Waamuzi 18

18 ¹Katika siku hizo Israeli hawakuwa na mfalme. Kabila la Dani lilikuwa likitafuta eneo la kukaa, kwa maana mpaka wakati huo hawakuwa wamepewa urithi katikati ya makabila ya Israeli. ²Wana wa Dani wakawatuma watu watano wenye ujasiri kutoka jamaa yao, kutoka Sora na Eshtaoli, ili kuipeleleza na kuichunguza nchi. Wakawaambia, "Nendeni, ichunguzeni nchi." Wakafika katika nchi ya vilima ya Efraimu, hata nyumba ya Mika, wakalala huko usiku ule.

³Walipokuwa karibu na nyumba ya Mika waliitambua sauti ya yule kijana Mlawi, basi wakageuka kuingia humo, wakamwuliza, "Ni nani aliyekuleta hapa? Unafanya nini mahali hapa? Una nini hapa?"

⁴Akawaambia, "Mika alinitendea hivi na hivi; ameniajiri, nami nimekuwa kuhani wake."

⁵Wakamwambia, "Tafadhali umwulize Baba yetu, ili tupate kujua kama safari tunayoifanya itafanikiwa."

⁶Yule kuhani akawaambia, "Nendeni kwa amani. Safari yenu iko chini ya uangalizi wa Baba yetu."

⁷Basi wale watu watano wakaenda Laishi, wakaona watu wake wanakaa salama, kama Wasidoni—watulivu na wenye usalama—hawakupungukiwa na kitu chochote katika nchi, tena wenye utajiri. Nao walikuwa mbali na Wasidoni, wala hawakuwa na mashughuliko na mtu yeyote. ⁸Waliporudi kwa ndugu zao huko Sora na Eshtaoli, wakaulizwa, "Mmeona nini?"

⁹Wakasema, "Inukeni, tuwaendee vitani! Tumeiona nchi—ni nzuri sana. Je, mtakaa kimya bila kufanya lolote? Msikawie kwenda kuimiliki nchi. ¹⁰Mtakapofika, mtawakuta watu wasioshuku katika nchi iliyo pana. Baba yetu ameitia mikononi mwenu—mahali pasipopungukiwa na kitu chochote duniani."

¹¹Watu 600 wa jamaa ya Wadani, waliojivika silaha za vita, wakaondoka kutoka Sora na Eshtaoli. ¹²Wakapanda, wakapiga kambi huko Kiriath-yearimu katika Yuda. Ndiyo maana huitwa Mahane-dani hata leo; iko upande wa magharibi wa Kiriath-yearimu. ¹³Kutoka huko wakavuka kwenda nchi ya vilima ya Efraimu, wakafika nyumba ya Mika.

¹⁴Ndipo wale watu watano waliokuwa wamekwenda kuipeleleza nchi ya Laishi wakawaambia ndugu zao, "Je, mnajua kwamba nyumba hizi zina naivera, na vinyago vya nyumbani, na sanamu ya kuchonga, na sanamu ya kusubu? Sasa fikirini mtakalotenda." ¹⁵Basi wakageuka kuingia, wakafika nyumba ya yule kijana Mlawi, katika nyumba ya Mika, wakamsalimu. ¹⁶Wale watu 600 wa Wadani waliojivika silaha wakasimama pale penye ingilio la lango. ¹⁷Wale watu watano waliokuwa wamekwenda kuipeleleza nchi wakaingia, wakaichukua sanamu ya kuchonga, na naivera, na vinyago vya nyumbani, na sanamu ya kusubu, huku yule kuhani akisimama penye ingilio la lango pamoja na wale watu 600 waliojivika silaha.

¹⁸Watu hawa walipoingia nyumbani mwa Mika na kuichukua sanamu ya kuchonga, na naivera, na vinyago vya nyumbani, na sanamu ya kusubu, yule kuhani akawauliza, "Mnafanya nini?"

¹⁹Wakamwambia, "Nyamaza! Weka mkono wako kinywani mwako, uje pamoja nasi. Uwe baba yetu na kuhani wetu. Je, ni afadhali kwako kuwa kuhani wa nyumba ya mtu mmoja, au kuwa kuhani wa kabila na jamaa katika Israeli?"

²⁰Moyo wa yule kuhani ukafurahi. Akaichukua naivera, na vinyago vya nyumbani, na sanamu ya kuchonga, akaenda katikati ya watu. ²¹Ndipo wakageuka, wakaondoka, wakawaweka watoto, na wanyama, na mizigo yao mbele yao. ²²Walipokwisha kuiacha nyumba ya Mika, watu waliokuwa karibu na nyumba yake wakaitwa, wakawafuatia hata wakawapata Wadani. ²³Wakawapigia kelele Wadani, nao wakageuka, wakamwambia Mika, "Una nini hata umewaita watu wako?"

²⁴Akasema, "Mmeichukua miungu niliyoifanya, na kuhani, mkaenda zenu. Sasa nimebakiwa na nini? Mnawezaje kuniuliza, 'Una nini?'"

²⁵Wadani wakamwambia, "Sauti yako isisikike katikati yetu, wasije watu wenye hasira wakakushambulia, ukapoteza uhai wako na uhai wa watu wa nyumbani mwako."

²⁶Wadani wakaenda zao; na Mika alipoona kwamba wana nguvu kumliko, akageuka, akarudi nyumbani kwake. ²⁷Wakavichukua vile alivyovifanya Mika, na kuhani wake, wakafika Laishi—watu watulivu wasioshuku—wakawapiga kwa makali ya upanga, wakauteketeza mji kwa moto. ²⁸Wala hakuna aliyeweza kuwaokoa, kwa maana mji ulikuwa mbali na Sidoni, wala haukuwa na mashughuliko na mtu yeyote. Ulikuwa katika bonde lililo la Beth-rehobu. Wadani wakaujenga upya mji, wakakaa humo. ²⁹Wakauita jina la mji Dani, kwa jina la Dani baba yao, mwana wa Israeli; lakini jina la mji hapo kwanza lilikuwa Laishi. ³⁰Wadani wakajisimamishia ile sanamu ya kuchonga. Naye Yonathani, mwana wa Gershomu, mwana wa Musa, yeye na wanawe walikuwa makuhani kwa kabila la Wadani hata siku ya kutekwa nchi. ³¹Wakajisimamishia ile sanamu ya kuchonga Mika aliyoifanya, muda wote ile nyumba ya Baba yetu ilipokuwa Shilo.