Awui Lukhamashan Leichinga
Mi kaphāli kahai mali akha: lamhāngli pongkhavai, chuk eina khatkahai, amang khangachāk eina kazākā sāngāli, kala ngasho zingrotli kakhān kachān chibing. Kachida ithumwui Avāli kaphona, kachida ali huishokmi, kachida hāngshokluilu da hāngmi.
107 1Ithumwui Avāli ningkashi milu, kaja a kaphaana; awui makhangachei leikashi katang mavaimana.
2Ithumwui Avāna ngatangmi kahaibingna hithada hāngranu. Ana yangkashewui pāng eina athumli ngatangmi, 3kala zingshowui eina zingtunwui eina, atungshong eina kala shamadru eina, ngaleibing eina athumli kazipkhui.
4Kaikhana lamhāngli ma̱zata, tara̱ makhalei siwukli, somkhavai keinung akhali vāki shongfa masamphangmana. 5Thaida kala ra̱changda, athumwui manglā vānhaowa. 6Chiwui thili athumwui kakhanang tharan athumna ithumwui Avāli ngakaowa, kala ana athumli sipkasāwui eina kanshokmi. 7Somkhavai keinung akhali samphang khavai, ana athumli shongfa ngarong eina thānzata. 8Miwui naomayarabingli awui matakhak kahai otsak saikorawui vang, athumna ithumwui Avāli awui makhangachei leikashiwui vang ningkashi miranu. 9Kaja ana kalonga manglāli ningyāng ungngasaka, kala kathaia manglāli kaphā ot eina zāt mizai.
10Kaikhana tangkhamang kala kathi khaya̱li pama, kachotkachāng kala mariwui khalap khalei phātopbing, 11khikhalajila athumna ithumwui Avāwui tuili ngakaishida, kala Juikhamataiawui hāngkachithei chinhaowa. 12Chiwui vang eina ana ot panglāk eina athumwui ning hamsang ngasaka; athum kongluihaowa, kala ngachonmi khipākha maleimana. 13Chiwui thili athumwui kakhanang tharan athumna ithumwui Avāli ngakaowa, kala ana athumli sipkasāwui eina huimi. 14Ana athumli tangkhamang kala kathi khaya̱wui eina khuishokmi, kala athumwui khalap chi sāshatmihaira. 15Miwui naomayarabingli awui matakhak kahai otsak saikorawui vang, athumna ithumwui Avāli awui makhangachei leikashiwui vang ningkashi miranu. 16Kaja ana pithraiwui khāmongbing shaokhaira, kala mariwui angumbing yortekhaira.
17Kaikhana athumwui ngakaikashe apongwui vang mangkhama̱ ngasāhaowa, kala athumwui moreiwui vang athumna kachotkachāng khananga. 18Athumna kashakazā saikorali katāva̱ sāda kathiwui ngaveili vānganaihaowa. 19Chieina athumna kakhanang tharan ithumwui Avāli ngakaowa, kala ana athumwui sipkasāwui eina athumli huimi. 20Ana awui tui chihovāda athumli raimi, kala athumli chomwui eina ngatangmi. 21Mibingwui naongarabingli awui matakhak kahai otsakwui vang, athumna ithumwui Avāli awui makhangachei leikashiwui vang ningkashi miranu. 22Kala athumna ningkashiwui pha̱kaphayā chigatranu, kala khamathānwui laa eina awui otsak hāngmiranu.
23Kaikhabingna jahas eina shamadruli tunga, kala tara̱ kachungkhatungli leih ot sai. 24Athumna ithumwui Avāwui otsak, kala kathukali awui matakhak kahai otsak theihaowa. 25Kaja ana hānglaga siphan zingrot ngathung ngasakta, tara̱ khangaphaotungli khāngmi ngasaka. 26Athum kazingramli juikai kala kathukali ngaphumhaowa; khangachee tharan athumwui malung tātunghaowa. 27Athum khamaripabing thāda nganingda nganuka, kala athumwui sākashap saikora mayuisanghaowa. 28Chieina athumna kakhanang tharan ithumwui Avāli ngakaowa, kala ana athumwui sipkasāwui eina athumli thānshokmi. 29Ana sur chi nimshimri kahai akhonnaoli va̱rihai ngasaka, kala shamadruwui khangaphaobing chingrihaowa. 30Chieina tara̱ chingrihaowa vang athum ringphāhaowa, kala ana athumli athumna ningchāng jahas ngasām khavaipamli thānzata. 31Mibingwui naongarabingli awui matakhak kahai otsakwui vang, athumna ithumwui Avāli awui makhangachei leikashiwui vang ningkashi miranu. 32Athumna mibingwui kazipli ali sochikatranu, kala ararbingwui kazipli ali masot miranu.
33Ana kongbing siwuk sāngasaka, tara̱ ura̱wokbingli ra̱kachang ngalei ngasā ngasaka, 34chili khaleibingwui makaphā kasāwui vang eina, athei matheiya ngaleili machi siwuk ngasā ngasaka. 35Ana lamhāng chi ra̱khong ngasā ngasaka, ngalei katheng chi ura̱ ok ngasaka. 36Chili ana thaikahaibingli pam ngasaka, kala athumna pamkhavai keinung akha sakā. 37Athumna lui yaoda kala drakhā yāmgui vāsanga, china athei matheiya theishirai shokngasaka. 38Ana athumli somi, kala athum kachungkha mataisanga, kala athumwui sha̱keili ana teosang ngasakmana.
39Rekakharek, unshimui, kala kakhanangwui vang eina athum teosang maishi ngasakhaira tharan, 40Ana wungnaobingwuitungli ningkakachai heirormi, kala apong makhalei lamhāngli athumli ma̱zat ngasaka; 41Kha ana kachotkachāngwui eina khavātabingli khāngkhui, kala athumwui shimkhurbingli sha̱kei thāda sā ngasaka. 42Khangarongabingna chi theida ringphāra, kala makaphā makhayā saikorawui khamor kafamihaira.
43Kachikathāna thangmeiakha, ot hibingli nganātitkhuida ithumwui Avāwui makhangachei leikashi chi phaningra.
