Onidajọ 19

19 ¹Ní àwọn ọjọ́ wọ̀nyẹn, Israẹli kò ní ọba. Ọkùnrin ọmọ Lefi kan tí ó ń gbé ní ilẹ̀ olókè jíjìnnà ti Efraimu mú àlè kan láti Bẹtilẹhẹmu ní Juda. ²Àlè rẹ̀ ṣe àìṣòótọ́ sí i, ó sì fi í sílẹ̀ lọ sí ilé baba rẹ̀ ní Bẹtilẹhẹmu, Juda, ó sì wà níbẹ̀ fún oṣù mẹ́rin. ³Ọkọ rẹ̀ dìde, ó sì lépa rẹ̀, láti bá a sọ̀rọ̀ pẹ̀lẹ́pẹ̀lẹ́ kí ó sì mú un padà wá, ó mú ìránṣẹ́ rẹ̀ àti kẹ́tẹ́kẹ́tẹ́ méjì. Obìnrin náà sì mú un wá sí ilé baba rẹ̀, inú baba ọmọbìnrin náà sì dùn láti pàdé rẹ̀. ⁴Àna rẹ̀, baba ọmọbìnrin náà, rọ̀ ọ́ pé kí ó dúró, ó sì bá a gbé fún ọjọ́ mẹ́ta; wọ́n jẹun, wọ́n mu ọtí, wọ́n sì sùn níbẹ̀.

⁵Ní ọjọ́ kẹrin, wọ́n dìde ní kùtùkùtù, ó sì múra láti lọ. Ṣùgbọ́n baba ọmọbìnrin náà wí fún àna rẹ̀ pé, “Jẹ oúnjẹ díẹ̀, kí o tó lọ.” ⁶Àwọn méjèèjì jókòó, wọ́n jẹun, wọ́n sì jọ mu ọtí. Baba ọmọbìnrin náà wí fún ọkùnrin náà pé, “Jọ̀wọ́, dúró ní òru yìí kí inú rẹ sì dùn.” ⁷Ọkùnrin náà dìde láti lọ, ṣùgbọ́n àna rẹ̀ rọ̀ ọ́, ó sì tún sùn níbẹ̀ ní òru náà. ⁸Ní ọjọ́ karùn-ún, ó dìde ní kùtùkùtù láti lọ; baba ọmọbìnrin náà wí pé, “Jọ̀wọ́ mú ara rẹ lára le, kí o sì dúró di ọ̀sán.” Àwọn méjèèjì sì jẹun. ⁹Bí ọkùnrin náà ti dìde láti lọ, pẹ̀lú àlè rẹ̀ àti ìránṣẹ́ rẹ̀, àna rẹ̀, baba ọmọbìnrin náà, wí pé, “Wò ó, ọjọ́ ti fẹ́rẹ̀ẹ́ tán; dúró ní òru yìí. Wò ó, ọjọ́ ń wọ̀; sùn níbí kí inú rẹ sì dùn. Ní òwúrọ̀ ọ̀la, dìde ní kùtùkùtù, kí o sì máa bá ọ̀nà rẹ lọ ilé.” ¹⁰Ṣùgbọ́n ọkùnrin náà kọ̀ láti sùn ní òru náà; ó dìde, ó sì lọ, ó dé ọ̀kánkán Jebusi (èyí tí í ṣe Jerusalẹmu), pẹ̀lú kẹ́tẹ́kẹ́tẹ́ rẹ̀ méjì tí a dì ní gàárì àti àlè rẹ̀. ¹¹Nígbà tí wọ́n súnmọ́ Jebusi, tí ọjọ́ sì ti fẹ́rẹ̀ẹ́ lọ, ìránṣẹ́ náà wí fún ọ̀gá rẹ̀ pé, “Jọ̀wọ́ wá, jẹ́ kí a yà sí ìlú àwọn ará Jebusi yìí kí a sì sùn níbẹ̀.”

¹²Ọ̀gá rẹ̀ dáhùn pé, “Àwa kì yóò yà sí ìlú àjèjì tí kì í ṣe ti àwọn ọmọ Israẹli; àwa yóò máa lọ síwájú títí dé Gibeah.” ¹³Ó wí fún ìránṣẹ́ rẹ̀ pé, “Wá, jẹ́ kí a dé ọ̀kan nínú àwọn ibi wọ̀nyí kí a sì sùn ní Gibeah tàbí Ramah.” ¹⁴Wọ́n sì bá ọ̀nà wọn lọ, oòrùn sì wọ̀ fún wọn nígbà tí wọ́n súnmọ́ Gibeah ní ilẹ̀ Benjamini. ¹⁵Wọ́n yà sí ọ̀nà láti sùn ní Gibeah. Ó sì wọ inú ìlú, ó jókòó ní gbàgede ìlú, ṣùgbọ́n kò sí ẹni tí ó gbà wọ́n sí ilé rẹ̀ láti sùn.

