing ga kalum thou lat ongme dinu ngaisunu kaan bi, bani balung pwan tak ngaake. 8Bani suiga hungluga Jerusalem maitwang bi kraan katwak lang khatle pi kasao kabao danga to lang tup ngaak rwe.
9Atiyeda anina ani Pa khou hweiga, bani maitwang bi zingpha thamlai ngaak ong lang chwan ong rwe.
10Atiyeda Judah rwanna rinne, “Chwanlaang to ongnu mi nun om nat ga loi dam rwe, khatle raita damnu ga heitia tam briakpina, anina kapan ga bacha thou lat ngamla rwe.” 11Khatle ani maitwangnu rwanna rinne, “Banina thei mak balei khatle ani ding mu mak balei, ani bani lak pi hung tanglune; anina bani ding athatluga chwanlaang ga loi sat thanglune.”
12Haba nung bi bani kim bi amnu Jihudi rwanna hungluga, ani khou som se rinne, “Nani tudannu riak khou kanei swakka le, bani ani maitwang bi hunglune.”
13Atibriakpina eina kapan om bangiam kataknu riak bing banung la, indao ongnu riak bing bi, mi nun ga bani om kachaak chem, tou khatle li ting, phum danga chwan ong rwe. 14Eina pot bing ga phaangluga, ei tipluga kaliannu rwan, babaan rwan khatle kasemnu mi nun khou rinne, “Bani ding kachi mako. Lian khatle kachi dingnu Ngam Bachangnu Pa ding nga baning ongro, atiga nani unao rwan, nani sa kapaisa le sa kamaisa rwan, nani mei rwan khatle nani in bing lang kraan katwako.”
15Ani maitwangnu rwanna, anina bani om tup ga theiye khatle ani Pa na pi mut sat rwe dinu ngaisunu kaan bi, ani suiga kapan khou han lat rwe, mi khatna baraanto chwanlaang khou. 16Haba ni khouna, ating mi nun baang khatna chwanlaang to ngaake, atiyeda baang khatna tou, thop, li khatle kraan pon ga chamdaan chuiga ong ngaake. Babaan rwan ga Judah mi nun suiga banung la chwan ong ngaake, 17bani ga kapan ga bacha thou lat ongnu rwanne. Pot bing kai ongnu rwanna, kut khatna chwanlaang to ngaake khatle kut kateina kachaak chem ga choiye, 18khatle intok mi nun khatna baraanto chwanlaang to ongnu kaan bi, baom kachaak chem ga bakong bi karakluga pon sin basoiye. Atiyeda trumpet ka semnu manpa ga akim bi ong ngaake. 19Haba nung bi eina kaliannu rwan, babaan rwan khatle kasemnu mi nun khou rinne, “Chwanlaang ga lian khatle babasaang rwe, khatle kapan taat ani khat le khat kapaang kale rwe. 20Nanina tudannu riak bi trumpet baraam ga ngaisu le, habei ani khou hung kadoiro. Ani Pa na ani lang kraan katwaklune!”
21Atibriakpina anina chwanlaang to ong ongluga, louthwan khouna arasi bing swak hung tangga, mi nun baang khatna tou ga choiye. 22Haba kaan bi eina mi nun khou le rinne, “Mi khatna khatle baom paangthangnupa ga zingpha Jerusalem insung bi ong ngo, atiye dabe banina zingpha ga ngaaknu mi danga, khwa baan ga chwanlaang to mi danga paang thanglune.” 23Atibriakpina ei le, aunao rwan le, ating mi nun le, ei nung suinu ngaaknu mi nun le khatchale ani bahak ga lou sat dam make; mi khatna baraanto kachaak chem ga bakut bi choiye, tui lou lang senu kaan bi le.