Tebyei Rireenennyi Koigeny
Mwaei kweanaik ang'wan let agenge: kiprutoinik che koombenoti eng' surkwen, kimonjororik eng' iron, che perber che miondosjin eng' lewutyennywa ichegei, ak piigap moinget che kagoam ng'omnatennywa koito ne oo. Kowaachji age tugul Kwandanyo, kisar age tugul, ak kileenji age tugul komwa eng' kuteet.
107 1Omwachini Kwandanyo kongoi, amu karaaran; tebyei rireenennyi koigeny.
2Ingomwa piik che ki ityaach Kwandanyo uu nooto—icheeget che ki ityaach eng' eutap puunyoot, 3ak koyum eng' emotinwek, eng' ole mang'une asiista ak ole week asiista, eng' murot ak eng' araraita.
4Ki koombenoti alak eng' surkwen, eng' ong'atosyek, koma konyoor ooreet ne ipchi nganaseet ne imuuch komeny. 5Amei rubeet ak koamei melelda, konyaluldos saboonwekwak. 6Yeityo koriirchi Kwandanyo eng' nyalildanywa, ak kosar icheek eng' sastoennywa. 7Ki indochi icheek eng' ooreet ne tiriir, si koit nganaseet ne imuuch komeny. 8Ingomwachini Kwandanyo kongoi agobo rireenennyi, agobo poisyonikyik che po kwong'eet eng' lagogap kimugulmet. 9Amu koyamei saboondo ne tonoksei, ak kobae saboondo ne amei rubeet tuguuk che myach.
10Ki tebee alak eng' mesundeito ak urwetap meet, kimonjororik eng' nyalilda ak ratisyosyek che po iron, 11amu ki ongelelji ng'aleegap Kwandanyo, ak kowech kaneetisyetap Ineendet Ne Toroor Miising'. 12Ki iming'in mugulelwekwak eng' labotik che nwaan; koterteryot, ak koma mi chii ne toreti. 13Yeityo koriirchi Kwandanyo eng' nyalildanywa, ak kosar icheek eng' sastoennywa. 14Ki imut icheek komong' eng' mesundeito ak urwetap meet, ak kotoret ratisyosyekwak. 15Ingomwachini Kwandanyo kongoi agobo rireenennyi, agobo poisyonikyik che po kwong'eet eng' lagogap kimugulmet. 16Amu konyinyiri lugoosyek che po sugunwet, ak kotil poroik che po iron.
17Ki koberberitu alak amu ortinwekwak che po ngelelyot, ak amu tengenekwak konyaliil. 18Ki kowech amitwogik tugul, ak koneegit kurgosyegap meet. 19Yeityo koriirchi Kwandanyo eng' nyalildanywa, ak kosar icheek eng' sastoennywa. 20Ki iyookto ng'olyoonnyi ak kosaakta icheek, ak kosar icheek komong' eng' keriinget. 21Ingomwachini Kwandanyo kongoi agobo rireenennyi, agobo poisyonikyik che po kwong'eet eng' lagogap kimugulmet. 22Ingogoitoi tiseiywotap kongoi, ak komwa poisyonikyik eng' tyenwogigap poiboiyet.
23Ki koba alak araraita eng' melisyek, koalda eng' peek che oo. 24Ki keer poisyonigap Kwandanyo, poisyonikyik che po kwong'eet eng' rireet. 25Amu ki ng'alaal ak koing'eetyi koristo ne nwaan, ne eeti peek che mildogei parak. 26Ki koeet koba parak eng' kipsengwet, ak kokirorokta koba rirosyek; konyaluldos mugulelwekwak eng' nyalildanywa. 27Ki kotwelwel ak koombenoti ko uu kibogityoik, ak kobet ng'omnateennywa tugul. 28Yeityo koriirchi Kwandanyo eng' nyalildanywa, ak komut icheek komong' eng' sastoennywa. 29Ki itwegu kiruneet koek tuugeet ne ming'in, ak koliliin maranosyegap araraita. 30Koboiboitu amu kotwegu peek, ak ki indochi icheek kamuung'eetap melisyek ne kimache. 31Ingomwachini Kwandanyo kongoi agobo rireenennyi, agobo poisyonikyik che po kwong'eet eng' lagogap chii. 32Ingotoroor ineendet eng' tuiyetap piik, ak kolas ineendet eng' kapkirwooget ne po poisyek.
33Iweege ainoosyek koek surkwen, ak sorutigap peek koek emet ne melel, 34emet ne tinyei logoek koek surkwen ne po munyuk, amu yaityetap icheeget che menyei olooto. 35Iweege surkwen koek poolik che po peek, ak emet ne yaamaat koek sorutigap peek. 36Eng' olooto komeny icheeget che amei rubeet, ak koteek nganaseet si komeny. 37Kogoolei mbareenik ak komiine minandetap zabibu che koonu logoek che chaang'. 38Iberuuri icheek, ak kochang'itu miising', ak ma koyachi kiyagiikwak koming'initu.
39Ye koming'initu ak koming'inegei eng' sastaet, ak yaityet, ak arageneet, 40iilate sasisyet eng' pounik, ak koigoochi koombeniot eng' surkwen ne ma tinyei ooreet; 41Ago ing'eeti kibananook komong' eng' nyalildanywa, ak koyai kaapkwak ko uu rogoornotik. 42Keerei piik che po iman ak koboiboitu, ak korata tengekto tugul kutinnyi.
43Chii age tugul ne utaat, ingoriip tuguuchu, ak kobwaat rireenetap Kwandanyo.