¹⁶Arúgbó ọkùnrin kan sì ti ibi iṣẹ́ oko rẹ̀ bọ̀ ní ìrọ̀lẹ́. Ọkùnrin náà ti ilẹ̀ olókè Efraimu wá, ó sì ń gbé ní Gibeah bí àjèjì; àwọn ará ìlú náà jẹ́ ọmọ Benjamini. ¹⁷Arúgbó náà gbé ojú sókè, ó rí arìnrìn-àjò náà ní gbàgede ìlú, ó sì béèrè pé, “Níbo ni ìwọ ń lọ? Níbo sì ni ìwọ ti wá?”

¹⁸Ó dáhùn pé, “Àwa ń rìn-àjò láti Bẹtilẹhẹmu ní Juda lọ sí ilẹ̀ olókè jíjìnnà ti Efraimu—ibẹ̀ ni ilé mi. Mo lọ sí Bẹtilẹhẹmu ní Juda, báyìí mò ń lọ sí ilé Baba wa, ṣùgbọ́n kò sí ẹni tí ó gbà mí sí ilé rẹ̀. ¹⁹Àwa ní koríko gbígbẹ àti oúnjẹ fún àwọn kẹ́tẹ́kẹ́tẹ́ wa, àti oúnjẹ àti ọtí wáìnì fún èmi, ìránṣẹ́bìnrin rẹ, àti ọ̀dọ́mọkùnrin tí ó wà pẹ̀lú àwọn ìránṣẹ́ rẹ. Kò sí ohun tí ó kù fún wa.”

²⁰Arúgbó náà wí pé, “Àlàáfíà fún ọ. Èmi yóò pèsè gbogbo ohun tí o nílò; kìkì kí o má sùn ní gbàgede.” ²¹Ó mú un wá sí ilé rẹ̀, ó bọ́ àwọn kẹ́tẹ́kẹ́tẹ́, wọ́n sì wẹ ẹsẹ̀ wọn, wọ́n jẹun, wọ́n sì mu ọtí.

²²Bí inú wọn ti ń dùn, lójijì àwọn ọkùnrin búburú ní ìlú náà yí ilé náà ká, wọ́n ń lu ìlẹ̀kùn. Wọ́n sì kígbe sí arúgbó tí ó ni ilé náà pé, “Mú ọkùnrin tí ó wọ ilé rẹ jáde wá, kí àwa lè bá a lòpọ̀!”

²³Ọlọ́lá ilé náà jáde tọ̀ wọ́n, ó sì wí pé, “Rárá o, ẹ̀yin arákùnrin mi, mo bẹ̀ yín, ẹ má ṣe búburú, níwọ̀n bí ọkùnrin yìí ti wá sí ilé mi; ẹ má ṣe ohun ìtìjú yìí. ²⁴Wò ó, ọmọbìnrin mi wúńdíá àti àlè rẹ̀ ni èyí—jẹ́ kí n mú wọn jáde wá. Ẹ bà wọ́n jẹ́, ẹ ṣe ohunkóhun tí ó bá tọ́ lójú yín sí wọn, ṣùgbọ́n ẹ má ṣe ohun ìtìjú yìí sí ọkùnrin yìí.”

²⁵Ṣùgbọ́n àwọn ọkùnrin náà kò gbọ́. Nítorí náà ọkùnrin náà mú àlè rẹ̀, ó sì tì í jáde sí wọn; wọ́n fi ipá bá a lòpọ̀, wọ́n sì fìyà jẹ ẹ́ ní gbogbo òru títí di àfẹ̀mọ́júmọ́, lẹ́yìn náà wọ́n jọ̀wọ́ rẹ̀ lọ. ²⁶Nígbà tí ilẹ̀ mọ́, obìnrin náà wá, ó sì ṣubú ní ẹnu ọ̀nà ilé ọkùnrin náà, níbi tí ọ̀gá rẹ̀ wà, títí ojúmọ́ fi mọ́ kedere. ²⁷Ní àfẹ̀mọ́júmọ́, ọ̀gá rẹ̀ dìde, ó ṣí àwọn ìlẹ̀kùn ilé náà, ó sì jáde láti bá ọ̀nà rẹ̀ lọ—sì kíyèsi i, àlè rẹ̀ dùbúlẹ̀, ó ṣubú ní ẹnu ọ̀nà ilé náà, ọwọ́ rẹ̀ sì wà lórí ìloro ẹnu-ọ̀nà. ²⁸Ó wí fún un pé, “Dìde, jẹ́ kí a lọ.” Ṣùgbọ́n kò sí ìdáhùn. Nítorí náà ó gbé e lé orí kẹ́tẹ́kẹ́tẹ́, ó sì dojú ọ̀nà kọ ilé rẹ̀.

²⁹Nígbà tí ó dé ilé, ó mú ọ̀bẹ, ó di àlè rẹ̀ mú, ó gé e ní ẹ̀yà ara ní ẹ̀yà ara sí ọ̀nà méjìlá, ó sì rán an ká gbogbo ilẹ̀ Israẹli. ³⁰Gbogbo àwọn tí ó rí i wí pé, “Irú nǹkan báyìí kò tíì ṣẹlẹ̀ tàbí kí a rí i rí láti ìgbà tí àwọn ọmọ Israẹli ti gòkè ti Ejibiti wá títí di òní. Ẹ ronú rẹ̀, ẹ jíròrò rẹ̀, kí ẹ sì sọ̀rọ̀.”