ምሕረቱ ንዘለኣለም ይነብር

ተመሳሳሊ ታሪኽ ካብቲ ኻልእ ወገን፥ ከም ናይ ኑዛዜ። ኣብ ባሕሪ ረስዑ፥ ኣብ በረኻ ተመነዩ፥ ምራኽ ገበሩ፥ ንደቆም እውን ሰውኡ። ደጋጊሙ ኣቦና ኣሕሊፉ ሃቦም፥ ኣውያቶም ሰምዐ፥ ኪዳኑ ድማ ገና ዘከረ።

ምዕራፍ 106።

ሃሌሉያ! ሕያዋይ እዩሞ፥ ንኣቦና ኣመስግንዎ፤ ምሕረቱ ንዘለኣለም እዩ።

ብርቱዕ ግብሪ ኣቦና ክነግር፥ ኵሉ ውዳሴኡ ኸዓ ከስምዕ መን ይኽእል? ፍርዲ ዝሕልዉ፥ ኵሉ ጊዜ ፅድቂ ዝገብሩ ብፁኣን እዮም።

ኦ ኣቦና፥ በቲ ንህዝብኻ እትሞግሶ ሞገስ ዘክረኒ፤ ብምድሓንካ ናባይ ምፃእ፥ ሰናይ እቶም ዝሓረኻዮም ምእንቲ ኽርኢ፥ ብሓጐስ ህዝብኻ ደስ ክብለኒ፥ ምስ ርስትኻ ኸዓ ክሕበን።

ከም ኣቦታትና ኢና ሓጢኣት ዝገበርና፤ በዲልና፥ ክፉእ ከዓ ገበርና። ኣቦታትና ኣብ ግብፂ እንተለዉ፥ ተኣምራትካ ኣየስተውዓሉን፤ ብዝሒ ምሕረትካ ኣይዘከሩን፥ ኣብ ጥቓ ባሕሪ ግና ዓመፁ፥ ኣብ ባሕሪ ኤርትራ። ^a ንሱ ግና ምእንቲ ስሙ ኢሉ፥ ብርቱዕ ሓይሉ ምእንቲ ኼፍልጥ ኣድሓኖም። ንባሕሪ ኤርትራ ገሰፆ፥ ንሱ ኸዓ ነፀፈ፤ ከም ብምድረ በዳ ብዓሚቝ ማይ መርሖም። ካብ ኢድ እቲ ዝፀልኦም ኣድሓኖም፥ ካብ ኢድ ፀላኢ ኸዓ ተበጀዎም። እቲ ማይ ንተፃረርቶም ከደኖም፤ ካባታቶም ሓደ እኳ ኣይተረፈን። ሽዑ ብቓላቱ ኣመኑ፤ ውዳሴኡ ዘመሩ።

ግብሩ ግና ቀልጢፎም ረስዑ፤ ንምኽሩ ኣይተፅበዩን። ኣብ ምድረ በዳ ፍትወት ተመነዩ፥ ኣብ በረኻ ኸዓ ንኣቦና ፈተንዎ። ንሱ ኸዓ ዝለመንዎ ሃቦም፥ ኣብ ማእኸሎም ግና ዘማስን ሕማም ሰደደ። ኣብ ሰፈር ንሙሴ ቐንእዎ፥ ነቲ ቅዱስ ኣቦና ንኣሮን ከዓ። ምድሪ ተኸፊታ ንዳታን ወሓጠቶ፥ ንጉጅለ ኣቤሮንውን ከደነቶ። ኣብ ጉጅለኦም ሓዊ ነደደ፤ ሃልሃልታ ንሓጥኣን ኣንደዶም።

ኣብ ኮሬብ ምራኽ ገበሩ፥ ብፍሲ ንዝተሰርሐ ምስሊ ኸዓ ሰገዱሉ። ክብሮም፥ ብምስሊ እቲ ሳዕሪ ዝበልዕ ብዕራይ ለወጡ። ንኣቦና መድሕኖም ረስዑ፥ እቲ ኣብ ግብፂ ዓበይቲ ነገር ዝገበረ፥ ኣብ ምድሪ ካም ተኣምራት፥ ኣብ ጥቓ ባሕሪ ኤርትራ ዝፍርሑ ግብርታት። ^b ስለዙይ ከጥፍኦም በለ፤ እቲ ዝሓረዮ ሙሴ ግና ኣብ ቅድሚኡ ናብቲ ዝፈረሰ ቦታ ደው እንተ ዘይበለ ነይሩ፥ ቍጥዓኡ ካብ ምጥፋኦም ክመልሶ ነይሩ።

