Konam Athaliah Ng'echereetap Laitornatet
Kobar Athaliah piik tugul che po kaplaitoryat, ago ki kiun lakweet age eng' kootap Kwandanyo kenyiisyek lo. Ki igoochi tisiindet Jehoiada riibiik lugeet, koito weeroto koek laitoryat, ak koyaakyi kobar Athaliah saang' eng' ole-tiliil. Kibut kootap Baal, ak konam laitornatet lakweet ne po kenyiisyek tisap.
11 1Ye kingo keer Athaliah, kametap Ahasia, kole kagobek weeriinnyi, kotogos komet piik tugul che po kaplaitoryat. 2Ago ki nam Jehosheba, cheptap laitoryat Joram ak ng'eetap kametap Ahasia, Joash weeriitap Ahasia, koip ineendet eng' weeriigap laitoryat che ki machei kebar. Kouny ineendet ak cheplakwennyi eng' koot ne irue, si koriiboot eng' Athaliah, si ma kibar. 3Ki tebi kounygei kobooto ineendet eng' kootap Kwandanyo kenyiisyek lo, ye kita kolaitoran Athaliah emet.
Koriip Kwanda Laitoryat ne Iman
4Eng' kenyiit ne po tisap ki iyookto Jehoiada koguure kiptainigap pogolwogik, che po Karik ak riibiik, ak koip icheek konyo ole mi ineendet eng' kootap Kwandanyo. Ki yai arorutyet kobooto icheek, koito icheek muma eng' kootap Kwandanyo, ak koboorchi icheek weeriitap laitoryat. 5Ki ng'at icheek, kole, “Oyai ni: kebeberta agenge ne po somok eng' okweek che bwa poisyet eng' peetuutap sabato koriip kootap laitoryat, 6kebeberta agenge eng' kurgeetap Sur, kebeberta agenge eng' kurgeet ne mi let eng' riibiik; oriip koot okweegei. 7Lugosyekwak aeng' alak che pagaakta poisyet eng' peetuutap sabato, oriip kootap Kwandanyo agobo laitoryat. 8Oyiem laitoryat eng' komoswek tugul, chii tugul ne namei kariikyik; obar age tugul ne nyoonei neegit lugoosyek. Otebi kobooto laitoryat ole kowendi tugul.”
9Ki yai kiptainigap pogolwogik tugul che ki ng'at Jehoiada tisiindet. Ki nam chii tugul piikyik, icheek che bwa poisyet eng' peetuutap sabato kobooto icheek che pagaakta, ak konyo ole mi Jehoiada tisiindet. 10Ki igoochi tisiindet kiptainigap pogolwogik ng'otwek ak long'onik che po laitoryat Daudi, che ki konoore eng' kootap Kwandanyo. 11Ki tonon riibiik koyiem laitoryat, chii tugul ne namei kariikyik eng' eunnyi, kong'etee komostap tai ne po Hekaluut agoi komostap kaataam, neegit kapkorosuut ak Hekaluut. 12Ki imut Jehoiada weeriitap laitoryat, ak koratyi kuutweet metinnyi, ak koigoochi ineendet paornateet. Kimwa icheek kole ko laitoryat ak koiil ineendet, ak ki irabaach piik eunekwak ak kowaach kole, “Ingosap laitoryat!”
13Ye kingo kas Athaliah polatetap riibiik ak piik, ki wo ole mi piik eng' kootap Kwandanyo. 14Ki keer, konyoor laitoryat kotonone neegit toloita ko uu piteet, kobooto kiptainik ak piik che kuutei igondisyek negitin ineendet, ak piik tugul che po emet koboiboi ak koguutei igondisyek. Ki nam Athaliah ngoroikyik kogereer, kowaach kole, “Chaamset! Chaamset!”
15Ki ng'at Jehoiada tisiindet kiptainigap pogolwogik che po lugeet, koleenji, “Omut ineendet kosiirto lugoosyek; obar age tugul ne isubi ineendet eng' rotweet.” Amu ki mwa tisiindet, kole, “Amat kibar ineendet eng' kootap Kwandanyo.” 16Ki nam icheek ineendet, ak kwo kobun kurgeetap paraisisyek koba kootap laitoryat, ak ki kibar eng' olooto.
17Ki yai anyun Jehoiada arorutyet kwenutap Kwandanyo ak laitoryat ak piik, si koek icheek piigap Kwandanyo; ak arorutyet kwenutap laitoryat ak piik. 18Ki pwa piik tugul che po emet kootap Baal ak kobut. Ki but kaptisisyosyekyik ak kanamonikyik, ak kobar Matan, tisiindetap Baal, eng' taitap kaptisisyosyek. Ak konde tisiindet riibiik koriip kootap Kwandanyo. 19Ki nam kiptainigap pogolwogik, Karik, riibiik, ak piik tugul che po emet, ak ki iib laitoryat kong'etee kootap Kwandanyo kobun kurgeetap riibiik koba kootap laitoryat, ak kotebee ng'echereetap laitorinik. 20Ki boiboitu piik tugul che po emet, ak kotebi nganaseet eng' kaalyeet, amu ki kibar Athaliah eng' rotweet eng' kootap laitoryat.
21Ki po kenyiisyek tisap Joash ye kingo ek laitoryat.