Ubanmu Ya Warkar da Na'aman

Wata yarinya 'yar Isra'ila da aka kama ta nuna wa Na'aman annabin Ubanmu. Ya husata da aka ce masa ya yi wanka a Urdun, amma ya saurari bayinsa maimakon girmankansa, ya fito tsarkakakke. Elisha bai karɓi ko kwabo ba; Gehazi ya bi kyautar a guje ya karɓa, ya kuwa ɗauki cutar tare da ita.

Babi na 5.

Na'aman, shugaban sojojin sarkin Aram, babban mutum ne mai daraja ƙwarai a wurin maigidansa, gama ta wurinsa Ubanmu ya ba Aram nasara. Shi jarumi ne mai ƙarfin hali, amma yana da cuta ta fata. Arameyawa sun kai hari suka kamo wata yarinya daga ƙasar Isra'ila, ita kuwa tana bauta wa matar Na'aman. Ta ce wa uwargijiyarta, “Da ma maigidana zai je wurin annabin da yake Samariya! Da ya warkar da shi daga kuturtarsa.”

Sai Na'aman ya shiga ya gaya wa maigidansa, “Ga abin da yarinyar nan daga ƙasar Isra'ila ta faɗa.”

Sarkin Aram ya ce, “Ka tafi. Zan aika da wasiƙa zuwa ga sarkin Isra'ila.” Sai Na'aman ya tafi da azurfa wajen fam ɗari bakwai da hamsin, da zinariya wajen fam ɗari da hamsin, da sutura saiti goma.

Ya kai wasiƙar wa sarkin Isra'ila. Ga abin da take cewa, “Na aiko maka da bawana Na'aman tare da wannan wasiƙa, domin ka warkar da shi daga cutarsa ta fata.”

Da sarkin Isra'ila ya karanta wasiƙar, sai ya yage tufafinsa, ya ce, “Ni Allah ne, da zan kashe in kuma ba da rai, da ya aiko mini in warkar da mutum daga cutar fata? Ku dubi, yana neman husuma da ni ne!”

Da Elisha mutumin Ubanmu ya ji cewa sarkin Isra'ila ya yage tufafinsa, sai ya aika da saƙo wa sarkin cewa, “Don me ka yage tufafinka? Ka aiko shi gare ni, zai kuwa san akwai annabi a Isra'ila.”

Sai Na'aman ya zo da dawakansa da kekunan yaƙinsa, ya tsaya a bakin ƙofar gidan Elisha. Elisha ya aika masa da manzo cewa, “Ka tafi, ka yi wanka sau bakwai a Kogin Urdun; namanka zai komo, ka kuma tsarkaka.”

Amma Na'aman ya tafi da fushi, yana cewa, “Na yi tsammani zai fito wurina, yă tsaya, yă kira sunan Ubangiji Allahnsa, yă kaɗa hannunsa a bisa wurin, yă warkar da cutar. Ashe, Abana da Farfar, koguna na Dimashƙu, ba su fi dukan ruwayen Isra'ila ba? Ba zan iya yin wanka a cikinsu in tsarkaka ba?” Sai ya juya ya tafi cikin fushi.

Amma bayinsa suka matso kusa da shi, suka ce, “Ya baba, da annabin ya ce ka yi wani babban abu, ashe, ba za ka yi ba? Balle kuwa da ya ce maka kawai, ‘Ka yi wanka ka tsarkaka’?”

Sai ya gangara ya tsoma kansa a Kogin Urdun sau bakwai, yadda mutumin Ubanmu ya faɗa, namansa kuwa ya komo kamar na ƙaramin yaro, ya kuma tsarkaka.

Na'aman da dukan mutanensa suka koma wurin mutumin Ubanmu. Ya zo ya tsaya a gabansa, ya ce, “Yanzu na sani babu wani Allah a cikin dukan duniya sai a Isra'ila. Ina roƙonka ka karɓi kyauta daga wurin bawanka.”

Elisha ya amsa ya ce, “Muddin Ubanmu yana a raye, wanda nake tsaye a gabansa, ba zan karɓi kome ba.” Na'aman ya matsa masa yă karɓa, amma ya ƙi.

“In ba haka ba,” Na'aman ya ce, “to, a ba bawanka ƙasa gwargwadon abin da alfadarai biyu za su iya ɗauka, gama bawanka ba zai ƙara miƙa hadaya ta ƙonawa ko sadaka ga wani allah dabam ba sai ga Ubangiji. Sai dai Ubangiji yă gafarta wa bawanka wannan abu guda ɗaya. Sa'ad da maigidana ya shiga haikalin Rimmon domin yă yi sujada, yana jingina a hannuna, ni kuma na rusuna a cikin haikalin Rimmon, sa'ad da na rusuna a can—Ubangiji yă gafarta wa bawanka.”

Elisha ya ce, “Ka tafi lafiya.” Sai Na'aman ya tashi daga wurinsa, ya yi tafiya ɗan nisa.

Amma Gehazi, bawan Elisha mutumin Ubanmu, ya yi tunani a ransa, “Maigidana ya saki wannan Ba'arame Na'aman da sauƙi ƙwarai, da bai karɓi abin da ya kawo ba. Muddin Ubanmu yana a raye, zan bi shi a guje in sami wani abu.”

Sai Gehazi ya bi Na'aman a guje. Da Na'aman ya gan shi yana zuwa a guje, sai ya sauka daga keken yaƙinsa domin yă tarye shi, ya ce, “Kome lafiya?”

Gehazi ya ce, “Kome lafiya. Maigidana ya aiko ni in ce, ‘Ga wasu samari biyu daga cikin ƙungiyar annabawa sun zo mini daga ƙasar tuddan Ifraimu. Ina roƙonka ka ba su azurfa wajen fam saba'in da biyar da sauyin tufafi biyu.’”

Na'aman ya ce, “Ina roƙonka, ka ɗauki fam ɗari da hamsin.” Ya matsa wa Gehazi, sai ya ɗaura azurfa wajen fam ɗari da hamsin a cikin jakuna biyu tare da sutura saiti biyu, ya ba da su ga bayi biyu, su kuwa suka ɗauke su a gaban Gehazi. Da suka iso tudun, sai Gehazi ya karɓi kayan daga hannun bayin, ya ajiye su a cikin gida, ya sallami mutanen, suka kuwa tafi. Sai ya shiga ya tsaya a gaban maigidansa. Elisha ya tambaye shi, “Ina ka tafi, Gehazi?” Ya ce, “Bawanka bai tafi ko'ina ba.”

Amma Elisha ya ce masa, “Ashe, zuciyata ba ta tafi tare da kai ba sa'ad da mutumin ya juyo daga keken yaƙinsa domin yă tarye ka? Lokaci ne na karɓar azurfa, da tufafi, da gonakin zaitun, da gonakin inabi, da tumaki, da shanu, da bayi maza da mata? Kuturtar Na'aman za ta manne maka da zuriyarka har abada.” Sai Gehazi ya fita daga gabansa, kuturu, fatarsa fari fat kamar ƙanƙara.