Tar laga morom hodai thaki thake

Char dol manuh ekta kahani koi: jongol te rasta harai jaya musafir khan, lua te bandhi thaka kaidi khan, nijor bisar pora bemar hoi jaya murkho khan, aru tufan pora nijor guin-kaam tu khai diya jahaj chola khan. Hodai pora amar Pitri ke kandi kene matise, hodai ke paar kori dise, hodai ke etu jor pora kobole koise.

Adhyay 107.

Amar Pitri ke dhanyavad dibi, kilemane Tai bhal ase; Tar laga vachan morom hodai thake.

Amar Pitri pora udhar kora manuh khan eneka kobi— junkhan ke Tai pora dushman laga hath pora udhar korise, aru desh khan pora taikhan ke joma korise, purab aru paschim pora, uttor aru samundar pora.

Kunba manuh jongol te, sukna mati te ephale-uphale ghurise, taikhan thaki bo para ekta sheher te jabole rasta pa-a nai. Bhuk aru pyaas pora, taikhan laga atma khan komjur hoi jaise. Tetiya taikhan laga dukh te Amar Pitri ke chillaise, aru Tai pora taikhan ke taikhan laga digdari pora bachaise. Tai pora taikhan ke, thaki bo para ekta sheher te punchibole, sidha rasta pora loi jaise. Tar laga vachan morom nimite taikhan Amar Pitri ke dhanyavad dibi, manuh laga bacha khan nimite kora Tar asurit kaam khan nimite. Kilemane Tai pora itcha kora atma ke santushti diye, aru bhuk laga atma ke bhal jinis khan pora bhorai diye.

Kunba manuh andhera te aru mrityu laga chaya te bohise, dukh aru luha laga chain te bandhi kora bondi khan hoi kene, kilemane taikhan Amar Pitri laga kotha khan birodh te uthise, aru Sob pora Uncha Jon laga salah ke ghin korise. Etiya Tai pora digdar kaam pora taikhan laga mon ke chhutu korise; taikhan thokar khaise, aru modot koribole kun bhi nthakise. Tetiya taikhan laga dukh te Amar Pitri ke chillaise, aru Tai pora taikhan ke taikhan laga digdari pora bachaise. Tai pora taikhan ke andhera aru mrityu laga chaya pora ulai anise, aru taikhan laga chain khan ke bhangi dise. Tar laga vachan morom nimite taikhan Amar Pitri ke dhanyavad dibi, manuh laga bacha khan nimite kora Tar asurit kaam khan nimite. Kilemane Tai pora pitol laga dorja khan ke bhangi diye aru luha laga dandi khan ke kati diye.

Kunba manuh taikhan laga birodhi rasta khan pora murkho hoi jaise, aru taikhan laga paap khan nimite taikhan dukh paise. Taikhan sob khana ke ghin korise aru mrityu laga duar khan usor te ponchise. Tetiya taikhan laga dukh te Amar Pitri ke chillaise, aru Tai pora taikhan ke taikhan laga digdari pora bachaise. Tai pora Tar laga kotha pathai dise aru changai korise, taikhan ke, aru taikhan ke gath pora bachai anise. Tar laga vachan morom nimite taikhan Amar Pitri ke dhanyavad dibi, manuh laga bacha khan nimite kora Tar asurit kaam khan nimite. Aru taikhan dhanyavad laga bolidan khan dibi, aru khushi laga git khan pora Tar kaam khan koi dibi.

Kunba manuh jahaaj khan pora samundar te namise, dangor pani khan uporte byobsa kori kene. Taikhan Amar Pitri laga kaam khan, gohin pani te Tar laga asurit kaam khan, dikhise. Kilemane Tai pora koise aru ekta andhi hawa uthaise, juntu pani laga dheu khan ke uncha te uthaise. Taikhan akash tak uthise aru gohin te giri jaise; taikhan laga digdar te taikhan laga himmat khotom hoi jaise. Taikhan sharabi manuh nisena ghuri-ghuri lor-bor hoise, aru taikhan laga sob gyaan khotom hoi jaise. Tetiya taikhan laga dukh te Amar Pitri ke chillaise, aru Tai pora taikhan ke taikhan laga digdari pora ulai anise. Tai pora andhi ke chup-chap kori dise, aru samundar laga dheu khan chup hoi jaise. Tetiya pani khan thanda huwa karone taikhan khushi hoise, aru Tai pora taikhan ke taikhan laga itcha kora bandar te loi jaise. Tar laga vachan morom nimite taikhan Amar Pitri ke dhanyavad dibi, manuh laga bacha khan nimite kora Tar asurit kaam khan nimite. Manuh khan laga sabha te taikhan Tar ke uncha koribi, aru bura manuh khan laga sabha te Tar ke prosansa koribi.

Tai pora nodi khan ke sukna mati bonai diye, pani laga jhorna khan ke pyaasi mati bonai diye, phol diya mati ke nimok laga sukna mati bonai diye, ta te thaka manuh khan laga biya kaam nimite. Tai pora sukna mati ke pani laga pukhuri bonai diye, sukhi juwa mati ke pani laga jhorna bonai diye. Ta te Tai pora bhuk laga manuh khan ke bohai diye, aru taikhan thakibole ekta sheher bonai. Taikhan kheti te bijon hissi diye aru angur bagan lagai, juntu bisi phol diye. Tai pora taikhan ke asirbad diye, aru taikhan bisi bari jai, aru Tai pora taikhan laga goru-chagol khan ke kom hobole nadiye.

Jitia atyachar, bipod aru dukh pora taikhan kom hoi jai aru niche giri jai, Tai pora hakim khan uporte ghin hali diye, aru rasta nathaka sukna mati te taikhan ke ephale-uphale ghurai diye; kintu Tai pora dukhiya manuh khan ke dukh pora uthai diye, aru taikhan laga poribar khan ke mer laga dol nisena bonai diye. Sidha mon thaka manuh khan eitu dikhi kene khushi hoi, aru sob biya kaam laga mukh bondh hoi jai.

Kun manuh gyaani ase, tai eitu kotha khan ke dhyan dibi, aru Amar Pitri laga vachan morom ke bhabibi.