Athaliaei Choba Setshang Lekei

Athaliaei Choba chempen pendou haitikei, lausikei noushou che seneibü Bou chem to po lak huan kikei. Ungshedbou Jehoiadaei lajamleibou shuong to ngühlang küntikei, noushou to Choba lela pienan, songdakbü saonyu to Bou chem phainei haitikei. Baaleibü chem leilukei, hoba po 7 kibü noushou Choba lela yeikei.

Chapter 11.

Ladang Ahaziaeibü nyu Athaliaei haoeibü shou haia dogo ngejinei, haoei Choba chempen pendou mautila khangkei. Lausikei Joram Chobaeibü nouyangnyu hoba Ahaziaeibü na Jehoshebaei Ahaziaeibü shou Joash leian, haitila kibü Chobaeibü shou shuong kanglanga ka hao huonei leibakei. Haoei hao hoba hao thuinyu Athalia ka püetan yepshangpob to huan phokei, kheijinei hao ahaitikei. Athaliaei kaodak thüka songdakbü jihsiphaia, hao sao yoa seneibü Bou chem to po lak huan kikei.

Bouei Tükdebü Choba Püetda

Po nyetboua Jehoiadaei saongao thüka lajamleibou, Kari shuong hoba lombou shuong, ngala hautikei, hoba haoen kho seneibü Bou chem to hao jungto leibakei. Haoei haoen yoa theyolanyobü che kümbei, hoba seneibü Bou chem to haoen to thelet lamlekei, hoba haoen la Chobaeibü shou lenkei. Haoei haoen to sakkukei, “Kho tegü kümashi: Nounyet ka ikjai lela loubü kan an sem cheei Choba chem lomlabü, an sem che Sur koukhün to, hoba an sem che lombou shuong phainei koukhün to; hibü kanei pendouei Choba chem lomlabü. Nounyet ka ikjai thonan loubü kaneibü lubü tan nyiei Choba shanga seneibü Bou chem lomlabü. Choba kho pendou aeka kaileptijan, müt weko insiaubu ika jungan; hoba tan to nyangko loubou pendou kho haitijan. Choba laeto haukei hao yoa kijan.”

Saongao thüka lajamleibou shuongei ungshedbou Jehoiadaei sakkubü pendou kümbei. Haoen weko weko Nounyet ka ikjai lela loubü hoba ikjai thonan loubü shuong yoa, haoeibü mütshuong leian, ungshedbou Jehoiada jungto loukei. Ungshedbouei saongao thüka lajamleibou shuong la Dawid Chobaeibü aubu hoba aih shuong kukei, aoyou seneibü Bou chem to phobü kikei. Lombou shuongei müt weko haoeibü insiaubu ika jungan, chemeibü yungkük aenei ka yungthang aenei sühko, lemshang hoba chem napheinei, Choba kaijembo lokei. Jehoiadaei Chobaeibü shou bangjung leibakei, hao thüka khun antian phokei, hoba hao la Thesilan kukei. Haoenei hao Choba dogo lenkei, hoba onang naangkukei, hoba mütshuongei ik ipbei hoba ngekko laukei, “Choba langkei kitishi!”

Ladang Athaliaei lombou hoba mütshuongeibü ngühlang ditkei, haoei seneibü Bou chem to mütshuong jungto haukei. Haoei chühkei, hoba chühashi, Choba kho song tegü laangthaonyu napheinei lokei, hoba lajamleibou hoba teklaang metbü shuong hao napheinei kikei, hoba kaodak kabü mütshuong pendou olinyoko teklaang metkei. Kheijinei Athaliaei haoeibü neisimei jitnyinkei, hoba ngekko laukei, “Khulimbo meimeibü! Khulimbo meimeibü!”

Ungshedbou Jehoiadaei sepai thüka saongao thüka lajamleibou shuong to laukei, “Sao kho tan kanglanga ka bangjung leibakushi; hoba sao phaito loubou pendou inei haitijan.” Aishanga ungshedbouei, sao seneibü Bou chem to ahaitijan, dogo laukei. Hibü haoenei sao lapbei, hoba sao koli shuongeibü koukhün danko Choba chem to haukei, hoba khünei sao haitikei.

Kheijinei Jehoiadaei seneibü Bou hoba Choba hoba mütshuong kanglanga theyolanyobü che kümbei, haoen seneibü Bou mütshuong kilabü dogo; hoba Choba si mütshuong kanglanga theyolanyobü che kümbei. Kaonyeka kibü müt pendou Baal chem to hauan kho leilukukei; hoba haoenei kho lemshang hoba heangsho shuong netla yeiko jangnyinkei, hoba lemshang thedanga Baal ungshedbou Mattan haitikei. Kheijinei ungshedbouei seneibü Boueibü chem thüka lombou shuong phokei. Haoei saongao thüka lajamleibou shuong, Karibü shuong, lombou shuong hoba kaonyeka kibü müt pendou sungkei, hoba haoenei Choba kho seneibü Boueibü chem ka lombou shuongeibü bakhün danko Choba chem to leiyenkei; hoba khünei haoei Choba shuongeibü setshanga setkei. Kaonyeka kibü müt pendou olinyokei, hoba sangnyu kho sangmaia kikei; aishanga Athalia kho Choba chem to inei haitikei.

Joash Choba lela khangjinei po nyet kikei.