Laa 105

105 ¹Ithumwui Avāli ningkashi milu; awui mingli ngakaolu; mibing ngachaili awui otsak theingasaklu. ²Ali laa sālu, ali masotlaa sālu; awui matakhak kahai otsak saikora hāngmilu. ³Awui kathara amingli tekmateiranu; ithumwui Avāli kaphābingwui ning mathānranu. ⁴Ithumwui Avā kala awui pangshap phālu; awui mai phāchinglu.

⁵Ana sākahai matakhak kahai ot, awui maphaningkharar otsak, kala ana hangtā kahai mashun bichar saikora phaningunglu, ⁶O Abrahamwui naothei, awui rao, Jacobwui naomayarabing, awui kapangkakhuibing. ⁷A ithumwui Avāna; okathui hupta awui bichar eina pemtinghai.

⁸Awui tuingashit katang makhavai phaningunga, thot thingkhali ana kaso kahai tui, ⁹Abrahamli tuingashit sākahai, Isaacli ngashitsang kahai, ¹⁰awui shiyan sāda Jacobli hangkhami, Israelli katang makhavai tuingashit thada,

¹¹hānga, "Nathumli Canaan ngalei chi nathumwui shimlui thada ina mira."

¹²Athum mashing kateokha leitharan, panghomkha mangā, kala chi ngaleili kha̱mibing sāda, ¹³yur akhali eina yur akhali, wungram akha eina yur akha khavaili zatlakha, ¹⁴ana khipānakhala athumli mayansai ngasakmana; athumwui vang eina awunga kahaibingli kharara:

¹⁵"Iwui tharchisinmi kahaibingli masāphāphālu; iwui marānbingli sākashi masālu."

¹⁶Ana ngaleitungli chāmrei rāngasaka, kala athumwui kashakazā saikora katattāmi. ¹⁷Ana athumwui mangāli mi akha, rao thāda yorsang kahai Josephli chihovā kahaina. ¹⁸Athumna awui phei khānghui eina ngakhai; awui kahung mari eina narngasaka, ¹⁹awui tui shokkahai eina tangda, ithumwui Avāwui tuina ali mashunga da chitheihaira. ²⁰Awungana ali ahokhuilaga chihomihaowa; mibingwui khamungana ali ningkhān ngasaka. ²¹Awungana Josephli ashi shimwui akhavā sāda, awui khalei saikorawuitungli mungkhavai khamunga sāngasaka, ²²chieina ana awungawui wungnaobingli ningkachāng thāda hāngchithei, kala awui khararnaobingli thangkhamei tamchitheira.

²³Chithāda Israel Egyptli latunga; Jacobna Hamwui ngaleili kha̱mi khangatei yaozatsai. ^a a v23 'Hamwui ngalei' hi Egyptwui vang khare atamwui laa ming akhana (verse 27lila khuiphunghaira). ²⁴Kala ithumwui Avāna awui mibingli chungmeida khamatai ngasaka, kala athumwui yangkashebing suitāda athumli pangmei sāngasaka. ²⁵Awui mibingli yangkharing khavai, awui raobingli makaphā ngarān khavai ana athumwui ning phanngasaka.

²⁶Ana awui rao Mosesli, kala ana kapangkhui kahai Aaronli chihovā. ²⁷Athumna awui khudambing athumwui alungli sāchithei, kala Hamwui ngaleili awui matakhak kahai ot sāchithei. ²⁸Ana tangkhamang chihovāda ngalei tangmangting ngasaka, kala Moses eina Aaronna awui tuili mangakaishimana. ²⁹Ana athumwui tara̱ ashee onngasaka, kala athumwui khai shaothata. ³⁰Athumwui awungabingwui yipkhuili eina tangda athumwui ngalei khaifana pemhaowa. ³¹Ana hānga, kala hachāng sursur rai, kala tumit athumwui leiret peichaoda shoka. ³²Ana athumli zingrotwui mahutle theih mi, kala athumwui ngalei peichaoda meiwon mi. ³³Ana athumwui drakhārong kala khaorārong sāthata, kala athumwui ngaleiwui thingrong sākazammihaowa. ³⁴Ana hānga, kala khaoh rai, khaohnao mashānkharara, ³⁵kala athumna athumwui ngaleiwui thingnā-ra̱hā saikora shaihaira, kala athumwui luiwui eina samkaphang saikora zai. ³⁶Chieina ana athumwui yaronshap khaleiwui naopharat, athumwui ngaleili khalei naochizai kahaibingli shaothata.

³⁷Chieina ana Israelli lupā kala sinā eina thānshokmi, kala awui shangbing ngachaili khipākhala makongluimana. ³⁸Athum thuihaowa tharan Egyptna ringphāhaowa, kaja athumwui vang khangachee Egyptwuitungli tātunghaowa. ³⁹Ana muiyā akha kaluiphin khavai hamizata, kala ngayāshong kahor mikhavai mei mi. ⁴⁰Athumna poda, ana kongkui rāngasaka, kala kazingramwui kashakazā eina athumli ningyāng ngasaka. ⁴¹Ana lunghār shomi, kala tara̱ wokshoka; chi siwukli kong akha thāda longtai.

⁴²Kaja ana awui rao Abrahamli ngashit kahai kathara tui phaningunga. ⁴³Chithāda ana awui mibingli khamathān eina, awui kapangkhui kahaibingli laa eina thānshokmi. ⁴⁴Ana yurbingwui ngaleibing athumli mi, kala mi khangateibingna panglāk eina ot sākahai chi athumna yuikhui, ⁴⁵chieina athumna awui ain mayonra, kala awui shiyan mayonra. Proholi solu!