Jeremia 52 FHB Father's Heart Bible™

52 ¹Zedekia aarĩ na mĩaka mĩrongo ĩĩrĩ na ũmwe rĩrĩa aatuĩkire mũthamaki, nake agĩathana Jerusalemu mĩaka ikũmi na ũmwe. Nyina eetagwo Hamutali, mwarĩ wa Jeremia wa Libina. ²Nĩeekire ũũru maithoinĩ ma Ithe witũ, o ta ũrĩa Jehoiakimu eekĩte. ³Maũndũ maya maakorire Jerusalemu na Juda nĩ ũndũ wa marakara ma Ithe witũ, nginya rĩrĩa aamaingatire mehere mbere yake. Nake Zedekia akĩremera mũthamaki wa Babuloni.

⁴Mwakainĩ wa kenda wa ũthamaki wake, mweri wa ikũmi, mũthenya wa ikũmi, Nebukadinezaru mũthamaki wa Babuloni agĩũka gũtharĩkĩra Jerusalemu na mbũtũ yake yothe ya ita, akĩamba hema akĩrigiicĩria itũũra rĩu, na magĩaka rũirigo rwa kũrĩrigiicĩria. ⁵Nĩ ũndũ ũcio itũũra rĩu rĩgĩikara rĩrigiicĩrĩtio nginya mwaka wa ikũmi na ũmwe wa Mũthamaki Zedekia.

⁶Mweri wa kana, mũthenya wa kenda, ng'aragu ĩgĩkĩrĩra itũũra rĩu mũno; na gũtiarĩ irio ciatigarĩte cia andũ a bũrũri ũcio. ⁷Hĩndĩ ĩyo rũirigo rwa itũũra rũgĩtũrĩkio. Nao thigari ciothe igĩũra, igĩthiĩ ũtukũ ikĩhĩtũkĩra kĩhingo kĩrĩa kĩarĩ gatagatĩ ga thingo icio cierĩ hakuhĩ na mũgũnda wa mũthamaki, o rĩrĩa Ababuloni maarigiicĩirie itũũra rĩu, nao makĩerekera na Araba. ^a a v7 Araba nĩ kĩanda kĩrĩa kĩrĩ thĩ kĩa Gĩtuamba kĩa Jorodani kĩrĩa gĩtwaranaga na mwena wa gũthini kuuma Iria rĩa Galili kĩerekeire Iria rĩa Gĩkuũ. ⁸No mbũtũ cia ita cia Ababuloni ikĩrũmĩrĩra mũthamaki ũcio, ikĩnyiita Zedekia werũinĩ wa Jeriko, nayo mbũtũ yake yothe ya ita ĩkĩmũharagana. ⁹Makĩnyiita mũthamaki ũcio, makĩmũtwara kũrĩ mũthamaki wa Babuloni kũu Ribila bũrũri wa Hamathu, nake akĩmũtuĩra ciira. ¹⁰Mũthamaki wa Babuloni akĩũraga aariũ a Zedekia maithoinĩ make, o na agĩũraga anene othe a Juda kũu Ribila. ¹¹Agĩcooka agĩtũmia Zedekia maitho, akĩmuoha na mĩnyororo ya gĩcango, nake mũthamaki wa Babuloni akĩmũtwara Babuloni, akĩmũikia njeera nginya mũthenya ũrĩa aakuire.

Nyũmba ya Ithe witũ Nĩyanangwo

¹²Mweri wa gatano, mũthenya wa ikũmi—naguo warĩ mwaka wa ikũmi na kenda wa Nebukadinezaru—Nebuzaradani, mũnene wa arangĩri, ndungata ya Mũthamaki Nebukadinezaru, agĩũka Jerusalemu. ¹³Agĩcina nyũmba ya Ithe witũ, na nyũmba ya mũthamaki, na nyũmba ciothe cia Jerusalemu—o nyũmba ĩrĩa nene nĩamĩcinire na mwaki. ¹⁴Nayo mbũtũ yothe ya ita ya Ababuloni ĩrĩ hamwe na mũnene wa arangĩri ĩkĩmomora thingo ciothe iria ciarigiicĩirie Jerusalemu. ¹⁵Nebuzaradani, mũnene wa arangĩri, agĩtaha amwe a andũ arĩa athĩĩni mũno, na arĩa maatigarĩte itũũrainĩ, na arĩa meeneanĩte kũrĩ mũthamaki wa Babuloni, na matigari ma mabundi. ¹⁶No Nebuzaradani, mũnene wa arangĩri, agĩtigia amwe a andũ arĩa athĩĩni mũno a bũrũri ũcio nĩguo marĩmage mĩgũnda ya mĩthabibũ na mĩgũnda ĩrĩa ĩngĩ.

