ائسرایئلده پادشاه اولمایان گونلرده
آتامیزین اِوئنه گدن بئر لاوئلی قاچمیش جارئیه‌سئنی گری گتئرئر و اونو اِوئنه قبول اتمه‌یه حاضیر اولان آنجاق بئر قوجا یاد اِللی تاپیر. شهر آداملاری اِوی اَحاطه ادر؛ لاوئلی اونو ائشئیه ائته‌لَیئر. سحر آچیلاندا او، قاپینین آغزیندا یاتیر. او، اونو اون ائکی تئکه‌یه کسئر.
19 1او گونلرده ائسرایئلده پادشاه یوخ ائدی. اِفرایئمئن اوزاق داغلیق بؤلگه‌سئنده یاشایان بئر لاوئلی، یهودانین بیت‌لِحِم شهرئندن اؤزونه بئر جارئیه آلدی. 2جارئیه‌سی اونا خَیانت ادئب، اونو بوراخدی و یهودانین بیت‌لِحِم شهرئنده‌کی آتاسینین اِوئنه گتدی و اورادا دؤرد آی قالدی. 3اَری خئدمتچئسی و ائکی اِششَکله بئرلئکده، اونون اوره‌یئنه دانیشیب اونو گری قایتارماق اوچون دالیسیجا دوشوب گتدی. آرواد اونو آتاسینین اِوئنه گتئردی و قیزین آتاسی اونو گؤرنده سِوئندی. 4قایین‌آتاسی یعنی قیزین آتاسی اونو ساخلادی و او دا اوچ گون اونونلا قالدی؛ اورادا یِیئب-ائچدئلر و یاتدیلار.
5دؤردونجو گون سحر اِرکَن قالخدیلار و او گتمک اوچون دوردو. آمّا قیزین آتاسی کورَکنئنه ددی: «بئر آز چؤرک یِه، سونرا گت.» 6ائکئسی اوتوروب بئرلئکده یِیئب-ائچدئلر. قیزین آتاسی او آداما ددی: «لوطفن بو گجه قال و اوره‌یئن شاد اولسون.» 7او آدام گتمک اوچون دوردو، آمّا قایین‌آتاسی اونو مجبور اتدی و او گئنه اورادا گجه‌نی قالدی. 8بشئنجی گون گتمک اوچون سحر اِرکَن قالخدی؛ قیزین آتاسی ددی: «لوطفن اؤزونو قووّتلَندئر و گون‌اورتادان سونرایا کئمی گؤزله.» بله‌جه ائکئسی یدئلر. 9او آدام جارئیه‌سی و خئدمتچئسی ائله گتمک اوچون دوراندا، قایین‌آتاسی یعنی قیزین آتاسی ددی: «باخ، گون باتماغا آز قالیب؛ بو گجه قال. باخ، گون آخیر اولور؛ بورادا گجه‌له و کِفئنی چَک. صاباح تزدن قالخیب یولونا داوام ور و اِوئنه گت.» 10آمّا او آدام گجه‌نی قالماق ائستمه‌دی؛ قالخیب گتدی و پالانلانمیش ائکی اِششه‌یی و جارئیه‌سی ائله یِبوس یعنی اورشلئمئن قاباغینا گلدی. 11یِبوسا یاخینلاشاندا گون آز قالمیشدی باتسین؛ خئدمتچی آغاسینا ددی: «گل، لوطفن، بو یِبوسلولارین شهرئنه دؤنک و گجه‌نی اورادا قالاق.»
12آغاسی جاواب وردی: «ائسرایئل‌لی اولمایان یاد بئر شهره دؤنمه‌یه‌جیئک؛ گئبعایا کئمی گده‌جیئک.» 13خئدمتچئسئنه ددی: «گل، بو یرلردن بئرئنه چاتاق و گئبعادا یا رامادا گجه‌نی قالاق.» 14بله‌جه یوللارینا داوام وردئلر و بِنیامئنئن گئبعا شهرئنه یاخین گون اوستلرئنه باتدی. 15گئبعادا گجه‌نی قالماق اوچون او طرفه دؤندولر. او، ائچه‌ری گئرئب شهرئن میدانیندا اوتوردو، آمّا هچ کس اونلاری گجه‌نی قالماغا اؤز اِوئنه آپارمادی.
