Jeremiah 52

52 ¹Zedekiahna awunga sākaphok tharan zingkum maga̱da akha kāhairasai, kala Jerusalemli zingkum tharāda akha munga. Ava̱va̱wui ming Hamutal hoi, Libnahli khalei Jeremiahwui nao ngalāva̱na. ²Jehoiakimna kasā tākam eina anala ithumwui Avāwui mikyanli makaphā ot sai. ³Kaja ithumwui Avāna athumli awui mangā eina hersangmiranglakha eina tangda, awui malungkhavātwui vang hi Jerusalem kala Judahli shoka. Chiwui thili Zedekiahna Babylonwui awungali thuingarara.

⁴Ana mungda kachiko kum, kachāng katharāwui zimiksho katharāthang, Babylonwui awunga Nebuchadnezzarna awui raimi saikorali ngasorāda Jerusalemli rāda, chili rairum asālaga kuimareida khangarān sāserhaowa. ⁵Chieina keinung chi awunga Zedekiahwui khamung zingkum tharāda akha eina tangda kuinama.

⁶Kachāng khamatewui zimiksho kachikothang, keinung chili zāt sak kachangkhathaowa; ngalei chiwui mibingwui vang kashakazā matai. ⁷Chiwui thili keinung chi sākhaizanghaowa. Chaldeanaobingna keinung chi kuimareida leilakha, raimibing saikorana thangngayākha awungawui yāmgui nganaili khalei phākho khani angachaili khalei ngaveiwui eina yāmshokhaowa, kala athumna Arabahshong tāmamāna. ^a a v7 Arabah hi Galilee Ngayiwui eina azingshong Kathi Yireishong shangda Jordan tampākwui kaji ngaleina. ⁸Kha Chaldeawui raimibingna awungali kharomvālaga Jericho tampākli Zedekiahli angaphankhuida awui raimibing saikora ngapha̱yanghaowa. ⁹Athumna awungali tukkhuida Hamath ngaleiwui Riblahli Babylon awungawuili khuiungmi, kala awuitungli tuitak khuihaowa. ¹⁰Babylonwui awungana Riblahli Zedekiahwui naomayarabingli awui miktāli shaothat ngasaka, kala Judahwui wungnaobing saikoralila shaothatserhaowa. ¹¹Ana Zedekiahwui mik latshokmihaowa, kala pithrai pheipāng eina khalaplaga, Babylonwui awungana ali Babylonli khuivai, kala a thihaithang eina tangda phātopli sanga.

Avāwui Shim Sāshimānhai

¹²Kachāng kaphangāwui zimiksho katharāthang, Babylonwui awunga Nebuchadnezzarwui tharāda kachiko kumli, raikānwui akhavā, awunga Nebuchadnezzarwui rao Nebuzaradanna Jerusalemli vai. ¹³Ana ithumwui Avāwui shim, awungawui shim, kala Jerusalemwui shim saikora riktāhaowa; kahaka shim kachiva̱ mei eina riktāhaowa. ¹⁴Raikānwui kathānali ngasozat kasā Chaldeawui raimibing saikorana Jerusalemwui phākho kuikhamarei chi shaokhaimiserhaowa. ¹⁵Raikānwui akhavā Nebuzaradanna kachām-khangaibing kaikha, keinung chili taihaikasā mibing, Babylonwui awungali yāmkasangbing, kala them kathembing khangateibing chi shimenthuiserhaowa. ¹⁶Kha raikānwui akhavā Nebuzaradanna ngalei chiwui kachām-khangaibing kaikhali drakhā yāmgui kala lui vākhavai taimi.

