2 இராஜாக்கள் 11

11 ¹அகசியாவின் தாயாகிய அத்தாலியாள் தன் மகன் மரித்துப்போனதைக் கண்டபோது, அவள் எழும்பி ராஜவம்சத்தார் அனைவரையும் அழிக்கத் தொடங்கினாள். ²ஆனாலும் யோராம் ராஜாவின் குமாரத்தியும் அகசியாவின் சகோதரியுமாகிய யோசேபாள், அகசியாவின் குமாரனாகிய யோவாசை, கொலைசெய்யப்படவிருந்த ராஜாவின் குமாரர் நடுவிலிருந்து திருட்டளவாய் எடுத்துக்கொண்டு, அவனையும் அவனுடைய தாதியையும் படுக்கை அறையில் மறைத்து, அத்தாலியாளுக்குத் தப்புவித்ததால் அவன் கொலைசெய்யப்படவில்லை. ³அத்தாலியாள் தேசத்தை ஆண்டுவந்த ஆறு வருஷம் அவன் அவளோடே எங்கள் பிதாவின் ஆலயத்தில் மறைந்திருந்தான்.

எங்கள் பிதா உரிமையுள்ள ராஜாவைக் காத்தல்

⁴ஏழாம் வருஷத்திலே யோய்தா நூறுபேருக்குத் தலைவராகிய காரியரையும் காவலாளரையும் அழைத்தனுப்பி, அவர்களை எங்கள் பிதாவின் ஆலயத்திலே தன்னிடத்தில் வரவழைத்து, அவர்களோடே உடன்படிக்கைபண்ணி, எங்கள் பிதாவின் ஆலயத்தில் அவர்களை ஆணையிடச்செய்து, ராஜாவின் குமாரனை அவர்களுக்குக் காண்பித்தான். ⁵அவன் அவர்களுக்குக் கட்டளையிட்டதாவது: “நீங்கள் செய்யவேண்டியது என்னவென்றால், ஓய்வுநாளில் பணிக்கு வருகிற உங்களில் மூன்றில் ஒரு பங்கினர் ராஜ அரண்மனையைக் காவல்காக்கக்கடவர்கள், ⁶மூன்றில் ஒரு பங்கினர் சூர் என்னும் வாசலிலும், மூன்றில் ஒரு பங்கினர் காவலாளருக்குப் பின்னாலிருக்கிற வாசலிலும் இருந்து, முறைவைத்து அரண்மனையைக் காவல்காக்கக்கடவர்கள். ⁷ஓய்வுநாளில் பணிநீங்குகிற உங்கள் மற்ற இரண்டு பிரிவினர் ராஜாவுக்காக எங்கள் பிதாவின் ஆலயத்தைக் காவல்காக்கக்கடவர்கள். ⁸நீங்கள் ஒவ்வொருவனும் தன் ஆயுதங்களைக் கையிலே பிடித்துக்கொண்டு ராஜாவைச் சுற்றிலும் வளைந்துகொள்ளுங்கள்; அணிவகுப்பினுள் நெருங்கிவருகிற எவனையும் கொன்றுபோடுங்கள்; ராஜா போகிற இடமெங்கும் அவனோடேகூடவே இருங்கள்.”

⁹ஆசாரியனாகிய யோய்தா கட்டளையிட்டபடியெல்லாம் நூறுபேருக்குத் தலைவர் செய்தார்கள். அவர்களில் ஒவ்வொருவனும் ஓய்வுநாளில் பணிக்கு வருகிறவர்களையும் பணிநீங்குகிறவர்களையும் தன்னோடே சேர்த்துக்கொண்டு, ஆசாரியனாகிய யோய்தாவினிடத்தில் வந்தான். ¹⁰ஆசாரியன் எங்கள் பிதாவின் ஆலயத்தில் வைக்கப்பட்டிருந்த தாவீது ராஜாவின் ஈட்டிகளையும் கேடயங்களையும் நூறுபேருக்குத் தலைவர்களிடத்தில் கொடுத்தான். ¹¹காவலாளர் ஒவ்வொருவனும் தன் ஆயுதத்தைக் கையிலே பிடித்துக்கொண்டு, ஆலயத்தின் தென்பக்கம் தொடங்கி வடபக்கம்வரையும், பலிபீடத்தண்டையிலும் ஆலயத்தண்டையிலும் ராஜாவைச் சுற்றி நின்றார்கள். ¹²யோய்தா ராஜாவின் குமாரனை வெளியே கொண்டுவந்து, அவனுக்கு கிரீடம் தரித்து, சாட்சியின் புத்தகத்தையும் கொடுத்தான்; அவர்கள் அவனை ராஜாவாக்கி அபிஷேகம்பண்ணி, கைகொட்டி, “ராஜா வாழ்க!” என்று ஆர்ப்பரித்தார்கள்.