16آخشام چاغی بئر قوجا کئشی چؤلده‌کی ائشئندن گلئردی. او، اِفرایئمئن داغلیق بؤلگه‌سئندن ائدی و گئبعادا غرئب کئمی یاشاییردی؛ اورانین آداملاری بِنیامئنلی ائدئلر. 17قوجا کئشی باشینی قالدیریب شهرئن میدانیندا موسافئری گؤردو و سوروشدو: «هارایا گدئرسن؟ هارادان گلئبسن؟»
18او اونا ددی: «بئز یهودانین بیت‌لِحِم شهرئندن اِفرایئمئن اوزاق داغلیق بؤلگه‌سئنه سفر ادئریک؛ اورا منئم اِوئمدئر. من یهودانین بیت‌لِحِم شهرئنه گتمئشدئم و ائندی آتامیزین اِوئنه گدئرم، آمّا هچ کس منی اؤز اِوئنه آپارمیر. 19اِششَکلرئمئز اوچون هم سامان، هم ده یِم وار، هم ده منئم اوچون، کنئزئن اوچون و قوللارینلا اولان جاوان اوغلان اوچون چؤرک و شراب وار. هچ بئر اَسکئیئمئز یوخدور.»
20قوجا کئشی ددی: «سنه سلام اولسون. نه‌یه مؤحتاج‌سان، من تأمئن اده‌جیم؛ آنجاق گجه‌نی میداندا قالما.» 21اونو اؤز اِوئنه گتئردی، اِششَکلره یِم وردی و آیاقلارینی یویوب یِیئب-ائچدئلر.
22اونلار کِف چَکَرکَن، قَفلَتَن شهرئن یاراماز آداملاری اِوی موحاصئره‌یه آلدیلار و قاپینی دؤیوردولر. اِو صاحئبی اولان قوجا کئشئیه قیشقیریب ددئلر: «اِوئنه گئرن او آدامی اشئیه چیخارت کی، اونونلا یاتاق!»
23اِو صاحئبی اونلارین یانینا چیخیب ددی: «یوخ، قارداشلاریم، لوطفن پئسلئک اتمه‌یئن؛ مادام کی، بو آدام منئم اِوئمه گلئب، بو ائیرنج ائشی گؤرمه‌یئن. 24باخ، منئم باکئره قیزیم و اونون جارئیه‌سی بورادادیر؛ قوی اونلاری اشئیه چیخاردیم. اونلاری زورلایین، گؤزونوزده نه خوشدور، اونلارا اله ادئن، آمّا بو آداما بو ائیرنج ائشی گؤرمه‌یئن.»
25آمّا او آداملار قولاق آسمادیلار. اونا گؤره او آدام جارئیه‌سئنی توتوب اونلارا طرف اشئیه ائته‌له‌دی؛ اونلار دا بوتون گجه‌نی سحره قدر اونو زورلادیلار و اونا تَجاووز اتدئلر، سونرا اونو بوراخدیلار. 26سحر آچیلاندا آرواد گلئب، آغاسینین اولدوغو او آدامین اِوئنئن قاپیسی قاباغیندا ییخیلدی و گون آچیلانا قدر اورادا قالدی. 27سحر آغاسی قالخیب اِوئن قاپیلارینی آچدی و یولونا چیخماق اوچون اشئیه گلدی. باخ، جارئیه‌سی اِوئن قاپیسی قاباغیندا ییخیلمیش حالدا، اَللری ده آستانانین اوستونده ائدی. 28او اونا ددی: «قالخ، گدک.» آمّا جاواب اولمادی. بله‌جه او آدام اونو اِششه‌یئن اوستونه قویوب اِوئنه طرف یولا دوشدو.
29اِوئنه چاتاندا بئر بیچاق گؤتوردو، جارئیه‌سئنی توتوب اونو عضو-عضو اون ائکی پارچایا بؤلدو و اونو بوتون ائسرایئل تورپاغینا گؤندَ‌ردی. 30بونو گؤرنلرئن هامیسی ددی: «ائسرایئل مئصئردن چیخان گوندن بو گونه کئمی، بله بئر شی نه باش ورئب، نه ده گؤرونوب. بونو دوشونون، موباحئثه ادئن و دانیشین.»