¹⁷Ithumwui Avāwui shimli khalei pithrai pākra̱bing, kala ithumwui Avāwui shimli khalei apheibing kala pithrai ra̱khong chi Chaldeanaobingna shaokhaimiserhaowa, kala pithrai saikora Babylonli khuivāserhaowa. ^b b v17 Pithrai ra̱khong hi kahaka kuikhamarei khongsai akhana, pāngmonbingna atharlak eina tharkhavai sākhuisaina. ¹⁸Hamla, berchala, meikhanitla, khongsaila, akhongla, kala Khorumshimli savai khavai pithraiwui khorkhong saikora athumna khuithuiserhaowa. ¹⁹Raikānwui kathāna chinala koklui, meiyaikhong, khongsai, ham, thaomeishong, nganamkaphā thaowui khongphei, kala ra̱shakchigat heikhavai khongkam, sinā eina kasā chi sinā eina, lupā eina kasā chi lupā eina khuithuiserhaowa.

²⁰Awunga Solomonna ithumwui Avāwui shimwui vang sākhui kahai pākra̱ khani, pithraiwui ra̱khong, kala aphei chiwui azingli pithraiwui mukkā tharāda khani, chi saikorawui pithraiwui kharit chi tamyang matheirarmana. ²¹Pākra̱ ava̱va̱wui kajui khuining tharāda chishat, kuimareida khuining tharāda khani; aphākho chi inch kathum kashā, kala alung chikhaina. ²²Chiwui atungli pithraiwui agui akha sāsai, agui chiwui kajui khuining phangā; agui kuimareida khānkatarān kala kabothei leisai, saikora pithraina. Pākra̱ kakhane chila kabothei eina ngasoda chi tākamhaipapama. ²³Arāpli kabothei hangchikoda tharuk leisai; khānkatarān kuimareida khalei kabothei saikora ngarumlaga shākhana.

²⁴Raikānwui kathānana pāngmon kharei Seraiah, kala Zephaniah pāngmon kakhane, kala khāmong khamayona kathumli tukkhuiserhaowa, ²⁵kala keinung chiwui eina ana thānkhamewui otva̱ akha, keinung chili leikasā awungawui hangva̱ shini, ngaleiwui mibingli kazipkhuida raithānwui kapime, kala keinungli leikasā ngaleiwui mi hangtharuk tukkhui. ²⁶Raikānwui kathāna Nebuzaradanna athumli tukphungda Riblah chili Babylon awungawui pāngli khuiungserhaowa. ²⁷Babylon awungana Hamath ngaleiwui Riblah chili athumli sāthatserhaowa. Chithāda sāda Judahli awui ngaleiwui eina raithā tukthuiserhaowa.

²⁸Nebuchadnezzarna raithā kahai mibingwui mashing chiya: kashine kumli, Jehudinaobing thingkathum kala maga̱da kathumna;

²⁹Nebuchadnezzarwui khamung tharāda kachishat kumli, Jerusalemwui eina mi shāchishat kala thumrāda khanina;

³⁰Nebuchadnezzarwui khamung maga̱da kathum kumli, raikānwui kathāna Nebuzaradanna Jehudinaobing shāshini kala hangmatida phangāli raithā kahaina; saikora ngarumlaga mi thingmati shātharukna.

Jehoiachin Phātopwui Eina Chihomi

³¹Judahwui awunga Jehoiachinli raithā kahai thumrāda kashinewui kumli, kachāng tharāda kakhane chiwui zimiksho maga̱da phangāthang, Babylonwui awunga Evil-merodakhna awui mungkhare kumli Judahwui awunga Jehoiachinli lumashanda phātopwui eina chihomi. ³²Ana ali mathālak eina ngahānmida, Babylonli awui ngasomida khalei awungabingwui wungpamkhongwuitungli awui wungpamkhong reisang. ³³Chithāda Jehoiachinna phātop kachon mangavailuithuwa. Kala awui ringlakha eina tangda thangkachida awungawui tabletungli phazāchinga. ³⁴Babylon awungana awui ringlakha eina tangda, a thihaithang eina tangda, ali thangthangwui sāvai khavai pheisā michinga.