2 Athamaki 5 FHB Father's Heart Bible™

5 ¹Naamani, mũnene wa mbũtũ cia ita cia mũthamaki wa Aramu, aarĩ mũndũ mũnene na agĩtĩĩtwo mũno nĩ mwathi wake, tondũ nĩ we Ithe witũ aaheirie Aramu ũhootani. Aarĩ njamba ya ita ĩrĩ hinya, no aarĩ na mũrimũ wa ngothi. ²Nao Aaramu nĩmathiĩte gũtharĩkĩra, makĩtaha kairĩĩtu kanini kuuma Isiraeli, nako gagĩtungatĩra mũtumia wa Naamani. ³Nako gakĩĩra mũtumia ũrĩa gaatungatagĩra atĩrĩ, “Naarĩ korwo mwathi wakwa aathiĩ kũrĩ mũnabii ũrĩa ũrĩ Samaria! We no amũhonie mũrimũ wake wa mangũ.”

⁴Naake Naamani agĩthiĩ, akĩĩra mwathi wake atĩrĩ, “Ũũ nĩguo kairĩĩtu karĩa koimĩte bũrũri wa Isiraeli koigĩte.”

⁵Nake mũthamaki wa Aramu akĩmwĩra atĩrĩ, “Thiĩ, na nĩngũtũmĩra mũthamaki wa Isiraeli marũa.” Naake Naamani agĩthiĩ, akuuĩte betha ta ratiri 750, na thahabu ta ratiri 150, na nguo ikũmi cia kũgarũra.

⁶Nake agĩtwarĩra mũthamaki wa Isiraeli marũa macio, namo moigaga atĩrĩ, “Nĩndagũtũmĩra ndungata yakwa Naamani hamwe na marũa maya, nĩgeetha ũmũhonie mũrimũ wake wa ngothi.”

⁷Na rĩrĩa mũthamaki wa Isiraeli aathomire marũa macio, agĩtembũranga nguo ciake, akiuga atĩrĩ, “Kaĩ niĩ ndĩ Ngai, wa kũũraga na kũhe muoyo, atĩ mũndũ ũyũ aanjũũrie ndũhonie mũndũ mũrimũ wake wa ngothi? Ta rorai, nĩ njĩra ya ngũĩ aracaria kũrĩ niĩ!”

⁸Rĩrĩa Elisha, mũndũ wa Ithe witũ, aaiguire atĩ mũthamaki wa Isiraeli nĩatembũrangĩte nguo ciake, agĩtũmĩra mũthamaki ũhoro, akĩmũũria atĩrĩ, “Nĩkĩĩ ũratembũranga nguo ciaku? Reke oke kũrĩ niĩ, na nĩekũmenya atĩ nĩ kũrĩ mũnabii thĩinĩ wa Isiraeli.”

⁹Naake Naamani agĩũka na mbarathi ciake na ngaari ciake cia ita, akĩrũgama mũrangoinĩ wa nyũmba ya Elisha. ¹⁰Nake Elisha akĩmũtũmĩra mũtũmwo, akĩmwĩra atĩrĩ, “Thiĩ wĩthambe maita mũgwanja Rũũĩinĩ rwa Jorodani, nayo nyama yaku nĩĩgũcooka ũrĩa yaarĩ, na ũtuĩke mũtheru.”

¹¹No Naamani agĩĩthiĩra arĩ na marakara, akiuga atĩrĩ, “Niĩ ndeeciiragia atĩ nĩ egũũka kũrĩ niĩ, arũgame, akaĩre rĩĩtwa rĩa MWATHANI Ngai wake, na ainĩrie guoko gwake igũrũ rĩa handũ harĩa, nĩguo ahonie mũrimũ ũcio. ¹²Githĩ Abana na Fariparu, njũũĩ cia Dameski, ti njega gũkĩra maaĩ moothe ma Isiraeli? Githĩ ndingĩethamba thĩinĩ wacio nduĩke mũtheru?” Naake akĩhũndũka, agĩthiĩ arĩ na marakara maingĩ.

¹³No ndungata ciake igĩũka harĩ we, ikĩmwĩra atĩrĩ, “Baaba, korwo mũnabii ũcio nĩakwĩrire wĩke ũndũ mũnene, githĩ ndũngĩkũwĩkire? Githĩ to makĩria rĩrĩa aakwĩra o atĩ, ‘Wĩthambe ũtuĩke mũtheru’?”

¹⁴Naake agĩikũrũka, agĩtobokia mwĩrĩ maita mũgwanja Rũũĩinĩ rwa Jorodani, o ta ũrĩa mũndũ wa Ithe witũ oigĩte, nayo nyama yake ĩgĩcooka ĩkĩhaana ta ya kaana kanini, nake agĩtuĩka mũtheru.

