Mi eng' bukuit

Tyenwogigap Kalasunet 106 FHB Father's Heart Bible™

Kiistoi 15% eng' kiy ne iale korook →
Bukuit

Tebyei rireenennyi koigeny

Kaigai kaisiit kobun komosta age, ko uu mang'aneet. Kibwaat eng' nyanjet, komach eng' surkwen, koyai teta ne po thahabu, kotiso lagokwak ichegei. Agaigai ak agaigai kowalak Kwandanyo icheek, kokas riirennywa, ak kobwaat kanamonennyi agine.

Sura 106.

Haleluya! Ogoochi Kwandanyo kongoi, amu myee ineendet; tebyei rireenennyi koigeny.

Ng'o ne muuchi komwaita poisyonik che eecheen che po Kwandanyo, anan kobarta toroornatennyi tugul? Beruuret piik che riibei kirwooget, che yaei ne imanat sait age tugul.

Ibwaata, Kwandanyo, eng' myeeindo ne iboorchi piiguk; inyoonjo ak yetuneng'ung', si ageer poroteetap piiguk che kilewen, abaibaitu eng' kagasetapkei ne po pororyeng'ung', ak aloskei kobooto saamutyeng'ung'.

Kigeyai tengekto, ko uu ye ki koyai kwanisyekwok; kigeyai kiit ne imaasat, kigeyai kiit ne ya. Ye ki kimi kwanisyekwok eng' Misiri, ma karuchini tuguuguk che po kwong'eet; ma kibwaatee abuneetap rireenennyeng'ung', ago ki rebechin eng' araraita, eng' Araraita ne Piriir. a a v7 Eng' Kiebrania: Yam Suf, “Araraitap soosiek.” Ago ki isaru icheek amu kainennyi, si konai kimnateennyi ne oo. Ki kergong' Araraita ne Piriir, ak koteeny peek; ki indochin icheek eng' peek che loo ko uu eng' surkwen. Ki isaru icheek eng' eutap ne wechei icheek, ak ki walak icheek eng' eutap puunyoot. Ki tuch peek puunikwak; ma kong'eet agot agenge eng' icheek. Yeityo ki iyan ng'aleekyik; ki tyeni toroornatennyi.

Ago ki chaakta koutye poisyonikyik; ma ki ribto mwaennyi. Eng' surkwen ki kinamgei maguutik, ak eng' emet ne yaamaat ki tyem Kwandanyo. Ki igoochi icheek kiy ne ki kosoom, ago ki iyookto chebuonit ne nunei eng' kwenunnywa. Eng' tabanwek ki koroitoeen Musa, ak Aron, chiito ne tiliil ne po Kwandanyo. Ki yaat ng'wony ak ki lugui Datan, ak ki tuch kurgeetap Abiram. Ki lal maat eng' kurgennywa; ki beel liplibenetap maat kiptengeginik.

Eng' Horeb ki yai moe ak kong'uruuk eng' kanamwet ne ki kitaanyi. Ki wal toroornatennywa koek kergeindap eito ne amei susweek. Ki utye Kwandanyo, Yetindennywa, ne ki koyai tuguuk che eecheen eng' Misiri, tuguuk che po kwong'eet eng' emetap Ham, poisyonik che po kwong'eet eng' Araraita ne Piriir. b b v22 Emetap Ham ko kainet ne po keny agobo Misiri. Yeityo ki le kobar icheek—nda ma ki Musa, ne ki ilewen, kotonon eng' oldo ne ki yaat eng' tainnyi, si kowal angeennyi si ma kobar icheek.

Yeityo ki wech emet ne karaaran; ma ki iyan kayomisennyi. Ki ing'unyng'uny eng' meng'otoikwak ak ma ki kas kutitap Kwandanyo. Yeityo ki tokyi eunnyi ak koyasyo kole koibut icheek eng' surkwen, si koibut suumeekwak eng' kwenutap pororyosyek ak koiyesta icheek eng' emotinwek tugul.

Ki rategei ak Baal-peor ak koam kagoochinoik che ki kigoochi kamuktaik che meei. Ki otach ineendet eng' yaetwekwak, ak ki ng'eet chebuonit eng' kwenunnywa. Ago ki ng'eet Phineas ak kotonon kwenut, ak ki siis chebuonit. Ak ki koiityi ineendet imanda, eng' oriindos tugul agoi koigeny. Eng' peegap Meribah ki otach ineendet, ak ki ya kiy eng' Musa agobo icheek, amu ki yachi saboondanyi koek ne ng'waan, ak komwa ng'aleek kosartae.

Ma ki kong'em pororyosyek, ko uu ye ki kong'atchi icheek Kwandanyo. ago ki konamgei ak pororyosyek ak koneetkei ortinwekwak. Ki ooti kanamonikwak, che ki koek mesteet eng' icheek. Ki aldochi oik weeriikwak ak tiibiikwak. Ki tumda korotiik che ma tengekto, korotiigap weeriikwak ak tiibiikwak, che ki aldochi kanamonigap Kanaan, ak kong'emak emet eng' korotiik. Ki koek mageek eng' yaetwekwak, ak koibotkei eng' yaetwekwak.

Ki lal anyun angeetap Kwandanyo agobo piikyik, ak kowech kurgennyi. Ki aldochi icheek eng' eutap pororyosyek, ak ki laitoran che wechei icheek kobou icheek. Ki togosta icheek puunikwak, ak ki tinyei icheek eng' kimnateetap icheek. Ki sar icheek let che chaang', ago eng' chobuutikwak tugul ki rebeka, ak ki choortegei eng' tengegektokwak. Ago ki keer ng'wechennywa ye kingo kas goiyetwekwak. Ki ibwaat arorutyennyi amu icheek, ak kowal kabwaatutikyik ko uu abunetap rireenennyi. Ki yai piik tugul che ki imut icheek koluul koriiree icheek.

Isarwech, Kwandanyo, ak iyumech komong' eng' kwenutap pororyosyek, si kegoochi kongoi kaineng'ung' ne tiliil ak kiloskei eng' lochturyeng'ung'.

Ingoberuurot Kwandap Israel, eng' koigeny agoi koigeny! Ak ingomwa piik tugul koleen, “Amen!” Haleluya!