Jeremiah 52 FHB Father's Heart Bible™

52 ¹Zedekiah raja howa homoi te tar umor ekoish saal thakise, aru tai Jerusalem te egaroh saal raj korise. Tar ama laga nam Hamutal thakise, kun Libnah laga Jeremiah laga chukri ase. ²Jehoiakim pora kora nisena, tai bhi amar Pitri laga suku te biya kaam korise. ³amar Pitri laga khong pora eitu Jerusalem aru Judah uporte ahhise, jitia tak Tai pora tarkhan ke Tar usor pora khedai nadise. Tetiya Zedekiah pora Babylon laga raja birodh te uthise.

⁴Tar raj kora laga no-ta saal te, dos-ta mohina te, dos tarikh te, Babylon laga raja Nebuchadnezzar tar pura sena logot Jerusalem birodh te ahhi kene, eitu usorte camp lagai kene, eitu laga charipate gheri bola bera ekta bonaise. ⁵Eneka kori kene, raja Zedekiah laga egaroh saal tak sheher tu gheri rakhise.

⁶Char-ta mohina te, no tarikh te, sheher te bisi akal ahhise; desh laga manuh khan nimite kha luwa eku bachi thaka nai. ⁷Tetiya sheher laga bera bhangi jaise. Babylon laga manuh khan sheher tu gheri thaka homoi te, sob sena khan raja laga bagan usorte duita bera majot thaka duar pora rati te lukai kene ulai polai jaise, aru tarkhan Arabah phale jaise. ^a a v7 Arabah tu Jordan laga tolla jaga ase, juntu Galilee Samundar pora dakshin phale Mora Samundar phale jai ase. ⁸Kintu Babylon laga sena khan raja ke khedai kene Jericho laga samana jagate Zedekiah ke dhori loise, aru tar pura sena tar pora alag hoi kene chatirai jaise. ⁹Tarkhan raja ke dhori kene Hamath desh laga Riblah te Babylon laga raja logot anise, aru tai pora tar uporte bisar korise. ¹⁰Babylon laga raja pora Zedekiah laga chokra khan ke tar suku age te morai dise, aru Riblah te Judah laga sob adhikari khan ke bhi morai dise. ¹¹Tai pora Zedekiah laga suku andha kori dise, pitol laga rusi pora tar ke bandhi dise, aru Babylon laga raja pora tar ke Babylon te ani kene, tai mora din tak bondi ghor te rakhise.

Pitri laga Ghor Bhangai Dise

¹²Pansh-ta mohina te, dos tarikh te—Nebuchadnezzar laga unnoish saal te—pohora dar laga senapoti Nebuzaradan, kun raja Nebuchadnezzar laga noukar thakise, Jerusalem te ahhise. ¹³Tai pora amar Pitri laga ghor, raja laga ghor, aru Jerusalem laga sob ghor khan ke jolai dise—sob dangor ghor khan ke tai jui pora jolai dise. ¹⁴Pohora dar laga senapoti logot thaka Babylon laga pura sena pora Jerusalem ke gheri thaka sob bera khan ke bhangai dise. ¹⁵Pohora dar laga senapoti Nebuzaradan pora sob pora gorib manuh kunba khan ke, sheher te bachi thaka khan ke, Babylon laga raja phale polai juwa manuh khan ke, aru baki hath-kaam kora manuh khan ke bondi kori kene loi jaise. ¹⁶Kintu pohora dar laga senapoti Nebuzaradan pora angur bagan aru kheti te kaam koribole desh laga kunba gorib manuh khan ke chari dise.

¹⁷amar Pitri laga ghor laga pitol laga khamba khan, aru amar Pitri laga ghor te thaka stand khan aru pitol laga samundar—eitu sob ke Babylon laga manuh khan pora bhangai kene, sob pitol Babylon te loi jaise. ^b b v17 Pitol laga samundar tu ekta dangor gol boroton thakise, juntu purohit khan pora niyom hisab te dhui luwa nimite cholai thakise. ¹⁸Tarkhan handi khan, kodali khan, batti kata jinis khan, boroton khan, thali khan, aru mondir laga seva nimite cholai thaka sob pitol laga bostu khan loi loise. ¹⁹Pohora dar laga senapoti pora chutu bati khan, jui laga patra khan, boroton khan, handi khan, deeya rakha khan, dhoop laga thali khan, aru rosh daan laga bati khan bhi loi loise—ji suna thakise eitu suna hisab te, ji chandi thakise eitu chandi hisab te.

²⁰Duita khamba, pitol laga samundar, stand khan laga nichete thaka baroh-ta pitol laga mota-goru, juntu raja Solomon pora amar Pitri laga ghor nimite bonaise—eitu sob laga pitol tol kori bo para nai. ²¹Ek-ekta khamba lomba te prai sattais feet thakise, aru ghuri kene athharo feet thakise, tar bera tin inch dangor thakise, aru bhitor khali thakise. ²²Eitu laga pitol laga uporer bhag prai sat-adha feet owncha thakise, aru charipate jali kaam aru anar khan thakise, sob pitol laga. Dusra khamba bhi eneka he thakise, anar khan logot. ²³Kinar khan te chiyanobboi-ta anar thakise; charipate jali kaam uporte sob milai kene eksoh anar thakise.

²⁴Pohora dar laga senapoti pora moha purohit Seraiah ke, dusra purohit Zephaniah ke, aru tinjon duar rokhiya khan ke dhori loise, ²⁵sheher pora tai sena khan uporte thaka adhikari ke, sheher te luwa raja laga saat jon salahkar khan ke, desh laga manuh khan ke joma kora senapoti laga likhok ke, aru sheher te luwa desh laga saathi jon manuh khan ke loise. ²⁶Pohora dar laga senapoti Nebuzaradan pora tarkhan ke Riblah te Babylon laga raja logot loi jaise. ²⁷Babylon laga raja pora Hamath desh laga Riblah te tarkhan ke mari kene morai dise. Eneka Judah tar nijor desh pora bondi hoi kene loi juwa hoise.

²⁸Nebuchadnezzar pora bondi kori kene loi juwa manuh khan laga ginti eitu ase: saat-ta saal te, tin hajar teiish-jon Judah laga manuh khan;

²⁹Nebuchadnezzar laga athharo saal te, Jerusalem pora aathsoh battis jon manuh khan;

³⁰Nebuchadnezzar laga teiish saal te, pohora dar laga senapoti Nebuzaradan pora saatsoh pintalis jon Judah laga manuh khan ke bondi kori loi jaise; sob milai kene char hajar choi soh manuh thakise.

Jehoiachin ke Bondi Ghor pora Ulai Anise

³¹Judah laga raja Jehoiachin bondi howa laga saat-tiris saal te, baroh-ta mohina laga pochis tarikh te, Babylon laga raja Evil-merodach pora, tar raj kora laga prothom saal te, Judah laga raja Jehoiachin ke doya korise aru tar ke bondi ghor pora mukti dise. ³²Tai pora tar logot morom pora kotha korise, aru Babylon te tar logot thaka dusra raja khan laga singhason khan uporte tar singhason ke rakhise. ³³Eneka Jehoiachin pora tar bondi ghor laga kapra khan khuli dise, aru tar pura jivon te hodai din raja laga mej te khana khaise. ³⁴Babylon laga raja pora tar ke, tai mora din tak, tar pura jivon te, hodai din laga joroton dise.