¹⁵Nake Naamani hamwe na andũ ake oothe magĩcooka kũrĩ mũndũ wa Ithe witũ. Agĩũka, akĩrũgama mbere yake, akiuga atĩrĩ, “Rĩu nĩndamenya atĩ gũtirĩ Ngai ũngĩ thĩ yoothe tiga o Isiraeli. Ndagũthaitha, wĩtĩkĩre kĩheo kuuma kũrĩ ndungata yaku.”

¹⁶Nake Elisha agĩcookia atĩrĩ, “ O ta ũrĩa Ithe witũ atũũraga muoyo, ũrĩa ndũgamĩte mbere yake, gũtirĩ kĩndũ ngwĩtĩkĩra.” Nake Naamani akĩmũringĩrĩria etĩkĩre, no akĩrega.

¹⁷Nake Naamani akiuga atĩrĩ, “Angĩkorwo tiũguo-rĩ, ndungata yaku nĩĩheo tĩĩri mũigana ũrĩa ũngĩkuuĩka nĩ nyũmbũ igĩrĩ, tondũ ndungata yaku ndĩrĩ hĩndĩ ĩgaacooka kũrutĩra ngai ĩngĩ o yoothe igongona rĩa njino kana igongona, tiga o MWATHANI. ¹⁸No MWATHANI arekere ndungata yaku ũndũ ũyũ ũmwe: rĩrĩa mwathi wakwa agaatoonya hekaru ya Rimoni nĩguo ahooe, etiiritie guokoinĩ gwakwa, na niĩ nyinamĩrĩre thĩinĩ wa hekaru ya Rimoni; rĩrĩa ngainamĩrĩra kũu, MWATHANI arekere ndungata yaku ũndũ ũcio.”

¹⁹Nake Elisha akĩmwĩra atĩrĩ, “Thiĩ na thaayũ.” Naake Naamani akĩmwehera, agĩthiĩ, na aarĩkĩte gũthiĩ itĩĩna inini.

²⁰No Gehazi, ndungata ya Elisha, mũndũ wa Ithe witũ, agĩĩciiria atĩrĩ, “Ta rora, mwathi wakwa nĩarekereria Naamani ũyũ Mũaramu na njĩra hũthũ, akĩrega kwĩtĩkĩra kĩrĩa aareehire. O ta ũrĩa Ithe witũ atũũraga muoyo, nĩngũmũhanyũkĩria njamũkĩre kĩndũ kuuma kũrĩ we.”

²¹Nake Gehazi agĩtengʼeria Naamani. Rĩrĩa Naamani aamuonire agĩtengʼera okĩte, agĩikũrũka ngaariinĩ yake ya ita akamũtũnge, akĩmũũria atĩrĩ, “Maũndũ mothe nĩ mega?”

²²Nake Gehazi akiuga atĩrĩ, “Maũndũ mothe nĩ mega. Mwathi wakwa nĩandũmĩte njũke njuge atĩrĩ, ‘Aanake eerĩ a mũhĩrĩga wa anabii nĩmokire kũrĩ niĩ o rĩu moimĩte irĩmainĩ cia Efiraimu. Ndagũthaitha, mahe betha ta ratiri mĩrongo mũgwanja na ĩtaano, na nguo igĩrĩ cia kũgarũra.’ ”

²³Nake Naamani akiuga atĩrĩ, “Ndagũthaitha, oya ratiri ta igana rĩmwe na mĩrongo ĩtaano.” Akĩringĩrĩria Gehazi, nake akĩoha betha ta ratiri igana rĩmwe na mĩrongo ĩtaano mĩhukoinĩ ĩĩrĩ hamwe na nguo igĩrĩ cia kũgarũra, agĩciĩkĩra ndungata igĩrĩ, nacio igĩthiĩ imĩkuuĩire mbere ya Gehazi. ²⁴Na aakinya karĩmainĩ, Gehazi akĩoya indo icio kuuma kũrĩ ndungata icio, agĩciiga nyũmba thĩinĩ, agĩĩtĩkĩria andũ acio mathiĩ, nao magĩthiĩ. ²⁵Naake agĩtoonya, akĩrũgama mbere ya mwathi wake. Nake Elisha akĩmũũria atĩrĩ, “Wee Gehazi, ũraarĩ kũ?” Nake akiuga atĩrĩ, “Ndungata yaku ndĩraathiĩ handũ o na ha.”

²⁶No Elisha akĩmwĩra atĩrĩ, “Githĩ ngoro yakwa ndĩraathiĩ nawe rĩrĩa mũndũ ũcio aahũndũkire oimĩte ngaariinĩ yake ya ita agũtũnge? Ĩĩ rĩĩrĩ ihinda rĩa kwamũkĩra betha, na nguo, na mĩgũnda ya mĩtamaiyũ, na mĩgũnda ya mĩthabibũ, na ngʼondu, na ngʼombe, na ndungata cia arũme na cia andũ-a-nja? ²⁷Mangũ ma Naamani nĩmagũkũnyiitĩrĩra wee na rũciaro rwaku nginya tene na tene.” Nake Gehazi akiuma harĩ we arĩ na mangũ, ngothi yake ĩrĩ njerũ ta ira.