Mi eng' bukuit

2 Laitorinik 5 FHB Father's Heart Bible™

Kiistoi 15% eng' kiy ne iale korook →
Bukuit

Kosaabei Kwanda Naaman

Koboorchi chepto ne ming'in ne ki kiluul eng' Israel Naaman maotyondet ne po Kwandanyo. Kingo keleenji kotany eng' Jordan, konereech, ago kogas otwogikyik, ma kosup menatennyi, ak kotiliil. Ma namei Elisha konunet; koisup Gehasi konunet, ak koib kobooto mogondosaik.

Sura 5.

Ki po Naaman kweanaigap lugeetap laitoryatap Syria, ki oo ak ki kiiti mastanyi miising', amu kigoochi Kwandanyo katerteeret Syria eng' ineendet. Ki chiitap lugeet ne nyigan, ago ki tinyei mogondosaik. Kiga kopookyi piigap Syria ak koluul chepto ne ming'in eng' Israel, ak koboisyechi kwondap Naaman. Ki leenji pounindennyi, koleenji, “Oo, ngot kowe mastanyu ole mi maotyot ne mi Samaria! Kosaabei ineendet eng' mogondosaikyik.”

Ki wo Naaman ak koleenji mastanyi, koleenji, “Ngu ng'olyoot ne ki mwa chepto ne bunu emetap Israel.”

Koleenji laitoryatap Syria, koleenji, “Ui. Asendi parweet laitoryatap Israel.” Ki wo anyun Naaman kotinyei fedha ne koit ratilisyek pogol tisap ak konom, ak thahabu ne koit ratilisyek pogol ak konom, ak ngoroik taman che walawali.

Ki ip parweet laitoryatap Israel. Ki sir kole, “Asendiin otwogindennyu Naaman kobooto parwaani, si isaabei eng' mogondosaikyik.”

Ye kingo som laitoryatap Israel parweet, kotoreto ngoroikyik, koleenji, “Tos aa Kamuktaindet, si abar ak akochi sabeet, amu soomei kole asaabei chiito eng' mogondosaikyik? Keer, cheeng'ei lugeet ak anee!”

Ye kingo kas Elisha chiitap Kwandanyo kole kotoreto laitoryatap Israel ngoroikyik, koyookto ng'olyoot laitoryat, koleenji, “Amune itoreto ngoroiguk? Yookto ineendet ole ami, si konai kole mi maotyot eng' Israel.”

Ki nyo anyun Naaman kobooto paraisisyekyik ak charunyik, ak kotonon eng' kurgeetap kootap Elisha. Ki yookto Elisha chiito ole mi, koleenji, “Ui iune konyil tisap eng' Jordan; koweekyigei panyeeguk, ak itiliilit.”

Ki wo anyun Naaman konereech, koleenji, “Ki abwaati ale konyo ole ami, kotonon, koguur kainetap Kamuktaindet ne Toroor Kamuktaindennyi, koiisyoei eunnyi parak ole mi myando, ak kosaabei myando. Tos ma karaaran ainoosyek che po Damasko, Abana ak Pharpar, kosiir peegap Israel tugul? Tos ma amuuchi aun eng' icheek ak atiliilit?” Ki weekyigei anyun ak kwo konereech.

Ki riikta otwogikyik ole mi, koleenji, “Kwandanyu, ngot ko ki leenjin maotyot iyai kiy ne oo age, tos ma iyae? Kotes ano anyun ye leenjin kityo kole, ‘Iun si itiliilit’?”

Ki choorchin ak koilee ineegei eng' Jordan konyil tisap, ko uu ng'olyoot ne ki mwa chiitap Kwandanyo, ak koweekyigei panyeekyik ko uu che po lakweet ne ming'in, ak kotiliilit.

Ki weekyigei Naaman ak piikyik tugul ole mi chiitap Kwandanyo. Ki nyo ak kotonon eng' tainnyi, koleenji, “Nguno anai ale ma mi Kamuktaindet eng' ng'wony komugul kobatee eng' Israel. Asaain ale taach kagoochinoik eng' otwogindeng'ung'.”

Ki wol Elisha kole, “Ko uu ye sabei Kwandanyo, ne atonone eng' tainnyi, ma ataach kiy age tugul.” Ki ichirchir Naaman ineendet konam, ago ki ma cham.

Koleenji Naaman, “Ngot ma uu nooto, kegoonech otwogindeng'ung' ng'ung'unyek ne imuuchi koip nyumbusyek aeng', amu ma kogoochin kogeny otwogindeng'ung' kayaneet ne kibeelei anan tiseiywot kamuktaindet age tugul kobatee Kamuktaindet ne Toroor. Ago ingonyoun kaat Kamuktaindet ne Toroor otwogindeng'ung' kiy age ni: ye chut mastanyu kootap Rimon koyai tengekto, kotiegei eunnyu, ak agutunyi eng' kootap Rimon, ye agutunyi olooto—ingonyoun kaat Kamuktaindet ne Toroor otwogindeng'ung'.”

Koleenji Elisha, koleenji, “Ui eng' kaalyeet.” Ki pa anyun Naaman komong' ineendet, ak kingo wo ole loo kitigin.

Ago ki bwaat Gehazi, otwogindetap Elisha chiitap Kwandanyo, kole, “Kagobagaakta mastanyu Naaman Syriaindet ni eng' nyumnyum, amu ma taach ne ki iip. Ko uu ye sabei Kwandanyo, alabat anyun asup ineendet ak asich kiy age.”

Ki labat Gehazi kosup Naaman. Ye kingo keer Naaman ineendet kolabat kobun, kobun eng' kaariinnyi komut kotorook ineendet, koleenji, “Tos miach tugul?”

Koleenji Gehazi, koleenji, “Miach tugul. Kiyookto mastanyu ale amwaiwon: ‘Kagobwa murenik aeng' che po weeriigap maotik ole ami kobun tulootikap Ephraim. Igoochi anyun ratilisyek konom ak tiptem ak muut che po fedha ak ngoroik aeng' che walawali.’”

Koleenji Naaman, koleenji, “Asaain ale inam ratilisyek pogol ak konom.” Ki ichirchir Gehazi, ak koger fedha ne koit ratilisyek pogol ak konom eng' lolotinwek aeng' kobooto ngoroik aeng', ak kogochi otwogik aeng', che ki ip tai eng' Gehazi. Ye kingo it tulweet, kinam Gehazi tuguuk eng' eutap otwogik, ak koinde eng' koot, ak koyookto piik koba, ak koba. Ki chut ak kotonon eng' taitap mastanyi. Ki teebee Elisha koleenji, “Imi ano, Gehazi?” Koleenji, “Ma ki we otwogindeng'ung' ole tugul.”

Ago koleenji Elisha, “Tos ma ki we muguleldanyu kobooten ye kingo weekyigei chiito eng' kaariinnyi komut kotoorogin? Tos sait ni ne kinam fedha, ngoroik, mbareenigap mseituni, mbareenigap sabibuk, keechiirek, tuuga, ak otwogik che murenik ak che tiibiik? Konamin mogondosaigap Naaman inyee ak logoeguk koigeny.” Ki pa Gehazi komong' tainnyi, kotinyei mogondosaik, kileelit poortanyi ko uu teluji.