Bilie, Nna Anyị

Nye onyeisi ndị ọbụ abụ. Abụ Ọma nke Devid. Otu abụ.

Abụ njem ngagharị. Nna anyị na-esi nʼọzara apụta, na-achụsa ndị iro ya, ma onye ahụ na-etipịa ndị eze ka a na-akpọ nna nye ndị na-enweghị nna na onye na-agbachitere ndị inyom di ha nwụrụ, onye na-eme ka ndị nọ naanị ha biri nʼụlọ, ma na-edupụta ndị mkpọrọ gaa nʼọganihu.

Isi 68.

Ka Nna anyị bilie; ka a chụsasịa ndị iro ya, ka ndị kpọrọ ya asị gbakwaa ọsọ nʼihu ya. Dịka a na-achụpụ anwụrụ ọkụ, otu a ka ị chụpụ ha; dịka ude aṅụ si agbaze nʼihu ọkụ, otu a ka ndị ajọ omume laa nʼiyi nʼihu Nna anyị. Ma ka ndị ezi omume ṅụrịa; ka ha ṅụrịa ọṅụ nʼihu Nna anyị; ka obi tọọ ha ụtọ nke ukwuu. Bụkuoro Nna anyị abụ, bụọ abụ otuto nye aha ya; bulienụ abụ nye onye na-agbafe ọzara—aha ya bụ Nna anyị—ṅụrịanụ ọṅụ nʼihu ya. Nna nke ndị na-enweghị nna na onye na-agbachitere ụmụ nwanyị di ha nwụrụ bụ Nna anyị nʼebe obibi nsọ ya. Nna anyị na-eme ka ndị naanị ha nọ nwee ezinụlọ; ọ na-edupụta ndị a tụrụ mkpọrọ nye ha ọganihu, ma ndị nnupụisi na-ebi nʼala kpọrọ nkụ. O Nna anyị, mgbe ị pụrụ gaa nʼihu ndị gị, mgbe ị gafere nʼala tọgbọrọ nʼefu, ụwa mara jijiji, eluigwe wụdara mmiri ozuzo nʼihu Nna anyị, Onye nke Saịnaị, nʼihu Nna Izrel. O Nna anyị, ị wụdara mmiri ozuzo nke ukwuu; ị weghachiri ihe nketa gị mgbe ike gwụsịrị ya. Igwe atụrụ gị chọtara ebe obibi nʼime ya; site nʼịdị mma gị, O Nna anyị, ị kwadoro ndị nọ na mkpa ihe. Nna anyị, Onye na-achị achị, na-enye okwu; igwe ndị inyom na-ekwusa oziọma ahụ dị ukwuu: Ndị eze ndị agha na-agba ọsọ, ha na-agbala ọsọ, nwanyị ahụ nọ nʼụlọ na-ekesa ihe a kwatara nʼagha. Ọ bụ ezie na unu dinara nʼetiti ọgba atụrụ— nku nduru e ji ọlaọcha kpuchie, abụba ya na-egbuke egbuke nʼọlaedo. ^a Mgbe Onye pụrụ ime ihe niile chụsasịrị ndị eze nʼebe ahụ, snoo dara na Zalmon. O ugwu dị ebube, ugwu Bashan; O ugwu nwere ọtụtụ elu, ugwu Bashan! Gịnị mere unu ji ele anya ekworo, unu ugwu nwere ọtụtụ elu, nʼebe ugwu ahụ Nna anyị chọrọ ka ọ bụrụ ebe obibi ya? Ee, Nna anyị ga-ebi nʼebe ahụ ruo mgbe ebighị ebi. Ụgbọ agha Nna anyị dị iri puku kwụrụ puku, ọtụtụ puku kwụrụ puku; Nna anyị, Onye na-achị achị, nọ nʼetiti ha; Saịnaị dị nʼime ebe nsọ. Ị rigooro nʼelu, na-edu igwe ndị a dọtara nʼagha nʼazụ gị; ị natara onyinye site nʼaka ụmụ mmadụ, ọbụladị nʼetiti ndị nnupụisi, ka Nna anyị wee biri nʼebe ahụ. ^b Ngọzi dịrị Nna anyị, Onye na-achị achị, kwa ụbọchị; ọ na-ebu anyị— Nna nke nzọpụta anyị.

Nna anyị bụụrụ anyị Onye na-azọpụta; nʼaka Nna anyị, Onye na-achị achị, ka ụzọ mgbapụ site nʼọnwụ dị. Ma Nna anyị ga-etiwasị isi ndị iro ya, isi ahụ jupụtara nʼagịrị isi nke onye na-aga nʼihu nʼụzọ ikpe ọmụma ya.

Nna anyị, Onye na-achị achị, kwuru, sị, “Aga m esite na Bashan kpọlata ha; aga m esite nʼomimi oké osimiri kpọlata ha, ka ị wee saa ụkwụ gị abụọ nʼọbara ha, ka ire nkịta gị nweta oke ha site nʼaka ndị iro.”

Ha ahụla njem nsọ gị, O Nna anyị, njem nsọ Nna m, Eze m, nke na-aba nʼime ebe nsọ. Ndị ọbụ abụ nọ nʼihu, ndị na-akpọ egwu nọ nʼazụ, nʼetiti ha ka ụmụ agbọghọ nọ na-eti ịgba: Gọzienụ Nna anyị nʼoké ọgbakọ; gọzienụ Nna anyị, unu ndị si nʼisi iyi Izrel pụta! Lee Benjamin, onye nta nʼime ha, na-edu ha, ụmụ eze Juda nʼigwe ha, ụmụ eze Zebulun, ụmụ eze Naftalaị. Nna unu enyela iwu banyere ike unu; gosi ike gị, O Nna anyị, dịka i meere anyị na mbụ. Nʼihi ụlọnsọ ukwu gị nke dị na Jerusalem, ndị eze ga-ebutere gị onyinye. Baara anụ ọhịa ahụ nọ nʼime achara mba, ìgwè oké ehi na ụmụ ehi nke ndị mba dị iche iche. Zọgbuo nʼụkwụ ndị na-achọsi ọlaọcha ike; chụsasịa mba ndị ọ na-atọ ụtọ ibu agha. ^c Ndị nnọchiteanya ga-esi nʼIjipt bịa; Kush ga-eme ngwangwa setịpụ aka ya abụọ nye Nna anyị. Unu alaeze niile nke ụwa, bụkuoronụ Nna anyị abụ; bụọnụ abụ otuto nye Nna anyị, Onye na-achị achị, nye onye na-agba nʼeluigwe, eluigwe mgbe ochie—geenụ ntị, ọ na-eme ka olu ya daa, olu ya dị ike. Nyenụ Nna anyị ike, onye ebube ya dị nʼelu Izrel, onye ike ya dịkwa na mbara igwe. Nna anyị dị egwu site nʼebe nsọ ya; Nna Izrel—ọ bụ ya na-enye ndị ya ike na ume. Ngọzi dịrị Nna anyị!