Judges 19 FHB Father's Heart Bible™

19 ¹Hei din khan te Israel te kono raja nathakise. Ephraim laga dur pahar desh te thaka ekjon Levi manuh pora Judah laga Bethlehem pora ekjon upo-potni loise. ²Tar laga upo-potni tu tar logote biswasghati korise, aru tar ke chari kene Judah laga Bethlehem te tar baba laga ghor te jai jaise, aru ta te char mahina thakise. ³Tar laga mota tu, tar mon te kotha kobole aru tar ke wapas anibole, tar laga noukar aru duita gadha loi kene tar piche jaise. Tai pora tar ke tai baba laga ghor te loi anise, aru hei chukri laga baba tar ke lok pai kene khushi hoise. ⁴Tar laga susur, hei chukri laga baba pora, tar ke thakibole koise, aru tai tar logote tin din thakise; tarkhan ta te khaise, pani khaise, aru ghumaise.

⁵Char number din te tarkhan phojur te uthise, aru tai jabole uthise. Kintu hei chukri laga baba pora tar jowai ke koise, “Olop roti kha, titia pichete jabi.” ⁶Hei dujon bohi kene, eke logote khaise aru pani khaise. Hei chukri laga baba pora hei manuh ke koise, “Anugrah kori kene, aji rati thaki jabi aru tumar mon ke khushi koribi.” ⁷Hei manuh jabole uthise, kintu tar susur pora tar ke rukhibole koise, karne tai aru ekbar ta te rati thakise. ⁸Panch number din te tai jabole phojur te uthise; hei chukri laga baba pora koise, “Anugrah kori kene nijor ke takot kori lo, aru dupor homoi tak rukhibi.” Karne hei dujon khaise. ⁹Hei manuh, tar upo-potni aru noukar loi kene jabole uthise, titia tar susur, hei chukri laga baba pora koise, “Sabi, din tu prai khotom hoise; rati thaki jabi. Sabi, din tu jai ase; yate thaki kene aram koribi. Kali phojur te uthi kene, rasta te jai kene, nijor ghor te jabi.” ¹⁰Kintu hei manuh rati thakibole mana korise; tai uthi kene, ulai kene, duita jin lagai diya gadha aru tar upo-potni loi kene Jebus (Jerusalem) laga samne te ahhise. ¹¹Jebus usor te, din tu prai khotom huabole, noukar pora tar malik ke koise, “Ahhibi, anugrah kori kene, amikhan eitu Jebusi sheher te ghusi kene rati thakibo.”

¹²Tar malik pora jawab dise, “Amikhan dusra desh laga sheher te, jun Israel laga nohoi, ta te nagusibo; amikhan Gibeah tak age jaibo.” ¹³Tai tar noukar ke koise, “Ahhibi, amikhan eitu jaga khan laga ekta te punchi kene Gibeah nahole Ramah te rati thakibo.” ¹⁴Karne tarkhan tarkhan laga rasta te jaise, aru Benjamin te thaka Gibeah usor te tarkhan uporte suruj tu bemai jaise. ¹⁵Tarkhan Gibeah te rati thakibole hudi jaise. Tai bhitor te jai kene sheher laga maidan te bohise, kintu kun manuh pora bhi tarkhan ke rati thakibole nijor ghor te loi juwa nai.

¹⁶Ekjon bura manuh saam homoi te kheti kaam pora ahhise. Tai Ephraim laga pahar desh pora thakise, aru bideshi hoi kene Gibeah te thakise; ta laga manuh khan Benjamin laga manuh thakise. ¹⁷Hei bura manuh pora upor te sai kene, sheher laga maidan te hei beraikena ja manuh ke dekhise, aru hudise, “Tumi kot te jai ase? Tumi kot pora ahhise?”

¹⁸Tai pora tar ke koise, “Amikhan Judah laga Bethlehem pora Ephraim laga dur pahar desh tak jai ase—eitu moi laga ghor ase. Moi Judah laga Bethlehem te jaise, aru etiya moi amar Pitri laga ghor te jai ase, kintu kun manuh pora bhi moi ke nijor ghor te loi loa nai. ¹⁹Amikhan laga gadha khan nimite bhuwa aru kha-luwa dunu ase, aru moi, tumar daski, aru tumar noukar khan logote thaka hei jawan manuh nimite bhi roti aru draksha ros ase. Amikhan eku komti nai.”

²⁰Hei bura manuh pora koise, “Tumi uporte shanti thaki bo. Tumi ki lage sob moi dibo; khali maidan te rati nathakibi.” ²¹Tai pora tar ke ghor te loi anise, gadha khan ke kha-luwa dise, aru tarkhan tarkhan laga theng dhui kene, khaise aru pani khaise.

²²Jitia tarkhan aram kori thakise, achanak hei sheher laga kaam nathaka manuh khan pora ghor tu gheri loise, aru dorja te mari thakise. Tarkhan ghor laga malik hei bura manuh ke hala kori koise, “Tumar ghor te ghusi juwa hei manuh ke bahar te anibi, titia amikhan tar logote shorir laga kaam koribo!”

²³Ghor laga malik pora tarkhan logote bahar te ulai kene koise, “Nai, moi laga bhai khan, anugrah kori kene biya kaam nakoribi kilemane eitu manuh moi laga ghor te ahhise; eneka sorom laga kaam nakoribi. ²⁴Yate moi laga chukri jun kitia bhi mota logote nathaka aru tar upo-potni ase—moi tai khan ke bahar te ani dibo. Tai khan ke sorom khila bi, tumikhan ke ki bhal lage tai khan logote eneka koribi, kintu eitu manuh logote eneka sorom laga kaam nakoribi.”

²⁵Kintu hei manuh khan huna nai. Karne hei manuh pora tar upo-potni ke dhori kene tarkhan logote bahar te thelai dise; tarkhan pora tai ke rati bhor phojur nahhua tak sorom khila kene dukh dise, titia pichete tai ke chari dise. ²⁶Phojur te hei maiki ahhi kene, tar malik thaka hei manuh laga ghor dorja te, ujala nahua tak giri thakise. ²⁷Phojur te tar malik uthi kene, ghor laga dorja khan khuli kene, tai laga rasta te bahar te ulaise—ta te tar upo-potni, ghor laga dorja te giri kene, hath khan dhoris te thaki kene soi thakise. ²⁸Tai pora tai ke koise, “Uthibi, amikhan jabo.” Kintu eku jawab nai. Karne tai pora tai ke gadha uporte rakhi kene nijor ghor te jaise.

²⁹Ghor te punchi kene tai pora ekta churi loi kene, tar upo-potni ke dhori kene, hath-theng hisab te kati kene baroh tukra korise, aru tai ke pura Israel laga desh sob jagate pathai dise. ³⁰Kun manuh khan pora eitu dekhise taikhan sob pora koise, “Israel Egypt pora ulai aha din pora aji tak eneka kaam kitia bhi huwa nai aru dekha bhi nai. Eitu bhabi sabi, eitu laga kotha koribi, aru kobi.”