Bhajan Geet 105 FHB Father's Heart Bible™

105 ¹Amar Pitri ke dhanyabad dibi; Tar laga nam mati bi; manuh khan majot te Tar laga kaam khan janai dibi. ²Tar ke git gabi, Tar ke stuti git gabi; Tar laga sob asurit kaam khan laga kotha kobi. ³Tar laga pobitro nam te gorab koribi; amar Pitri ke bisara khan laga mon khushi hobi. ⁴Amar Pitri aru Tar laga takot ke bisaribi; Tar laga chehera hodai bisaribi.

⁵Tai pora kora asurit kaam khan, Tar laga chamatkar khan, aru Tai pora koi diya bisar khan yaad koribi, ⁶tumikhan, Tar laga noukar Abraham laga bacha khan, tumikhan, Tar pora basi luwa Jacob laga chokra khan. ⁷Tai amar Pitri ase; Tar laga bisar khan pura prithibi te bhorta ase.

⁸Tai Tar laga vachan hodai yaad kore, 1,000 purust khan karne Tai pora thik kora kotha tu, ⁹Abraham logot te Tai pora bona vachan, Isaac ke Tai pora kora kosom, ¹⁰jun tu Tai pora Jacob ke ekta niyom nisena pakka korise, Israel ke ananta vachan nisena,

¹¹koise, “Tumi ke Moi Canaan desh tumar uttoradhikar nisena dibo.”

¹²Jitia tarkhan ginti te komti thakise, matro olop, aru eitu desh te notun manuh thakise, ¹³ekta desh pora dusra desh te berai kene, ekta rajyo pora dusra desh te, ¹⁴Tai kun ke bhi tarkhan ke dukh dibole diya nai; tarkhan karne Tai raja khan ke gali dise:

¹⁵“Moi laga abhishek kora khan ke nachubi; Moi laga bhabobadi khan ke eku nuksan nakoribi.”

¹⁶Tai desh te akal anise aru tarkhan laga sob kha-luwa tu bondho kori dise. ¹⁷Tai tarkhan laga age te ekjon manuh ke pathai disile—Joseph, jun ke noukar nisena bikiri korise. ¹⁸Tarkhan loha laga rusi pora tar theng khan dukh dise; tar gola te loha lagai dise, ¹⁹tar kotha pura nohua homoi tak, amar Pitri laga kotha pora tai thik ase koi nadiya tak. ²⁰Raja pora tai ke mati pathaise aru tai ke chari dise; manuh khan laga raja pora tai ke azad kori dise. ²¹Raja pora Joseph ke tar nijor ghor laga malik bonaise, tar logot thaka sob uporte raja, ²²titia Joseph pora raja laga chokra khan ke tar itcha nisena sikhai dibole paribo aru tar bura manuh khan ke gyaan sikhabole paribo.

²³Titia Israel Egypt te ahise; Jacob Ham laga desh te notun manuh nisena thakise. ^a a v23 ‘Ham laga desh’ tu Egypt laga ekta purana kobita laga nam ase (27 number ayat te bhi cholaise). ²⁴Aru amar Pitri pora Tar manuh khan ke bisi barhai dise, aru tarkhan laga dushman khan pora bhi takot bonaise. ²⁵Tai tarkhan laga mon ke Tar manuh khan ke ghin koribole, Tar noukar khan birodh te chalaki koribole ghurai dise.

²⁶Tai Tar noukar Moses ke pathaise, aru Tai pora basi luwa Aaron ke. ²⁷Tarkhan tarkhan majot te Tar laga chihna khan dikhaise, Ham laga desh te Tar laga asurit kaam khan. ²⁸Tai andhar pathaise aru desh ke andhar bonaise, aru Moses aru Aaron Tar laga kotha birodh te uthi juwa nai. ²⁹Tai tarkhan laga pani ke khoon bonaise aru tarkhan laga maas khan ke morai dise. ³⁰Tarkhan laga desh te bengh khan bhorta hoise, tarkhan laga raja khan laga ghumai kora kamra te bhi. ³¹Tai koise, aru makhi laga jhaak khan ahise, aru tarkhan laga pura desh te chutu poka khan. ³²Tai tarkhan ke borun bodli te borop pathar dise, aru tarkhan laga pura desh te jui laga lok dise. ³³Tai tarkhan laga angur aru dimoru ghas khan ke marise aru tarkhan laga desh laga ghas khan bhangi dise. ³⁴Tai koise, aru phoring khan ahise, ginti kori nasaka jawan phoring khan, ³⁵aru tarkhan tarkhan laga desh laga sob ghas khai dise aru tarkhan laga kheti laga sob phol khai dise. ³⁶Titia Tai tarkhan laga desh te sob poila jonom luwa khan ke marise, tarkhan laga sob takot laga poila phol khan.

³⁷Titia Tai Israel ke chandi aru suna logote ulai anise, aru Tar laga jati khan majot te kun bhi girise nai. ³⁸Jitia tarkhan ulai jaise titia Egypt khushi hoise, kilemane tarkhan laga bhoi Egypt uporte girise. ³⁹Tai dhaki bole karne ekta badal tanise, aru rati te ujala dibole jui dise. ⁴⁰Tarkhan mangise, aru Tai pokhi anise, aru sorgo laga rooti pora tarkhan laga pet bhorai dise. ⁴¹Tai pathor khuli dise, aru pani ulai ahise; eitu nodi nisena balu-mati te boi jaise.

⁴²Kilemane Tai Tar laga noukar Abraham ke diya pobitro vachan yaad korise. ⁴³Titia Tai Tar manuh khan ke khushi logote ulai anise, Tar pora basi luwa khan ke git logote. ⁴⁴Tai tarkhan ke desh khan laga mati dise, aru dusra manuh khan pora mehnat kora jinis khan tarkhan loi loise, ⁴⁵titia tarkhan Tar laga niyom khan rakhibo aru Tar laga kanun khan mani lobo. Halleluya!