Urukundo rwe ruhoraho ntiruzashira

Amateka amwe aturutse ku rundi ruhande, nk'iyaturo. Bibagiwe ku nyanja, bagira irari mu butayu, bakora ikimasa, batamba abana babo. Kenshi na kenshi Data yabagabije mu maboko y'abanzi, akumva gutaka kwabo, akazirikana Isezerano rye nyamara.

Igice cya 106.

Haleluya! Nimushimire Data wa twese kuko agira neza; urukundo rwe rw'Isezerano ruhoraho iteka ryose.

Ni nde ushobora kuvuga ibikomeye Data wa twese yakoze, cyangwa agatangaza ishimwe rye ryose? Hahirwa abakurikiza ubutabera, bahora bakora ibikwiye.

Unyibuke, Data, ukangirira neza nk'uko ugirira abantu bawe; unzanire agakiza kawe, kugira ngo mbone ubukungu bw'abo watoranyije, nishimira umunezero w'ihanga ryawe, kandi nishimane n'umurage wawe.

Twakoze ibyaha nk'uko ba sekuruza bakoze; twaracumuye, twakoze iby'ubugome. Igihe ba sekuruza bari mu Misiri, ntibazirikanye ibitangaza byawe; ntibibuka ubwinshi bw'urukundo rwawe rw'Isezerano, ahubwo bagomera ku nyanja, ku Nyanja Itukura. ^a Nyamara arabakiza ku bw'izina rye, kugira ngo amenyekanishe imbaraga ze zikomeye. Acyaha Inyanja Itukura, nayo irakama; abanyuza mu mazi maremare nk'aho banyura mu butayu. Arabakiza akabakura mu kuboko kw'uwabangaga, arabacungura akabakura mu kuboko kw'umwanzi. Amazi arengera abanzi babo; nta n'umwe muri bo wasigaye. Nuko bemera amagambo ye; baririmba ishimwe rye.

Ariko bidatinze bibagiwe ibyo yakoze; ntibategereza inama ye. Mu butayu bagwa mu irari, kandi mu gasi bagerageza Data wa twese. Nuko abaha ibyo basabye, ariko abatera indwara yo kuzongwa. Mu nkambi bagirira ishyari Musa, na Aroni, uwera wa Data wa twese. Isi irasāma imira Datani, kandi ipfundikira itsinda rya Abiramu. Umuriro uraka utwika itsinda ryabo; ururimi rw'umuriro rutwika abanyabyaha.

I Horebu bakora inyana, bikubita imbere y'ishusho bacuze mu cyuma. Ikuzo ryabo bariguranye ishusho y'ikimasa kirya ibyatsi. Bibagiwe Data wa twese, Umukiza wabo, wakoze ibikomeye mu Misiri, ibitangaza mu gihugu cya Hamu, ibikorwa biteye ubwoba ku Nyanja Itukura. ^b Nuko avuga ko agiye kubarimbura, iyaba Musa uwo yatoranyije atahagararaga mu cyuho imbere ye, ngo ahindure uburakari bwe butabarimbura.

Nuko basuzuguje igihugu cyiza; ntibemera isezerano rye. Bitotombera mu mahema yabo ntibumvira ijwi rya Data wa twese. Nuko arambura ukuboko kwe ararahira, ko bazagwa mu butayu, ko urubyaro rwabo ruzagwa mu mahanga kandi akabatatanyiriza mu bihugu.

Bīyoka kuri Bāli ya Pewori maze barya ibitambo byatuwe imana zitagira ubuzima. Bamutera uburakari n'ibikorwa byabo, maze icyorezo kibasānga. Ariko Finehasi arahaguruka aragoboka, nuko icyorezo gihagarara. Byamubarirwe nk'ubutungane, mu bisekuruza byose iteka ryose. Ku mazi ya Meriba baramurakaza, maze Musa bimugendekera nabi kubera bo, kuko bagize umwuka we usharira, maze avuga atabitekereje.

Ntibarimbuye amahanga, nk'uko Data wa twese yari yabategetse, ahubwo bivanze n'amahanga, maze biga imigenzereze yabo. Bakorera ibigirwamana byabo, bibabera umutego. Batamba abahungu babo n'abakobwa babo, babaterekera ingabo za Satani. Bavushije amaraso y'inzirakarengane, amaraso y'abahungu babo n'abakobwa babo, abo batambiye ibigirwamana bya Kanāni, maze igihugu gihumanye n'amaraso. Bihumanya n'ibikorwa byabo, basambana mu migenzereze yabo.

Nuko uburakari bwa Data wa twese buraka ku bwoko bwe, aranga umurage we. Abagabiza amahanga, ababangaga barabategeka. Abanzi babo barabarenganya, baba munsi y'ubutware bwabo. Kenshi yarabakijije, ariko mu migambi yabo yose biyemeje kwigomeka, bakarushaho kurohama mu byaha byabo. Nyamara yitegereje umubabaro wabo ubwo yumvaga gutakamba kwabo. Yibutse Isezerano rye ku bwabo, yisubiraho akurikije ubwinshi bw'urukundo rwe rudahemuka. Atuma ababajyanye ho iminyago bose babagirira impuhwe.

Dukize, Data wa twese, udukusanye udukuye mu mahanga, kugira ngo dushimire izina ryawe ryera, twishimane mu kugusingiza.

Hasingizwe Data w'Isiraheli, guhera iteka ryose kugeza iteka ryose! Kandi abantu bose nibavuge bati: “Amina!” Haleluya!