¹³காவலாளரும் ஜனங்களும் ஆரவாரிக்கிற சத்தத்தை அத்தாலியாள் கேட்டபோது, அவள் எங்கள் பிதாவின் ஆலயத்தில் ஜனங்களிடத்தில் வந்தாள். ¹⁴அவள் பார்க்கும்போது, இதோ, வழக்கத்தின்படியே ராஜா தூணின் அருகே நின்றுகொண்டிருந்தான்; தலைவரும் எக்காளம் ஊதுகிறவர்களும் ராஜாவின் அருகே நின்றார்கள்; தேசத்தின் ஜனங்களெல்லாரும் சந்தோஷப்பட்டு எக்காளம் ஊதினார்கள். அப்பொழுது அத்தாலியாள் தன் வஸ்திரங்களைக் கிழித்துக்கொண்டு, “துரோகம்! துரோகம்!” என்று கூக்குரலிட்டாள்.

¹⁵ஆசாரியனாகிய யோய்தா, சேனையின்மேல் நியமிக்கப்பட்ட நூறுபேருக்குத் தலைவர்களுக்குக் கட்டளையிட்டதாவது: “அவளை அணிவகுப்புகளுக்கு வெளியே கொண்டுபோங்கள்; அவளைப் பின்தொடர்ந்துவருகிற எவனையும் பட்டயத்தால் கொல்லுங்கள்” என்றான்; ஏனெனில் அவள் எங்கள் பிதாவின் ஆலயத்தில் கொல்லப்படலாகாது என்று ஆசாரியன் சொல்லியிருந்தான். ¹⁶அப்படியே அவர்கள் அவளைப் பிடித்தார்கள்; அவள் குதிரைகள் நுழையும் வழியாய் அரண்மனைக்குப் போனபோது, அங்கே அவள் கொலைசெய்யப்பட்டாள்.

¹⁷பின்பு யோய்தா, ஜனங்கள் எங்கள் பிதாவின் ஜனமாயிருப்பார்கள் என்று, எங்கள் பிதாவுக்கும் ராஜாவுக்கும் ஜனங்களுக்கும் நடுவே ஒரு உடன்படிக்கையையும், ராஜாவுக்கும் ஜனங்களுக்கும் நடுவே ஒரு உடன்படிக்கையையும் பண்ணினான். ¹⁸தேசத்தின் ஜனங்களெல்லாரும் பாகாலின் கோவிலுக்குப் போய், அதை இடித்துப்போட்டு, அதின் பலிபீடங்களையும் விக்கிரகங்களையும் முற்றிலும் உடைத்து, பாகாலின் ஆசாரியனாகிய மாத்தானை பலிபீடங்களுக்கு முன்பாகக் கொன்றுபோட்டார்கள். பின்பு ஆசாரியன் எங்கள் பிதாவின் ஆலயத்தின்மேல் காவலாளரை நியமித்தான். ¹⁹அவன் நூறுபேருக்குத் தலைவர்களையும், காரியரையும், காவலாளரையும், தேசத்தின் ஜனங்கள் அனைவரையும் கூட்டிக்கொண்டு, ராஜாவை எங்கள் பிதாவின் ஆலயத்திலிருந்து காவலாளரின் வாசல்வழியாய் ராஜ அரண்மனைக்குக் கூட்டிக்கொண்டு வந்தார்கள்; அங்கே அவன் ராஜாக்களின் சிங்காசனத்தின்மேல் வீற்றிருந்தான். ²⁰அத்தாலியாள் ராஜாவின் அரண்மனையண்டையிலே பட்டயத்தால் கொல்லப்பட்டபின்பு, தேசத்தின் ஜனங்களெல்லாரும் சந்தோஷப்பட்டார்கள், நகரமும் அமைதலாயிருந்தது.

²¹யோவாஸ் ராஜாவானபோது ஏழு வயதுள்ளவனாயிருந்தான்.