2 Kings 11 FHB Father's Heart Bible™

11 ¹Jitia Ahaziah laga ama Athaliah pora tai laga putro mori juaise koi kene dekhise, tai pora pura rajparibar ke khotom kori bole shuru korise. ²Kintu raja Joram laga chukri aru Ahaziah laga bhoini Jehosheba pora, morai dibole thaka raja laga putro khan majot pora Ahaziah laga putro Joash ke chorikena loi loise. Tai pora Joash aru tar laga dai ke sua ghor te lukai rakhise, Athaliah pora bachai, etu karone tai ke morai diya nai. ³Athaliah pora desh ke raj kori thaka homoi te, tai amar Pitri laga ghor te tai logot choi saal lukai thakise.

Pitri pora asol raja ke bachai rakhise

⁴Sat number saal te Jehoiada pora eksoh laga senapoti khan ke, Cari manuh khan aru pohora diya khan ke matai pathaise, aru taikhan ke amar Pitri laga ghor te tar logot ani loise. Tai pora taikhan logot vachan ekta banaise, amar Pitri laga ghor te taikhan ke kosom khilai dise, aru taikhan ke raja laga putro ke dikhai dise. ⁵Tai pora taikhan ke hukum dise, “Eneka koribi: Bisram din te kaam te aha tumikhan majot pora tin bhag ekta pora raja laga mahal ke pohora dibo, ⁶tin bhag ekta Sur Duar te, tin bhag ekta pohora diya khan laga pichete thaka duar te; palti palti pora mahal ke pohora dibi. ⁷Bisram din te kaam pora jua tumikhan laga dusra duita bhag pora raja nimite amar Pitri laga ghor ke pohora dibo lage. ⁸Raja ke sob phale gheri kene thakibi, sob manuh laga hathte hathiar loi kene; kun manuh sipahi khan usorte ahe, tai ke morai dibi. Raja kot te jai, tai logot te thakibi.”

⁹Eksoh laga senapoti khan pora purohit Jehoiada pora hukum diya sob korise. Sob manuh pora nijor laga manuh khan ke loise—Bisram din te kaam te aha khan aru kaam pora jua khan ke loi kene—aru purohit Jehoiada logot ahise. ¹⁰Purohit pora amar Pitri laga ghor te rakhi thaka raja David laga bhala aru dhal khan eksoh laga senapoti khan ke dise. ¹¹Pohora diya khan pora raja ke sob phale khara hoise, sob manuh laga hathte nijor hathiar loi kene, mondir laga dakshin phale pora uttar phale tak, bedi aru mondir usorte. ¹²Jehoiada pora raja laga putro ke bahar te ani loise, tar uporte mukut lagai dise, aru tai ke sakhi laga kitab dise. Taikhan pora tai ke raja ase koi kene ghosna korise aru tai ke tel lagai dise, aru manuh khan pora hath marise aru hala kori koise, “Raja hodai jinda thakibi!”

¹³Jitia Athaliah pora pohora diya khan aru manuh khan laga hala hunise, tai amar Pitri laga ghor te manuh khan logot te jaise. ¹⁴Tai saise—niyom pora kowa nisena, raja khamba usorte khara ase, tar kinar te senapoti khan aru bigul bajai diya khan, aru desh laga sob manuh khan khushi kori kene bigul bajai ase. Athaliah pora tai laga kapra phatai dise aru hala kori koise, “Beiman! Beiman!”

¹⁵Purohit Jehoiada pora sipahi khan uporte thaka eksoh laga senapoti khan ke hukum dise, “Tai ke sipahi khan laga majot pora bahar te loi jabi; kun tai laga pichete jai, tai ke talwar pora morai dibi.” Kilemane purohit pora koise, tai ke amar Pitri laga ghor te morai dibo nalage. ¹⁶Etu karone taikhan pora tai ke dhori loise, aru tai ghora khan laga ghusa jaga pora mahal te jaise, aru ta te tai ke morai dise.

¹⁷Titia Jehoiada pora amar Pitri aru raja aru manuh khan majot te vachan ekta banaise, taikhan amar Pitri laga manuh hobo karne; aru raja aru manuh khan majot te bhi vachan ekta banaise. ¹⁸Desh laga sob manuh khan Baal laga mondir te jaise aru etu bhangai dise. Taikhan pora etu laga bedi khan aru murti khan bhangai dise, aru bedi khan laga age te Baal laga purohit Mattan ke morai dise. Titia purohit pora amar Pitri laga ghor uporte pohora diya khan ke rakhise. ¹⁹Tai pora eksoh laga senapoti khan, Cari manuh khan, pohora diya khan, aru desh laga sob manuh khan ke loise, aru taikhan pora raja ke amar Pitri laga ghor pora pohora diya khan laga duar phale di kene raja laga mahal te namai ani loise, aru ta te tai raja khan laga singhason te bohi loise. ²⁰Desh laga sob manuh khan khushi korise, aru sahar shanti hoise, kilemane Athaliah ke raja laga mahal te talwar pora morai dise.

²¹Jitia Joash raja hoise, tai sat saal umor thakise.