ሽዑ ነታ ፅብቕቲ ምድሪ ነዓቕዋ፤ ንተስፋ ቃሉ ኣይኣመኑን። ኣብ ድንኳናቶም ኣጕረምረሙ፥ ድምፂ ኣቦናውን ኣይሰምዑን። ስለዙይ ኢዱ ኣልዒሉ መሓለ፥ ኣብ ምድረ በዳ ኸውድቖም፥ ንዘርኦም ኣብ ማእኸል ኣህዛብ ከውድቖም፥ ኣብ ኵሉ ሃገራት ድማ ፋሕ ከብሎም።

ንበዓል ፌጎር ተፀምዱ፥ ህይወት ንዘይብሎም ኣማልኽቲ ዝቐረበ መስዋእቲ ኸዓ በልዑ። ብተግባራቶም ኣቘጥዕዎ፤ መቕሰፍቲ ድማ ኣብ መንጎኦም ወፀ። ፊንሃስ ግና ተሲኡ ገላገለ፤ መቕሰፍቲ ድማ ጠጠው በለ። ፅድቂ ኾይኑ ድማ ተቘፀረሉ፥ ንዅሉ ወለዶ ንዘለኣለም። ኣብ ማይ መሪባ ኣቘጥዕዎ፤ ብሰንኮም ድማ ንሙሴ ክፉእ ኮኖ፤ ንመንፈሱ ስለ ዘመረርዎ፥ ብዘይ ምስትውዓል ድማ ተዛረበ።

ነቶም ህዝብታት ከምቲ ኣቦና ዝኣዘዞም ኣየጥፍእዎምን፤ ምስ ኣህዛብ ደኣ ተሓዋወሱ እምበር፥ ተግባሮም ከዓ ተማሃሩ። ንጣዖታቶም ኣገልገሉ፤ እዚኣቶም ከዓ መፈንጠር ኮኖም። ንኣወዳቶምን ንኣዋልዶምን ንኣጋንንቲ ሰውኡ። ንፁህ ደም ኣፍሰሱ፥ ደም ኣወዳቶምን ኣዋልዶምን፥ ንጣዖታት ከነዓን ዝሰውእዎም፥ እታ ምድሪ ድማ ብደም ረኸሰት። ብተግባራቶም ረኸሱ፤ ብግብሮም ከዓ ኣመንዘሩ።

ስለዙይ ቍጥዓ ኣቦና ኣብ ልዕሊ ህዝቡ ነደደ፤ ንርስቱ ድማ ተፀየፈ። ናብ ኢድ ኣህዛብ ኣሕሊፉ ሃቦም፤ እቶም ዝፀልእዎም ድማ ገዝእዎም። ፀላእቶም ኣፅበብዎም፤ ኣብ ትሕቲ ኢዶም ድማ ተገዝኡ። ብዙሕ ጊዜ ኣድሓኖም፤ ንሳቶም ግና ብዅሉ ምኽሮም ዓመፁ፥ ብሓጢኣቶም ከዓ ተዋረዱ። ይኹን እምበር ጥርዓኖም ምስ ሰምዐ፥ ጭንቀቶም ረአየ። ምእንታኦም ኢሉ ኺዳኑ ዘከረ፤ ከም ብዝሒ ምሕረቱ ድማ ተመለሰ። ኵሎም እቶም ማረኽቶም ክራህርሁሎም ገበረ።

ኣድሕነና ኦ ኣቦና፥ ካብ ማእኸል ኣህዛብ ከዓ ኣኻኽበና፤ ንቅዱስ ስምካ ምእንቲ ኽነመስግን፥ ብውዳሴኻ ኸዓ ምእንቲ ኽንሕጐስ።

ኣቦ እስራኤል ካብ ዘለኣለም ክሳዕ ዘለኣለም ቡሩኽ ይኹን! ኵሎም ህዝቢ ድማ “ኣሜን!” ይበሉ። ሃሌ ሉያ!