Kwupụta Ihe O Mere

A kọghachiri ọgbụgba ndụ ya na Ebraham dị ka usoro nkwa e debere: Josef nọ n'ígwè ruo mgbe okwu ya mezuru, ihe otiti dakwasịrị Ijipt, e wee kpọpụta otu ndị nwere ọlaọcha na abụ, ọ dịghị otu n'ime ha sụrụ ngọngọ. Isi okwu ya site na mbụ ruo n'ikpeazụ bụ Nna na-echeta.

Isi 105.

Nyenụ Nna anyị ekele; kpọkuonu aha ya; meenụ ka a mara ọrụ ya nʼetiti ndị mmadụ. Bụkuonu ya abụ, bụọnụ abụ otuto nye ya; kọọnụ banyere ọrụ ebube ya niile. Nyaanụ isi nʼaha nsọ ya; ka obi ndị na-achọ Nna anyị ṅụrịa ọṅụ. Chọọnụ Nna anyị na ike ya; na-achọnụ ihu ya mgbe niile.

Chetanụ ọrụ ebube o meela, ọrụ ịtụnanya ya, na ikpe o kwupụtara, unu ụmụ Ebraham, bụ ohu ya, unu ụmụ Jekọb, ndị ọ họpụtara. Ọ bụ Nna anyị; ikpe ya jupụtara nʼụwa niile.

Ọ na-echeta ọgbụgba ndụ ya ruo mgbe ebighị ebi, bụ okwu o nyere iwu maka ọgbọ puku, ọgbụgba ndụ ya na Ebraham gbara, ịṅụ iyi ọ ṅụụrụ Aịzik, nke o mesiri ike nye Jekọb dịka ụkpụrụ, nye Izrel dịka ọgbụgba ndụ ebighị ebi,

na-asị, “Aga m enye gị ala Keenan ka ọ bụrụ ihe nketa gị.”

Mgbe ha dị ole na ole nʼọnụọgụgụ, naanị mkpụrụ aka, bụrụkwa ndị ọbịa nʼime ya, na-awagharị site na mba ruo na mba, site nʼotu alaeze ruo na mba ọzọ, o kweghị ka onye ọbụla megbuo ha; nʼihi ha ọ baara ndị eze mba:

“Emetụkwala ndị m e tere mmanụ aka; emekwala ndị amụma m ihe ọjọọ.”

Ọ kpọbatara ụnwụ nʼala ahụ ma bipụ nri ha niile. O zipụworo otu nwoke ka ọ buru ha ụzọ—Josef, onye e rere dịka ohu. Ha ji mkpọrọ igwe merụọ ụkwụ ya; e jiri igwe kechie olu ya, ruo mgbe okwu ya mezuru, ruo mgbe okwu Nna anyị gosiri na o kwuru eziokwu. Eze ahụ ziri ozi kpọọ ya ma tọpụ ya; onye na-achị ndị mmadụ meere ka o nwere onwe ya. Eze ahụ mere Josef onyenwe ụlọ ya, onye na-achị ihe niile o nwere, ka Josef wee nwee ike ịdọ ụmụ eze aka na ntị dịka o si masị ya ma kuziere ndị okenye ya amamihe.

Mgbe ahụ Izrel batara nʼIjipt; Jekọb bikwara dịka onye ọbịa nʼala Ham. ^a Nna anyị mekwara ka ndị ya mịa mkpụrụ nke ukwuu, ma mee ka ha dị ike karịa ndị iro ha. O mere ka obi ha gbanwee kpọọ ndị ya asị, ka ha gbaa izu megide ndị ohu ya.

O zipụrụ Mosis, bụ ohu ya, na Erọn onye ọ họpụtara. Ha gosipụtara ihe ịrịbaama ya nʼetiti ha, ọrụ ebube ya nʼala Ham. O zipụrụ ọchịchịrị mee ka ala ahụ gbaa ọchịchịrị, Mosis na Erọn enupụghịkwa isi megide okwu ya. Ọ gbanwere mmiri ha ka ọ ghọọ ọbara ma gbuo azụ ha. Ala ha jupụtara nʼawọ, ọ bụladị nʼime ọnụ ụlọ ihi ụra nke ndị eze ha. O kwuru okwu, igwe ijiji wee bịa, na anwụnta nʼoke ala ha niile. O nyere ha mkpụrụ mmiri igwe nʼọnọdụ mmiri ozuzo, na ọkụ na-enwu enwu nʼala ha niile. O tidara osisi vaịn ha na osisi fiig ha ma kụjie osisi niile nke ala ha. O kwuru okwu, igurube wee bịa, ụmụ igurube nke a na-apụghị ịgụta ọnụ, ha richapụrụ ahịhịa niile dị nʼala ha ma richaa mkpụrụ niile nke ubi ha. Mgbe ahụ o tidara ụmụ niile e buru ụzọ mụọ nʼala ha, bụ mkpụrụ mbụ nke ike ha niile.

Mgbe ahụ o mere ka Izrel pụta chịrị ọlaọcha na ọlaedo, ọ dịghịkwa onye sọ ngọngọ nʼetiti ebo ya niile. Obi tọrọ Ijipt ụtọ mgbe ha pụrụ, nʼihi na egwu ha adakwasịla Ijipt. Ọ gbasara igwe ojii ka ọ bụrụ ihe mkpuchi, na ọkụ inye ìhè nʼabalị. Ha rịọrọ, o wetakwara nnụnụ kweel, ma jiri achịcha si nʼeluigwe mee ka afọ ju ha. O meghere nkume ahụ, mmiri wee sọpụta; ọ na-asọgharị nʼọzara dịka osimiri.

Nʼihi na o chetara nkwa nsọ ya o kwere Ebraham, bụ ohu ya. Ya mere o mere ka ndị ya jiri ọṅụ pụta, ndị ọ họpụtara jiri abụ pụta. O nyere ha ala nke mba dị iche iche, ha wee nwetara ihe ndị ọzọ dọgburu onwe ha nʼọrụ maka ya, ka ha wee debe ụkpụrụ ya ma na-edebe iwu ya. Haleluya!