Laa 106

106 ¹Hallelujah! Ithumwui Avāli ningkashi milu, kaja a kaphāna; kaja awui makhangachei leikashi katang mavaimana.

²Khipāna ithumwui Avāwui hakkhamahā otsak phei samphangra, lah awui masot saikora vaoranu samphangrakhala? ³Mashun mayonbing, atam kachida khamashung khangarong ot sābing soranu.

⁴O ithumwui Avā, nawui mibingli na mikahai ngahānkhangai eina ili phaningunglu; nawui huikhami eina iwuili rālu, ⁵chithāda ina nawui kapangkhui kahaibingwui langkaso theira, nawui yurwui khamathānli ringphāra, kala nawui shimluili ngasoda sochikatra.

⁶Ithumna ithumwui avā ngarā sākahai thāda morei sāhaira; makaphā ot sāhaira, masākhangayi ot sāhaira. ⁷Ithumwui avā ngarā Egyptli leilakha, athumna nawui matakhak kahai otsak machukkhuimana; nawui makhangachei leikashi mavātla chi maphaningmana, kha tara̱ ngavaili, Red Seali, khayonkhamāng sai. ^a a v7 Hebrew tui: Yam Suf, "Ra̱ Ngayi." ⁸Chithālala awui hakkhamahā pangshap theingasak khavai, ana amingwui vang athumli huikhui. ⁹Ana Red Seali kahara, kala chi thenga; kathuka tara̱ chi lamhāng kupra thāda ana athumli thānkai. ¹⁰Ana athumli ningkachai kahaiwui pāngwui eina huikhui, kala yangkashewui pāngwui eina athumli ngatangkhui. ¹¹Tara̱na athumwui yangkashebingli ngaphumthathaowa; athumwui ngachaili akhala mashākmana. ¹²Chieina athumna awui tui shitsanga; awui masotlaa sai.

¹³Kha athumna awui ot kasā katotsisi malaihaowa; awui hāngkachithei mahonmana. ¹⁴Lamhāngli athumna khangatatei mikpaishimana, kala siwukli ithumwui Avāli chāng tama. ¹⁵Chieina ana athumli athumwui kapo chi mihaowa, kha athumwui alungli shimānkapai kazāt chihovā. ¹⁶Rāmrahli athumna Moseswui, kala ithumwui Avāwui kathara mi Aaronwui yuishihaowa. ¹⁷Ngaleina khamor makālaga Dathanli mayuisang, kala Abiramwui ngasokazatbingli ngaphumthathaowa. ¹⁸Athumwui thaokhongli mei rāchui; meiwonna makhayābing chuitāhaowa.

¹⁹Horebli athumna seinao akha sākhui kala heikakhui meoma̱li khorumhaowa. ²⁰Athumna athumwui masot khawo kazā mukkāwui ama̱ eina rāngatha̱ya. ²¹Athumna ithumwui Avā, athumwui Huikhame chi malaihaowa, a chi Egyptli khangachee ot sākahaina, ²²Ham ngaleili masākharar, kala Red Seali ngacheekapai otsak sākahaina. ^b b v22 'Ham ngalei' kajikahai hi Egyptwui thuikahai laa ming akhana. ²³Chieina ana athumli sāshimānra da hānga. Kha athumli sāshimān khavaiwui eina awui malungkhavāt ngareithui khavai, awui kapang kahai Moses chi awui mangāli kakai chili vākhanganai.

²⁴Chiwui thili athumna leishiri kahai ngalei chi ningkachaihaowa; awui tuingashitli mashitsangmana. ²⁵Athumwui kachonshimli athum kharopta matuiya, kala ithumwui Avāwui akhon manganāmana. ²⁶Chieina ana awui pāng lāngda ngashitta, athumli lamhāngli pitā ngasakra da, ²⁷athumwui naobing yurbingwui ngachaili pitā ngasakra, kala athumli lam khangateili chaiyāngmihaora.

²⁸Athumna them khalattana Peorwui Baalli singhaowa, kala Manglā makhangavā varebingli pha̱ya pha̱kaphayā chi zai. ²⁹Athumna athumwui otsak eina ali malung thuingasaka, kala athumwui lungli kazātkashi samphanga. ³⁰Kha Phinehasna ngakarthuida vākhanganai, kala kazātkashi nganinghaowa. ³¹Kala chi thot saikorali katang makhavai ali khamashung khangaronga da shānkhui. ³²Meribahwui tara̱li athumna ali malung thuingasaka, kala athumwui vang eina Mosesli makhayā shokhaowa, ³³kaja athumna awui manglā khā ngasakhaoda, kala ana phāphāda hānga.

³⁴Ithumwui Avāna athumli kaso kahai tākam eina athumna yurbing chi masāshimānmana, ³⁵Kha athumna yurbingli ngarumda kala athumwui shongfa tamkhui. ³⁶Athumna athumwui meoma̱li otram ngatha̱ya, chi athumwui vang khalen ngasāhaowa. ³⁷Athumna athumwui naomayarabing kala athumwui naongalāva̱bing kameobingli pha̱phayai. ³⁸Athumna khayon makhalei ashee tākhangasaka, athumwui naomayara kala naongalāva̱bingwui ashee, athumna Canaanwui meoma̱li pha̱phayai, kala ngalei chi ashee eina makhaohaowa. ³⁹Athumna athumwui otsak eina makhao ngasāhaowa, kala athumwui ot eina khayorva̱wui acham sai.

⁴⁰Chiwui vang eina ithumwui Avāwui malungkhavāt awui mibingwuitungli leihaowa, kala ana awui shimluikatli ningkachaihaowa. ⁴¹Ana athumli yurbingwui pāngli horsangmi, kala athumli ningkakachaibingna athumwuitungli munga. ⁴²Athumwui yangkashebingna athumli chotchāng ngasaka, kala athum athumwui pangshap azingli hamsang ngasaka. ⁴³Kachungkha shida ana athumli ngatangmi, kha athumwui khangarān saikorali athumna ngakaikashina, kala athumwui morei alungli nemzanghaowa. ⁴⁴Chithālala ana athumwui khangakao shāmi tharan athumwui kakhanangli yanga. ⁴⁵Athumwui vang eina ana awui tuingashit phaningunga, kala awui makhangachei leikashi pemting athishurda ning ngacheihaowa. ⁴⁶Ana athumwui tukkakhuibing saikorali athumwuitungli lukhamashan ning sangmi.

⁴⁷Ithumli ngatangmilu, O ithumwui Avā, kala yurbingwui ngachaili eina ithumli kazipkhuimilu, kathara nawui mingli ithumna ningkashi michingra kala nawui masot chili sochikatra.

⁴⁸Israelwui Avāli soranu, katang makhavai peichaoda eina katang makhavai peichaoda! Mi saikorana, "Amen!" da hāngranu. Proholi solu!