Lee ka ọrụ gị si dị ọtụtụ

Njem n'ụwa na-arụ ọrụ: isi iyi na ndagwurugwu, nnụnụ na-akwụ akwụ n'alaka osisi, ọdụm na-achụ nta n'abalị, ndị mmadụ na-apụ ọrụ n'isi ụtụtụ, ụgbọ mmiri n'oké osimiri, na Leviatan e mere ka ọ na-egwu egwu n'ebe ahụ. Ihe ndị a niile ji ọnụ ghere oghe na-echere Nna anyị ka o mejupụta ha.

Isi 104.

Mkpụrụobi m, too Nna anyị. Nna m, ị dị ukwuu nke ukwuu; i yikwasịla ịma mma na ebube.

O ji ìhè kpuchie onwe ya dịka uwe; ọ na-agbasa eluigwe dịka ụlọ ikwu. Ọ na-atụ osisi ndoro ụlọ elu ya nʼelu mmiri; o mere igwe ojii ụgbọ ịnyịnya ya; ọ na-eje ije nʼelu nku ifufe. O mere ifufe ndị ozi ya, ire ọkụ ka ọ na-eme ndị odibo ya. ^a

O guzobere ụwa nʼelu ntọala ya, ka ọ gharakwa inigharị ruo mgbe ebighị ebi. I ji ogbu mmiri kpuchie ya dịka uwe; mmiri ahụ guzoro nʼelu ugwu niile. Nʼihi ịba mba gị, ha gbara ọsọ; mgbe ha nụrụ ụda égbè eluigwe gị, ha gbapụrụ ọsọ ọsọ. Ugwu niile biliri elu, ndagwurugwu niile rịdara gbadaa ruo nʼebe ahụ i debeere ha. I zubere oke ha na-apụghị ịgafe, ka ha ghara ikpuchikwa ụwa ọzọ.

Ị na-eme ka isi iyi na-asọpụta na ndagwurugwu; ha na-asọ gafee nʼetiti ugwu niile. Ha na-enye anụ ọhịa niile mmiri ọṅụṅụ; ịnyịnya ibu ọhịa na-aṅụ mmiri ruo akpịrị ịkpọ nkụ ha. Nʼakụkụ ha ka ụmụ nnụnụ nke eluigwe na-ewu akwụ ha; ha na-abụ abụ nʼetiti alaka osisi. Ọ na-esi nʼụlọ elu ya na-agba ugwu niile mmiri; mkpụrụ nke ọrụ gị na-emeju ụwa afọ. Ọ na-eme ka ahịhịa too maka anụ ụlọ, na ihe ọkụkụ maka ka mmadụ kọọ, na-eweta nri site nʼime ala, na mmanya ga-eme ka obi mmadụ ṅụrịa, mmanụ ga-eme ka ihu ya na-egbuke egbuke, na achịcha ga-enye obi mmadụ ike. A na-agba osisi nke Nna anyị mmiri nke ukwuu, bụ osisi sida nke Lebanọn nke o kụrụ. Nʼelu ha ka ụmụ nnụnụ na-ewu akwụ ha; nnụnụ ụgbala nwere ụlọ ya nʼelu osisi fia. Ugwu niile dị elu bụ nke ewu ọhịa; oké nkume niile bụ ebe mgbaba maka anụ na-ezo nʼoké nkume.

O mere ọnwa iji gọsi oge niile; anyanwụ maara oge ọ na-ada. Ị na-eme ka ọchịchịrị dị, ọ bụrụkwa abalị, mgbe anụ ọhịa niile na-akpụgharị. Ụmụ ọdụm na-agbọ ụja maka anụ ha ga-eri, na-achọ nri ha site nʼaka Nna anyị. Mgbe anyanwụ wara, ha na-ezo pụọ laa dinaa nʼọgba ha. Mmadụ na-apụ gaa nʼọrụ ha na nʼịdọgbu onwe ha nʼọrụ ruo mgbe uhuruchi.

Lee ka ọrụ gị si dị ọtụtụ, Nna anyị! I ji amamihe mee ha niile; ihe niile i kere eke jupụtara nʼụwa. Lee oke osimiri, nke buru ibu ma saa mbara, nke jupụtara nʼanụ a na-apụghị ịgụta ọnụ, ihe ndị dị ndụ, ma ndị nta ma ndị ukwu. Nʼebe ahụ ka ụgbọ mmiri na-aga na-alọghachi, na Leviatan, bụ nke i kpụrụ ka ọ na-egwuri egwu nʼime ya. ^b

Ihe ndị a niile na-ele anya gị ka i nye ha nri ha nʼoge kwesịrị ekwesị. Mgbe i na-enye ha ya, ha na-achịkọta ya; mgbe i meghere aka gị, afọ na-eju ha nʼihe ọma. Mgbe i zoro ihu gị, ụjọ na-atụ ha; mgbe i napụrụ ha nkuume ha, ha na-anwụ laghachi nʼaja ha. Mgbe i zipụrụ Mmụọ gị, e kere ha eke, ị na-emekwa ihu ala dị ọhụrụ ọzọ.

Ka ebube Nna anyị dịgide ruo mgbe ebighị ebi; ka Nna anyị ṅụrịa nʼọrụ ya niile. Ọ na-ele ụwa anya ọ na-amakwa jijiji; ọ na-emetụ ugwu niile aka ha na-akwụpụta anwụrụ ọkụ.

Aga m abụku Nna anyị abụ ogologo ndụ m niile; aga m abụku Nna anyị abụ otuto ruo mgbe m ka dị ndụ. Ka ntụgharị uche m tọọ ya ụtọ, nʼihi na ana m aṅụrị ọṅụ nʼime Nna anyị. Ka e kpochapụ ndị mmehie site nʼụwa, ka ndị ajọ omume ghara ịdịkwa ọzọ. Mkpụrụobi m, too Nna anyị. Haleluya!