Wungva̱-Wungvā 18

18 ¹Chithang atamli Israelli awunga maleimana. Dan shangna somkhavai leiret phākazatna, kaja chi eina tangda Israelwui shangbingwui ngachaili athumna shimlui masamphangmana. ²Danwui mibingna athumwui shimkhurwui eina Zorah eina Eshta-ol eina kapinga mi phangā, ngalei ara̱yang kala akhayang khavai chihovai. Athumna athumli hānga, "Vālaga ngalei akhayang sālu." Athumna Ephraim kaphungramli khalei Micahwui shimli vāshunglaga apam chili ngayā pamsanghaowa.

³Micahwui shimwui ngaveili athumna Levipa yaonaowui akhon chi theihaowa, chieina apam chili ngareida azunglaga ali hānga, "Khipāna nali hili khuirākhala? Apam hili nana khi sākhala? Hili nana khi khaleikhala?"

⁴Ana athumli hānga, "Micahna ili hithā-hithāda sāmi; ana ili masākhui, kala I awui pāngmon sāhaira."

⁵Athumna ali hānga, "Ithumna kazata shongzā hi ungshungra kala maungshungra kaji theikhavai ithumwui Avāli ngahānmilu."

⁶Pāngmonna athumli hānga, "Chingri eina vālu. Nathumwui shongzā chi ithumwui Avāna yangmira."

⁷Chieina mi phangā china Laishli vai, kala chiwui mibing Sidonnaobing thāda va̱ri eina nganantāp eina kalā mashi khavai pamda, ngaleili khikha makhavāta kala lan vaida leikahai chi theihaowa. Athum Sidonnaobingwui eina katāvali leisai, kala khipākhali ngasoda maleimana. ⁸Athumna Zorah eina Eshta-olli khalei athumwui theisābingli latunga tharan, athumwui theisābingna athumli ngahāna, "Nathumna khi theihaokhala?"

⁹Athumna hānga, "Ngakarthuilu, athumli vāngararra! Ithumna ngalei chi theihaira, kala chi phālaka. Nathumna khikha masāla leira kajilā? Ngalei chi vāyuikhui khavai kapan machatalu. ¹⁰Nathumna vāshunga tharan, khamashā ngaleili khalei matheiranga mibingli samphangra. Ithumwui Avāna chi nathumwui pāngli mihaira. Chi okathuili khikha makhavāta kahai apamna."

¹¹Dan shimkhurwui raisāri kasinga mi shātharuk Zorah eina Eshta-olwui eina zatphoka. ¹²Athumna vālaga Judahwui Kiriath-jearimli rāmrah vasāpama. Chiwui vang aja eina tangda apam chili Mahaneh-dan da hoi; chi Kiriath-jearimwui zingtunshong leisai. ¹³Apam chiwui eina athumna Ephraim kaphungramli kānlaga Micahwui shimli vāshunga.

¹⁴Chiwui thili Laish ngalei akhayang kahai mi phangā china athumwui theisābingli hānga, "Shim hibingli ephod, mimān, rukkakhui mima kala langkakhui meoma̱ leisai kaji nathumna theilā? Ara khi sāra kaji khangarān sālu." ¹⁵Chieina athumna ngareida Levipa yaonaowui shim, Micahwui shimli vaida ali shālam sai. ¹⁶Danwui mi shātharuk raisāri kasingbing keinung ngaveiwui ngalemli nganinga. ¹⁷Pāngmonna raisāri kasing mi shātharukli ngasoda ngavei ngalemli nganinglakha, ngalei akhayang kahai mi phangā china azunglaga rukkakhui mima, ephod, mimān kala langkakhui meoma̱ khuiya.

¹⁸Hi mibingna Micahwui shimli zangda rukkakhui mima, ephod, mimān kala langkakhui meoma̱ khuikahai tharan, pāngmonna athumli ngahāna, "Nathumna khi sālikhala?"

¹⁹Athumna hānga, "Hupta leilu! Napāng nakhamorli haihaolu, ithumla ngasoda rālu. Ithumwui avā kala pāngmon ngasālu. Mi akhawui shimli pāngmon ngasāki kajiwui vanga, Israelwui shang kala shimkhurli pāngmon ngasāki kajina nali phameikhala?"

²⁰Pāngmonwui ning ringphāhaowa. Ana ephod, mimān kala rukkakhui mima khuilaga mibingwui ngachaili vai. ²¹Chieina athum ngareilaga, naoshinaobing, sha̱kei, kala athumwui otbing athumwui mangāli haida zatphoka. ²²Danwui mibingna Micahwui shimwui eina thuihaira tharan, Micahwui shim nganailakha khalei mibing china rākaziplaga Danwui mibingwui thili shurda nganaihaowa. ²³Athumna Danwui mibingli panglāk eina vaowa; chieina Danwui mibingna ngareiungda Micahli hānga, "Nawui mibing hokhuilaga, nawui kasak khi leihaokhala?"

²⁴Ana hānga, "Nathumna ina kasā varebing kala pāngmon khuilaga thuihaira. Ili khi tailenglakhala? Chithākha kathada nathumna ili, 'Nawui kasak khi leihaokhala?' da ngahānpaira̱khala?"

²⁵Danwui mibingna ali hānga, "Nawui akhon ithumwui ngachaili mangasā ngasakhailu, maningakha malung khangavāt mibingna nali rangararpaishina, kala na kala nawui shimkhurwui mirin shimānhaipaishina."

²⁶Danwui mibingna athumwui shongfali zata; chieina Micahna athum ali thada pangshap juilaka da theilaga, ana ngareiungda shimli unghaowa. ²⁷Athumna Micahna sākahai chi kala awui pāngmon khuilaga, Laishli rālaga chingri chihansa̱ leikahai mibing chili raighai eina sāthatserhaowa, kala keinung chi mei eina thottamiserhaowa. ²⁸Athumli huikhavai khipākhala maleimana, kaja keinung chi Sidonwui eina tā ngararsai kala khipā kateibingla ngarum mangasomana. Chi Beth-rehobwui tampākli soma. Danwui mibingna keinung chi sakāluishita kala chili sompama. ²⁹Athumna athum avāva̱ Israelwui naomayara Danwui ming thāda keinung chi Dan hohaowa; kha keinung chiwui aming khareli Laish hosai. ³⁰Danwui mibingna rukkakhui mima chi athum khalattawui vang haihai. Moseswui nao Gershomwui nao Jonathan kala awui naomayarabingna ngalei tukthuihaiwui zimiksho eina tangda Dan shangwui pāngmon ngasāsai. ³¹Ithumwui Avāwui shim Shilohli leikahai atam katongali Micahna sākahai rukkakhui mima chi athumna athum khalattawui vang haihai.