Gaarummaan Isaa Bara Baraan in Jiraata

Seenaan wal-fakkaatu garaa biraa irraa, amantaa himachuu dha. Galaana irratti dagatan, gammoojjii keessatti hawwan, jabbii tolfatan, ijoollee mataa isaanii aarsaa godhan. Altokko altokkoon Abbaan keenya isaan dabarsee kenne, iyya isaanii dhaga'e, ta'ellee kakuu isaa yaadate.

Boqonnaa 106.

Halleluuyaa! Abbaa keenyaaf galata galchaa, inni gaarii waan ta'eef; gaarummaan kakuu isaa bara baraan in jiraata.

Hojii jabaa Abbaa keenyaa eenyutu odeessuu danda'a, yookaan galata isaa hunda labsuu danda'a? Warri murtii eegan, yeroo hundumaa waan qajeelaa hojjetanis eebbifamoo dha.

Yaa Abbaa keenya, tola ati saba keetiif agarsiistuun na yaadadhu; fayyisuu keetiin gara koo kottu, akka ani badhaadhina warra ati filatte arguuf, gammachuu saba keetiin gammaduuf, dhaala kee wajjin ililchuuf.

Nuti akkuma abbootii keenyaa cubbuu hojjenne; jal'ina hojjenne, hammeenya hojjenne. Yeroo abbootiin keenya Gibxi keessa turanitti, dinqiiwwan kee hin hubanne; baay'ina gaarummaa kakuu kee hin yaadanne, garuu galaana biratti, Galaana Diimaa biratti fincilan. ^a Ta'us inni maqaa isaaf jedhee, humna isaa jabaa beeksisuuf isaan fayyise. Galaana Diimaa ittiin do'e, galaanichis goge; bishaan gad-fageenya keessa akka gammoojjii keessa isaan geggeesse. Harka isa isaan jibbu keessaa isaan fayyise, harka diinaa keessaas isaan fure. Bishaan diinota isaanii haguuge; isaan keessaa tokkollee hin hafne. Yommus dubbii isaa amanan; galata isaa faarsan.

Garuu hojii isaa dafanii irraanfatan; gorsa isaaf hin eegganne. Lafa onaa keessatti hawwiin of kennan, gammoojjii keessattis Abbaa keenya qoran. Kanaaf waan kadhatan isaanii kenne, garuu dhukkuba dadhabsiisu isaan gidduutti erge. Qubata keessatti Musee irratti, Aaron isa Abbaa keenyaa qulqulluu irrattis hinaaffan. Lafti banamtee Daataanin liqimsite, gareen Abiraam irrattis haguugte. Ibiddi garee isaanii irratti bobba'e; arrabni ibiddaa hamoota gubate.

Horeeb irratti jabbii tolchanii, fakkii sibiilaa baqfame sagadan. Ulfina isaanii fakkii sangaa citaa nyaatu waliin jijjiiran. Abbaa keenya, fayyisaa isaanii irraanfatan, isa Gibxi keessatti waan guddaa hojjete, lafa Haam keessatti dinqii, Galaana Diimaa biratti hojii sodaachisaa. ^b Kanaaf isaan balleessuuf jedhe; garuu Musee isa filatame isaa cabiinsa keessa dhaabbate, isa dura dheekkamsa isaa isaan balleessuu irraa deebisuuf.

Yommus lafa gaarii tuffatan; waadaa isaa hin amananne. Dunkaana isaanii keessatti gurmuuftan, sagalee Abbaa keenyaa hin dhaggeeffanne. Kanaaf harka isaa ol fudhatee kakate, akka isaan gammoojjii keessatti kuffisu, akka sanyii isaanii saboota gidduutti kuffisu, biyyoota keessa hundatti isaan facaasuuf.

Baal-Pe'ooriitti of hidhan, aarsaa waaqota lubbuu hin qabneef dhiheeffames nyaatan. Hojii isaaniitiin isa dheekkamsiisan, dhukkubni daddarbaan isaan gidduutti bobba'e. Garuu Fiinhaas ka'ee gidduu seene, dhukkubichis dhaabbate. Kunis qajeelummaa ta'ee isatti lakkaa'ame, dhaloota hundumaaf bara baraan. Bishaan Meribaa biratti isa aarsan, Musee irrattis sababii isaaniitiin wanti hamaan ta'e, waan hafuura isaa hadhaa'aniif, inni dubbii of hin eegne dubbate.

Saboota hin balleessine, akkuma Abbaan keenya isaan ajajetti, garuu saboota wajjin makamanii gochaa isaanii baratan. Waaqota tolfamoo isaanii tajaajilan, kunis kiyyoo isaaniif ta'e. Ilmaan isaanii fi intallan isaanii jinnootaaf aarsaa dhiheessan. Dhiiga balleessaa hin qabne dhangalaasan, dhiiga ilmaan isaanii fi intallan isaanii, warra waaqota tolfamoo Kana'aaniif aarsaa dhiheessan; lafti dhiigaan xureeffamte. Gochaa isaaniitiin xuraa'an, hojii isaaniitiin shaaramtoo ta'an.

Kanaaf dheekkamsi Abbaa keenyaa saba isaa irratti ho'e, dhaala isaas jibbe. Saboota harkatti isaan kenne, warri isaan jibbanis isaan bulchan. Diinonni isaanii isaan cunqursan, humna isaanii jalatti galan. Yeroo baay'ee isaan oolche, garuu karoora isaanii hundumaan fincilaaf murteeffatan, cubbuu isaanii keessattis gad bu'an. Ta'us yeroo iyya isaanii dhaga'e, rakkina isaanii ilaale. Isaaniif jedhee kakuu isaa yaade, baay'ina gaarummaa isaa amanamaa akkuma ta'etti garaa jijjiirate. Warra isaan booji'e hundumaa akka isaan irratti garaa laafan godhe.

Yaa Abbaa keenya, nu fayyisi, saboota gidduudhaa nu walitti qabi, akka maqaa kee qulqulluuf galata galchinuuf, galata keetiinis gammannuuf.

Abbaan Israa'el bara baraa irraa hanga bara baraatti eebbifamaa haa ta'u! Namni hundumas «Ameen!» haa jedhu. Halleluuyaa!