Nehemia 4 FHB Father's Heart Bible™

4 ¹Rĩrĩa Sanibalati aaiguire atĩ nĩtwaakaga rũthingo rĩngĩ, nĩarakarire mũno, akĩhĩĩahĩĩa nĩ marakara, akĩnyararithia Ayahudi. ²Naake akĩaria mbere ya ariũ a ithe na mbũtũ ya ita ya Samaria, atĩrĩ, “Ayahudi aya matarĩ hinya mareeka atĩa? Nĩmagaacookia rũthingo marĩ ene? Nĩmakaruta magongona? Nĩmakaarĩĩkia mũthenya o ũmwe? Nĩmangĩhota gũcookeria mahiga muoyo kuuma hĩbainĩ cia mahuti, o macinĩtwo ũguo?”

³Nake Tobia ũrĩa Mũamoni aarĩ hakuhĩ nake, akiuga atĩrĩ, “Rũthingo rũu rwa mahiga maraaka—o na mbwe ĩngĩhaica igũrũ rĩaruo, no ĩrũmomore!”

⁴Tũigue, Ithe witũ, nĩgũkorwo nĩtũnyararĩtwo. Cookia irumi ciao igũrũ rĩa mĩtwe yao ene, na ũmaneane matuĩke indo cia gũtahwo bũrũriinĩ wa ũkombo. ⁵Ndũkaahithĩrĩrie wĩhia wao, na ndũkareke mehia mao mathario mehererio mbere yaku, nĩgũkorwo nĩmaikĩtie aaki irumi mothiũinĩ mao.

⁶Nĩ ũndũ ũcio tũgĩaka rũthingo rĩngĩ o nginya ruothe rũkĩnyiitithanio hamwe gũkinya nuthu ya ũraihu waruo na igũrũ, nĩgũkorwo andũ nĩmaarutire wĩra na ngoro ciao ciothe.

⁷No rĩrĩa Sanibalati, na Tobia, na Aarabu, na Aamoni, na Aashidodi maaiguire atĩ gũcookererio kwa thingo cia Jerusalemu nĩgwathiĩte na mbere na atĩ ikuo nĩciaambĩrĩirie kũhingwo, makĩiyũrwo nĩ marakara. ⁸Othe hamwe magĩciirĩra gũũka kũrũa na Jerusalemu na kũrĩrehera kĩrigiicano.

⁹No ithuĩ tũkĩhooya Ithe witũ, na tũkĩiga arangĩri a kũmetigĩrĩra mũthenya na ũtukũ.

¹⁰Hĩndĩ o ĩyo andũ a Juda makiuga atĩrĩ, “Aruti a wĩra nĩmarathirwo nĩ hinya, na mahuti nĩ maingĩ mũno nĩ ũndũ ũcio tũtingĩhota gwaka rũthingo rĩngĩ.” ¹¹Nacio thũ ciitũ ikiuga atĩrĩ, “Matanamenya kana matũone, nĩtũgaakorwo tũrĩ gatagatĩinĩ kao; nĩtũkamooraga, na tũniine wĩra ũcio.”

¹²Nao Ayahudi arĩa maatũũraga hakuhĩ nao magĩũka magĩtwĩra maita ikũmi atĩrĩ, “Kũrĩa guothe mũkeerekera, nĩmagatũũkĩrĩra.”

¹³Nĩ ũndũ ũcio ngĩiga andũ thuutha wa icunjĩ iria cia mũhuro mũno cia rũthingo, kũndũ kũrĩa gũtarĩ ũgitĩri, ngĩmaiga kũringana na nyũmba ciao marĩ na hiũ ciao cia njora, na matimũ, na mĩguĩ. ¹⁴Thuutha wa kũrora maũndũ macio, ngĩrũgama na igũrũ, ngĩĩra andũ arĩa anene, na anene a wĩra, na andũ arĩa angĩ othe atĩrĩ, “Mũtikametigĩre. Ririkanai Ithe witũ ũrĩa waathanaga, ũrĩ mũnene na wa gwĩtigĩrwo, na mũrũĩrĩre ariũ a ithe wanyu, na aariũ anyu na airĩĩtu anyu, na atumia anyu na mĩciĩ yanyu.”

¹⁵Rĩrĩa thũ ciitũ ciaiguire atĩ nĩtwamenyete ndundu yao, na atĩ Ithe witũ nĩathũkĩtie mĩbango yao, ithuĩ othe tũgĩcooka rũthingoinĩ, o mũndũ wĩrainĩ wake mwene. ¹⁶Kuuma mũthenya ũcio, nuthu ya andũ akwa ĩkarutaga wĩra, nayo nuthu ĩrĩa ĩngĩ ĩkanyiita matimũ, na ngo, na mĩguĩ, na nguo cia mbaara. Nao anene maarũgamaga thuutha wa andũ othe a Juda, ¹⁷arĩa maakaga rũthingo. Nao arĩa maakuuaga indo maarutaga wĩra na guoko kũmwe, na makanyiita indo cia mbaara na guoko kũrĩa kũngĩ, ¹⁸nake o mwaki eyohagĩrĩra rũhiũ rwake rwa njora mbaruinĩ ciake o akĩrutaga wĩra. No mũndũ ũrĩa wahuhaga karumbeta aikaraga hakuhĩ na niĩ. ¹⁹Ngĩcooka ngĩĩra andũ arĩa anene, na anene a wĩra, na andũ arĩa angĩ othe atĩrĩ, “Wĩra ũyũ nĩ mũnene na nĩũhurunjũkĩte, na ithuĩ nĩtũtiganĩte mũndũ na ũrĩa ũngĩ haarĩa rũthingo rũrĩ. ²⁰Kũrĩa guothe mũkaigua mũgambo wa karumbeta, mũũngane harĩ ithuĩ hau. Ithe witũ nĩwe ũgaatũrũĩrĩra!”

²¹Nĩ ũndũ ũcio tũgĩthiĩ na mbere na wĩra, nuthu ya andũ ĩnyiitĩte matimũ, kuuma rũũciinĩ tene gũgĩthererũka o nginya njata ciarĩte. ²²Ihindainĩ o rĩu ngĩcooka ngĩĩra andũ atĩrĩ, “O mũndũ hamwe na mũteithia wake nĩmaikarage thĩinĩ wa Jerusalemu ũtukũ, nĩ geetha matuĩke arangĩri ũtukũ na aruti a wĩra mũthenya.” ²³Nĩ ũndũ ũcio, niĩ, kana ariũ a baba, kana andũ akwa, kana arangĩri arĩa maanũmagĩrĩra, tũtiarutaga nguo ciitũ; o mũndũ aakoragwo na indo ciake cia mbaara guokoinĩ, o na rĩrĩa aathiĩ kũrehe maaĩ.