Wungva̱-Wungvā 19

19 ¹Chi atambingli Israelli awunga maleisā. Ephraimwui ngachakyāng kahai kaphungramli khalei Levinao akhana Judah ngaleiwui Bethlehemwui eina ashāmva̱ akha khuihaowa. ²Awui ashāmva̱na ali ning makatong otsak sāhaida, Judah ngaleiwui Bethlehemli khalei avāwui shimli ali horhailaga unghaowa, kala chili kachāng mati pamsai. ³Awui agaharana awui lungli matui khavai kala ali khuirālui khavai awui rao kala gadhā khani ngasoda ali kharomvai. Ana ali avāwui shimli khuirai, kala sha̱naowui avāna ali samphangda ringphāhaowa. ⁴Awui makva sha̱naowui avāna ali pamsang khavai poi, kala a ali ngasoda kathumthang pamsai; athumna phāshak phāzai, kala chili ngayaipisai.

⁵Khamatethang athumna ngathorthak thuida, kala a zat khavai ngakarthui. Kha sha̱naowui avāna awui makvāli hānga, "Kashakazā kateokha zālaga, chithākha zatlu." ⁶Ani khani ngasoda pamda phāshak phāzai. Sha̱naowui avāna mi chili hānga, "Ina nali kapona, aja ngayā ngasāmkhuilu, kala nawui ning ringphāsaklu." ⁷Mi chi zat khavai ngakarthui, kha awui makvāna ali poi, chiwui vang eina a chili latluida ngayā ngasāmkhui. ⁸Kaphangāthang a zat khavai ngathorthak thui; sha̱naowui avāna hānga, "Ina nali kapona, nakhalatta pingngasakkhuilu, kala kazing yinguki atam eina tangda ngaraisālu." Chieina ani khanina phāzai. ⁹Mi chi awui ashāmva̱ kala awui rao ngasoda zat khavai ngakarthui tharan, awui makva, sha̱naowui avāna hānga, "Yanglu, kazing yingnaikhaya; aja ngayā ngasāmkhuilu. Yanglu, kazing yinghaira; hili ngasāmkhuida nakhalatta ringphākhuilu. Akhama ngathorthak thuilaga, nawui shongfali zatlaga, nawui shimli ungulu." ¹⁰Kha mi chi ngayā ngasāmkhui khavai mamayāthuwa; a ngakarthuida zathuwa, kala awui gadhā khani shaksākhuida awui ashāmva̱ ngasoda, Jebus (chiya Jerusalem) chiwui kāroda vāshunga. ¹¹Athumna Jebus nganailakha kazing yingnaikhaya tharan, raopāna awui akhavāli hānga, "Rālu, ina nali kapona, Jebusnaobingwui keinung hili ngareiunglaga ngayā ngasāmkhuira."

¹²Awui akhavāna ngahānkai, "Israelwui naomayara maleilui kha̱mi keinungli ithum mangareiungmara; ithum Gibe-ahli tangda vāra." ¹³Ana awui raopali hānga, "Rālu, hi apambing hiwui akhali ithum vāshunglaga, Gibe-ahli nilala Ramahli nilala ngayā ngasāmkhuira." ¹⁴Chieina athumna athumwui shongfali zatuwa, kala Benjaminli khalei Gibe-ah nganaili athumli zimik tunga. ¹⁵Athumna Gibe-ahli ngayā ngasāmkhui khavai ngareiunga. A vāzangda keinung yāngreili pama, kha ngayā ngasāmkhui khavai athumli awui shimli khuirā khavai khipākhala maleimana.

¹⁶Ngazin eina kasarnao akhana luili awui ot eina latunga. A Ephraimwui kaphungramwui mina, kala Gibe-ahli kha̱mi khangatei ngasopama; kha apam chiwui mibing china Benjaminnaobingna. ¹⁷Kasarnao chi yangkakā tharan, keinung yāngreili ramkazata kha̱mi chili theida, ngahāna, "Na kali vākhala? Kala na kali eina rākhala?"

¹⁸Ana ali hānga, "Ithum Judahwui Bethlehemwui eina Ephraimwui katāva̱ kaphungramshong vākida; chi iwui shimna. Ina Judahwui Bethlehemli vaihaira, kala ara ithumwui Avāwui shimli vākida, kha khipānakha ili awui shimli makhuizangmana. ¹⁹Ithumwui gadhābingwui vang lanjila seizātla lei, kala iwui vang, narao sha̱naowui vang, kala naraobing eina khalei naopāwui vang, khamui kala ra̱shakla lei. Ithum khikha mavātmara."

²⁰Mi kasar china hānga, "Nawui vang chingrihairanu. Nawui darkar kasā saikora ina ngarumsangmira; kha yāngreili mapialu." ²¹Ana ali shimli khuirāhailaga, gadhābingli phazā khamihailaga, athumna phei pheohailaga, phazā phāshak sai.

²²Athumna athumwui ning thangmeida leilakha, kala yanglu, keinung chiwui makānkhanā makaphā mibingna shim chi rākuinamhailaga, khāmongli ngashumhaoda shim akhavā mi kasarpāli vaoda hānga, "Nawui shimli kazang mipā chi khuishoklu, ithum awuili ngasopi khavaina!"

²³Shim akhavā china kayangshong athumli shokta hānga, "Ngga, ichināngarā, mipā hi iwui shimli kavāhairawui vang, ina nathumli kapona, makaphā otsak masaalu; hikathā makhangatun ot masālu. ²⁴Yanglu, iwui kachingva̱ naongalāva̱ kala awui ashāmva̱ chi hili lei. Ina athumli khuirāphokra. Athumli sākhamāng sālu, nathumna kaphā thei chi athumli sālu, kha mipā hili hikathā makhangatun ot masālu."

²⁵Kha mibingna tui manganākhuimana. Chieina mipā china awui ashāmva̱li yonkhuilaga kayangshong athumli rāsha̱phokta; athumna ali chithang ngayā peichaoda kazing mathangranglakha eina tangda sākhamāng kala maishi ngasaka; chiwui thili ali chihohaowa. ²⁶Kazing kathang eina sha̱nao china rāhaida kazing kahor eina tangda awui akhavā khalei mipāwui shim khāmongli tāzanghaowa. ²⁷Kazing kathang eina awui akhavā ngakarthuida, shim khāmongbing shohailaga, awui shongfali vākhavai kayangshong shokhaowa. Yanglu, awui ashāmva̱ chi shim khanukshong tāzangda, apāng khāmongpheili haizangda ngaleopama. ²⁸Ana ali hānga, "Ngakarthuilu, zatusa." Kha khizakkha mangahānkāmana. Chieina ana ali gadhāli haizangta, kala shimli unghaowa.

²⁹Shimli ungshung tharan ana khainao khuilaga, awui ashāmva̱li yonkhuida, ali khara̱ khara̱da amalim tharāda khanida sātāhailaga, kala ali Israelwui leiret peichaoda chihovāhaowa. ³⁰Hi thei saikorana hānga, "Israelnaobing Egypt ngaleiwui eina kāphokhaiwui eina thuida aja zimiksho eina tangda hikathā ot akha mashokkahaimana kala matheimana. Hi machukkhuilu, ngazek ngaroklu kala matuilu."