Mi eng' bukuit

Kirwoogik 19 FHB Father's Heart Bible™

Kiistoi 15% eng' kiy ne iale korook →
Bukuit

Ye Ma Komi Laitoryat eng' Israel

Kagobendi Lawindet eng' ooreet koba kaap Kwandanyo, koweekta chebaigeiyandennyi ne ki te, ak konyoor agenge toondet ne po poiyot ne cham koteny ineendet. Kolong'e meng'iigap nganaseet koot; koroochi Lawindet kwonyooto saang'. Karon koru eng' kurgeet. Kotil ineendet kebeberwek taman ak aeng'.

Sura 19.

Eng' peetuusyechooto ko ma komi laitoryat eng' Israel. Ki nam Lawindet age ne menyei emetap tuloonoogap Ephraim ne loo chebaigeiyat ne po Beth-lehem-juda. Ki teweeri chebaigeiyandennyi, ak kobagaakta ineendet kwo kootap kwandanyi eng' Beth-lehem-juda, ak komeny arawek ang'wan. Ki ng'eet manong'otyonnyi ak kosup ineendet, si kong'alaalji muguleldanyi ak koweekta, kobooto otwogindennyi ak sigirok aeng'. Ki imut ineendet lakwanooto kwo kootap kwandanyi, ak koboiboitu kwandap lakweet komeet ineendet. Ki pirchi ineendet kwenotennyi, kwandap lakweet, si komeny, ak komeny kobooto ineendet peetuusyek somok; koamis, koeeiso, ak koru yooto.

Eng' peetuutap ang'wan king'eetyo karon, ak king'eet si koba. Ago ki leenji kwandap lakweet chiichooto, “Iam kitigin ne po magatyat, yeityo iwe.” Ki tebi icheek aeng', koamis ak koeeiso togeennyi. Ki leenji kwandap lakweet chiichooto, “Kaigai, iru kemouni ak koboiboitu muguleldang'ung'.” Ki ng'eet chiichooto si koba, ago ki pirchi ineendet kwenotennyi, kot koru yooto kogeny. Eng' peetuutap muut king'eetyo karon si koba; ki le kwandap lakweet, “Kaigai, igonor muguleldang'ung', ak iteng' kot koit sait taman.” Koamis anyun icheek aeng'. Ye king'eet chiichooto si koba, kobooto chebaigeiyandennyi ak otwogindennyi, ki le kwenotennyi, kwandap lakweet, “Keero, kagonyiit koba peet; iru kemoi. Keero, kagonyiit kolong'wa; iru yu ak ibaibaitu. Tomono ing'eetyo karon, imut oreng'ung', ak iwe koong'ung'.” Ago ki eesyo chiichooto koru kemoi; king'eet, koba, ak koit ye neegitee Jebus (nooto ko Jerusalem), kobooto sigirokyik aeng' che kiito ak chebaigeiyandennyi. Ye neegitee Jebus, ak ko kagonyiit kolong'u asiista, ki leenji otwogindet kiptaiyandennyi, “Nyoo, kaigai, keweigei keba nganaseetap Jebusik ni ak keru kemoi.”

Ki wol kiptaiyandennyi, “Ma keweigei keba nganaseetap toondet, ne ma po Israel; keba tai agoi Gibea.” Ki leenji otwogindennyi, “Nyoo, keit age eng' oldotuuchu, ak keru Gibea anan Ramah.” Ki ba anyun ooreennywa, ak kolong'u asiista ye neegitee Gibea ne po Benjamin. Ki weigei si koru Gibea. Ki chut ak kotebi soget ne po nganaseet, ago ma komi chii ne imut icheek koonnyi si koru.

Ki nyo poiyot age kobunu poisyetap mbareet eng' kabgeiywet. Ki po emetap tuloonoogap Ephraim ineendet, ne menyei Gibea ko uu toondet; ago piigap olooto ko po Benjamin. Ki tabendo poiyonooto, kogeer kiprutoiyo eng' soget ne po nganaseet, ak koteebe, “Ibendi ano? Ibunu ano?”

Ki leenji ineendet, “Kibendi kebunu Beth-lehem-juda keba emetap tuloonoogap Ephraim ne loo; nooto ko koonnyu. Ki awe Beth-lehem-juda, ak nguno abendi kootap Kwandanyo, ago ma komi chii ne imut anee koonnyi. Ki tinyei mobeek ak amitwogik che po sigirokyok, ak magatyat ak maiyek che po anee, ak otwogindeng'ung' ne chebyoset, ak mureno ne mi kobooto otwogiguk. Ma rarwech kiy.”

Ki le poiyonooto, “Ingomi kaalyeet kobooto inyee. Agoonin tugul che imache; kityo ameru eng' soget.” Ki imut ineendet koonnyi, ak kipae sigirokyik amitwogik, ak kiuun keelyekwak, koamis ak koeeiso.

Ye kingo boiboitu icheek, kiche koit murenik che ya che po nganaseet koyiem koot, ko kawirei kurgeet. Ki waachi poiyonooto ne tinyei koot, koleenji, “Isto chiito ne kagochut koong'ung', si keruiye ineendet!”

Ki manda chiito ne tinyei koot koba ole mi icheek, ak kole, “Achicha, tupchennyu, kaigai ameyai ne ya, amu kagochut chiini koonnyu; ameyai yaityoni. Keero cheptonyu ne tiliil ak chebaigeiyandennyi; ingaistou icheek. Oteweer icheek, oyachi icheek ko uu ye ogeere ole myee, ago ameyai yaityoni ne uu no eng' chiini.”

Ago ma cham murenik kogas. Ki nam anyun chiichooto chebaigeiyandennyi, ak koistoechi icheek saang'; kosuup ak koteweer ineendet kemoi komugul kot koeech, yeityo kobagaakta ineendet. Ye kagoeech, ki nyo kwonyooto ak kobut kurgeetap koot ne po chiichooto, ole menyei kiptaiyandennyi, kot koit lapkeiyet. Ye kairir emet, king'eet kiptaiyandennyi, koger kurgotigap koot, ak komanda si koba ooreennyi; keero, korue chebaigeiyandennyi, kobutyo kurgeetap koot, eunekyik ko mi tugatuk. Ki leenji ineendet, “Ng'eet, keba.” Ago ma kowol. Ki inde anyun ineendet sigiryet, ak koba koonnyi.

Ye kingo it koonnyi, ki nam rotweet, konam chebaigeiyandennyi, kotilchi kebeberta koek kebeberwek taman ak aeng', ak koyookto eng' emetap Israel komugul. Ki le tugul che kogeer, “Ma kiyai anan koger kiy ne uu ni, kobooch ye kingo ng'eetyo Israel eng' emetap Misiri agoi ra. Obwaat niito, ong'alaal agobo, ak omwa.”