Mga Maghuhukom 18

18 ¹Niadtong mga adlawa walay hari ang Israel. Ang tribo ni Dan nangita ug yuta nga puy-anan, kay hangtod niadtong panahona wala pa silay napanunod nga bahin taliwala sa mga tribo sa Israel. ²Nagpadala ang mga Danita ug lima ka maisog nga lalaki gikan sa ilang banay, gikan sa Zora ug Estaol, aron maniid ug magsusi sa yuta. Miingon sila kanila, “Lakaw kamo, susiha ninyo ang yuta.” Nakaabot sila sa kabungtoran sa Efraim, sa balay ni Mica, ug nagpalabay sa gabii didto.

³Sa duol sa balay ni Mica nailhan nila ang tingog sa batan-ong Levita, busa misimang sila didto ug miingon kaniya, “Kinsa ang nagdala kanimo dinhi? Unsa ang imong gibuhat niining dapita? Unsa ang anaa kanimo dinhi?”

⁴Mitubag siya kanila, “Mao kini ug mao kadto ang gibuhat ni Mica alang kanako; gisuholan niya ako, ug nahimo akong iyang pari.”

⁵Miingon sila kaniya, “Palihog pangutan-a ang atong Amahan, aron mahibaloan namo kon molampos ba ang among panaw.”

⁶Miingon ang pari kanila, “Lakaw kamo nga malinawon. Ang inyong panaw ginabantayan sa atong Amahan.”

⁷Busa miadto ang lima ka lalaki sa Lais ug nakita nila ang mga lumulupyo niini nga nagpuyo nga luwas, sama sa mga Sidonhon—malinawon ug walay kabalaka—walay nakulang diha sa yuta ug nanag-iya ug bahandi. Layo sila sa mga Sidonhon ug walay pakiglabot kang bisan kinsa. ⁸Sa pagbalik nila sa ilang mga kaparyentihan sa Zora ug Estaol, gipangutana sila, “Unsa ang inyong nakaplagan?”

⁹Miingon sila, “Panindog kamo, sulongon nato sila! Nakita namo ang yuta—maayo kaayo kini. Wala ba kamoy buhaton? Ayaw kamo paglangan sa pag-adto aron sakupon ang yuta. ¹⁰Inig-abot ninyo, makakita kamo ug katawhan nga walay kahadlok diha sa halapad nga yuta. Gitugyan kini kaninyo sa atong Amahan—usa ka dapit nga walay nakulang sa kalibotan.”

¹¹Milakaw gikan sa Zora ug Estaol ang 600 ka lalaki sa banay sa mga Danita, nga sangkap sa mga hinagiban sa gubat. ¹²Mitungas sila ug nagkampo sa Kiriat-jearim sa Juda. Mao kana nga gitawag kini ug Mahane-dan hangtod karong adlawa; nahimutang kini sa kasadpan sa Kiriat-jearim. ¹³Gikan didto mitabok sila ngadto sa kabungtoran sa Efraim ug nakaabot sa balay ni Mica.

¹⁴Unya ang lima ka lalaki nga nanid-an sa yuta sa Lais miingon sa ilang mga kaparyentihan, “Nahibalo ba kamo nga kining mga balaya adunay efod, mga dios-dios sa panimalay, usa ka kinulit nga larawan, ug usa ka tinunaw nga dios-dios? Karon paghukom kamo kon unsa ang buhaton.” ¹⁵Busa misimang sila ug miadto sa balay sa batan-ong Levita, ang balay ni Mica, ug nangomusta kaniya. ¹⁶Ang 600 ka armadong Danita nga lalaki nanindog sa agianan sa ganghaan. ¹⁷Ang lima ka lalaki nga nanid-an sa yuta misulod ug mikuha sa kinulit nga larawan, sa efod, sa mga dios-dios sa panimalay, ug sa tinunaw nga dios-dios, samtang ang pari nagtindog sa agianan sa ganghaan uban sa 600 ka armadong lalaki.

¹⁸Sa pagsulod niining mga tawhana sa balay ni Mica ug sa pagkuha nila sa kinulit nga larawan, sa efod, sa mga dios-dios sa panimalay, ug sa tinunaw nga dios-dios, nangutana kanila ang pari, “Unsa ang inyong gibuhat?”

¹⁹Miingon sila, “Hilom! Itaplod ang imong kamot sa imong baba, ug uban kanamo. Mahimo kang among amahan ug pari. Mas maayo ba alang kanimo nga mahimong pari sa panimalay sa usa ka tawo, o sa usa ka tribo ug banay sa Israel?”

²⁰Nalipay ang kasingkasing sa pari. Gikuha niya ang efod, ang mga dios-dios sa panimalay, ug ang kinulit nga larawan, ug miuban sa katawhan. ²¹Unya mitalikod sila ug migikan, nga gipauna nila ang mga bata, ang kahayopan, ug ang ilang mga kabtangan. ²²Sa nakabiya na sila sa balay ni Mica, gitawag ang mga lalaki nga duol niini ug naapsan nila ang mga Danita. ²³Misinggit sila ngadto sa mga Danita, nga milingi ug miingon kang Mica, “Unsa ang nahitabo kanimo, nga nagtawag ka sa imong mga tawo?”

²⁴Miingon siya, “Gikuha ninyo ang mga dios nga akong gibuhat ug ang pari, ug mibiya kamo. Unsa pa may nahibilin kanako? Nganong makapangutana man kamo kanako, ‘Unsa ang nahitabo kanimo?’”

²⁵Miingon kaniya ang mga Danita, “Ayaw ipadungog ang imong tingog taliwala kanamo, kay tingali ang mga lalaki nga masuk-anon mosulong kanimo, ug mawad-an ka sa imong kinabuhi ug sa mga kinabuhi sa imong panimalay.”

²⁶Mipadayon ang mga Danita sa ilang panaw; ug sa nakita ni Mica nga mas kusgan sila kay kaniya, mibalik siya sa iyang pinuy-anan. ²⁷Gidala nila ang gibuhat ni Mica, ug ang iyang pari, ug miabot sila sa Lais—usa ka katawhan nga malinawon ug walay kahadlok—gipamatay nila sila sa sulab sa espada, ug gisunog nila ang siyudad. ²⁸Walay makaluwas kanila, kay ang siyudad layo sa Sidon ug walay kalambigitan kang bisan kinsa. Nahimutang kini sa walog nga iya sa Bet-rehob. Gitukod pag-usab sa mga Danita ang siyudad ug mipuyo sila didto. ²⁹Ginganlan nila ang siyudad ug Dan, sunod kang Dan nga ilang katigulangan, ang anak ni Israel; apan ang siyudad kaniadto ginganlan ug Lais. ³⁰Gipatindog sa mga Danita ang kinulit nga larawan alang sa ilang kaugalingon. Si Jonatan, anak ni Gersom, anak ni Moises, ug ang iyang mga anak nahimong mga pari sa tribo sa mga Danita hangtod sa adlaw sa pagkabihag sa yuta. ³¹Gipatindog nila alang sa ilang kaugalingon ang kinulit nga larawan nga gibuhat ni Mica, sa tibuok panahon nga ang balay sa atong Amahan atua sa Shilo.