¹⁷Itugĩ cia gĩcango cia nyũmba ya Ithe witũ, na itugĩ cia kũigĩrĩra indo na iria rĩa gĩcango iria ciarĩ nyũmbainĩ ya Ithe witũ—Ababuloni magĩcihehenja na magĩkuua gĩcango kĩu gĩothe magĩgĩtwara Babuloni. ^b b v17 Iria rĩu rĩa gĩcango rĩarĩ kĩraĩ kĩnene gĩa gĩthiũrũrĩ kĩrĩa athĩnjĩri Ngai maatũmagĩra gwĩthamba kũringana na mĩtugo yao. ¹⁸Makĩoya nyũngũ, na icekeeri, na mĩkwaro ya gũtinia ndaambĩ, na mbakũri, na thaani, na indo ciothe cia gĩcango iria ciatũmagĩrwo wĩrainĩ wa hekarũ. ¹⁹Mũnene ũcio wa arangĩri o nake akĩoya tũbakũri tũnini, na ngĩo cia mwaki, na mbakũri, na nyũngũ, na mĩtĩ ya kũigĩrĩra matawa, na thaani cia ũbumba, na mbakũri cia maruta ma kũnyuuo—kĩrĩa gĩothe kĩarĩ gĩa thahabu akĩoya ta thahabu, na kĩrĩa gĩothe kĩarĩ gĩa betha ta betha.

²⁰Itugĩ icio cierĩ, na iria rĩu rĩa gĩcango, na ndegwa ikũmi na igĩrĩ cia gĩcango iria ciarĩ rungu rwa itugĩ cia kũigĩrĩra indo, iria Mũthamaki Solomoni aathondekeire nyũmba ya Ithe witũ—gĩcango kĩa indo icio ciothe gĩtingĩathimĩkire ũritũ waguo. ²¹Gĩtugĩ o gĩtugĩ kĩarĩ na ũraihu ta buti mĩrongo ĩĩrĩ na mũgwanja, na kĩarĩ na wariĩ wa buti ikũmi na inyanya kũrĩrigiicĩria, na thingo ciakĩo ciarĩ na ũtungu wa inji ithatũ, na kĩarĩ mũtũrũku thĩinĩ. ²²Nakĩo kĩongo kĩa gĩcango kĩrĩa kĩarĩ igũrũ rĩakĩo kĩarĩ na ũraihu ta buti mũgwanja na nuthu, kĩrĩ na mũkwa mũtumanu na matunda ma makomamanga kũrĩrigiicĩria, ciothe irĩ cia gĩcango. Nakĩo gĩtugĩ kĩa keerĩ kĩaiganaine na kĩu, kĩrĩ na makomamanga. ²³Nĩ kwarĩ makomamanga mĩrongo kenda na matandatũ mĩenainĩ; namo makomamanga mothe maarĩ igana mũkwainĩ ũcio mũtumanu kũrĩrigiicĩria.

²⁴Nake mũnene wa arangĩri akĩnyiita Seraia mũthĩnjĩri Ngai ũrĩa mũnene, na Zefania mũthĩnjĩri Ngai ũrĩa wa keerĩ, na arangĩri atatũ a mĩrango, ²⁵na kuuma itũũrainĩ akĩnyiita mũnene ũrĩa warũgamĩrĩire thigari, na andũ mũgwanja a arĩa maataaraga mũthamaki arĩa maakorirwo itũũrainĩ, na mwandĩki wa mũnene wa mbũtũ ya ita ũrĩa wandĩkithagia andũ a bũrũri, na andũ mĩrongo ĩtandatũ a bũrũri ũcio arĩa maakorirwo itũũrainĩ. ²⁶Nebuzaradani, mũnene wa arangĩri, akĩmatwara kũrĩ mũthamaki wa Babuloni kũu Ribila. ²⁷Nake mũthamaki wa Babuloni akĩmaringa, akĩmooraga kũu Ribila bũrũri wa Hamathu. Ũguo nĩguo Juda aatahirwo akĩrutwo bũrũri wake.

²⁸Ũyũ nĩguo mũigana wa andũ arĩa Nebukadinezaru aatahire: mwaka wa mũgwanja, Ayahudi ngiri ithatũ na mĩrongo ĩĩrĩ na atatũ;

²⁹mwaka wa ikũmi na mũnana wa Nebukadinezaru, andũ magana manana na mĩrongo ĩtatũ na eerĩ kuuma Jerusalemu;

³⁰mwaka wa mĩrongo ĩĩrĩ na ĩtatũ wa Nebukadinezaru, Nebuzaradani mũnene wa arangĩri agĩtaha Ayahudi magana mũgwanja na mĩrongo ĩna na atano; mũigana wothe warĩ andũ ngiri inya na magana matandatũ.

Jehoiakini Kũrutwo Njeera

³¹Mwakainĩ wa mĩrongo ĩtatũ na mũgwanja kuuma rĩrĩa Jehoiakini mũthamaki wa Juda aatahirwo, mweri wa ikũmi na ĩĩrĩ, mũthenya wa mĩrongo ĩĩrĩ na ĩtano, Evili-merodaki mũthamaki wa Babuloni, mwakainĩ wake wa mbere wa ũthamaki, agĩiguĩra Jehoiakini mũthamaki wa Juda tha, akĩmũruta njeera. ³²Akĩmwarĩria na ũtugi, akĩiga gĩtĩ gĩake kĩa ũnene igũrũ rĩa itĩ cia athamaki arĩa angĩ arĩa maarĩ nake kũu Babuloni. ³³Nĩ ũndũ ũcio Jehoiakini akĩruta nguo ciake cia njeera, nake akĩrĩĩagĩra methainĩ ya mũthamaki o mũthenya matukũ mothe ma muoyo wake. ³⁴Nake mũthamaki wa Babuloni akĩmũheaga rĩĩria rĩake o mũthenya matukũ mothe ma muoyo wake, nginya mũthenya ũrĩa aakuire.