Uthibi, Amar Pitri
Gana cholawta nimite. David laga ekta bhajan. Ekta gana.
Ekta julus laga geet. Amar Pitri jongol pora ghora chola kene Tai laga dushman khan ke chitriki di ase, aru jun raja khan ke tukra kori di ase, Tai ke bap nathaka khan laga Bap aru bidhowa khan laga rokhiya bule nam dise, jun eklong thaka khan ke ghor te thaki bole di ase aru bondi khan ke bahar ani kene bhal jibon te loi jai.
68 1Amar Pitri uthibi; Tar dushman khan titili-biti hoi jabi, aru Tar ke ghin kora khan Tar age pora polai jabi. 2Jineka dhuwa ke urai diye, tineka taikhan ke urai dibi; jineka jui age te mu goli jai, tineka paapi khan amar Pitri age te khotom hoi jabi. 3Kintu dharmik khan khushi hobi; taikhan amar Pitri age te anondo koribi; taikhan khushi pora bhorta hoi anond koribi. 4Amar Pitri ke gana gabi, Tar nam ke stuti laga gana gabi; morubhumi khan paar kori juwa Ekjon ke gana uthai dibi—Tar nam Amar Pitri ase—aru Tar age te anond koribi. 5Baba nathaka khan nimite baba ekjon aru bidhowa khan ke bachai diya jon, Tar pobitro ghor te thaka amar Pitri ase. 6Amar Pitri ekla thaka khan ke ekta ghor te basai diye; Tar pora bondhi khan ke bhal halot te ulai ane, kintu bagawati khan sukha jomin te thake. 7He amar Pitri, jitia Apuni laga manuh khan age te Apuni ulai jaise, jitia Apuni jongol-maidan paar kori jaise, 8prithibi kapise, sorgo pora borkhun porise amar Pitri age te, Sinai laga Ekjon age te, Israel laga Pitri age te. 9He amar Pitri, Apuni bisi borkhun giri dise; jitia Apuni laga uttoradhikar komjur hoi jaise, Apuni etu ke notun kori dise. 10Apuni laga saguli jhak etu te ghor paise; Apuni laga bhal pora, He amar Pitri, Apuni dukhiya khan nimite bebostha kori dise. 11Prabhu Pitri kotha diye; bhal khobor prachar kora mahila khan laga dol dangor ase: 12Sipahi khan laga raja khan polai jai, taikhan polai jai, aru ghor te thaka mahila lut laga saman bhag kori loi. 13Jodibi tumikhan mer-ghor majot te ghumai thake— chandi pora dhaki thaka ekta kobutar laga pakhi, tar por khan suna pora jilmil kori ase. a a v13 Jilmil kora kobutar tu bisram te thaka homoi te bhi Isor laga manuh khan laga mohima ke dikhai dibo pare, nahole jit pora ghor te loi aha dhuni lut-saman ke dikhai. 14Jitia Sorbbashoktiman pora raja khan ke ta te titili-biti kori dise, Zalmon upor te borop porise. 15He mohan pahar, Bashan laga pahar; He bisi matha thaka pahar, Bashan laga pahar! 16Kele tumikhan suku-jwala pora sai ase, He bisi matha thaka pahar khan, amar Pitri pora Tar ghor nimite itcha kora pahar ke? Hoi, amar Pitri ta te hodai nimite thakibo. 17Amar Pitri laga rath khan lakh-lakh ase, hajar uporte hajar; Prabhu Pitri taikhan majot te ase; Sinai pobitro-sthan te ase. 18Apuni upor te uthi jaise, bisi bondhi khan ke Apuni laga pichete loi jai; Apuni manuh khan pora inam khan loise, bagawati khan majot pora bhi, titia amar Pitri ta te thaki bole paribo. b b v18 Paul pora etu ayat ke Jisu laga kotha hisab te koise—jitia Tai upor te uthise Tai bondhi khan ke mukti pora loi jaise aru Tar manuh khan ke inam dise (Ephesians 4:8). Etu bhajan pora amar Pitri laga ji jit laga gana gai, etu jit Putro pora pai aru bhag kori diye. 19Prabhu Pitri ke asirbad hobi, din-din; Tai amikhan ke uthai loi jai—amar poritran laga Pitri.
20Amar Pitri amikhan nimite bachai diya Ekjon ase; aru Prabhu Pitri logot te mrityu pora bachi ulai juwa rasta khan ase. 21Kintu amar Pitri Tar dushman khan laga matha khan ke bhangi dibo, nijor dosh laga rasta te berai thaka manuh laga chuli bhorta matha ke.
22Prabhu Pitri koise, “Moi taikhan ke Bashan pora wapas loi anibo; Moi taikhan ke samundar laga gohor pora wapas loi anibo,” 23“titia tumi taikhan laga khoon te nijor theng khan dhui lobo, titia tumar kutta khan laga jiba khan dushman pora nijor bhag pabo.”
24Taikhan Apuni laga julus khan dikhise, He amar Pitri, moi laga Pitri, moi laga Raja laga julus khan, pobitro-sthan bhitor te. 25Gana gawta khan age te, baja bajawta khan pichete, taikhan majot te dholki bajai thaka jawan mahila khan: 26Dangor sabha majot te amar Pitri ke asirbad dibi; amar Pitri ke asirbad dibi, Israel laga jhorna pora aha tumikhan! 27Ta te sobse chutu Benjamin ase, taikhan ke age loi juwa, nijor bhir te Judah laga rajkumar khan, Zebulun laga rajkumar khan, Naphtali laga rajkumar khan. 28Tumar Pitri tumar takot ke hukum kori dise; Apuni laga sakti dikhabi, He amar Pitri, jineka Apuni age te amikhan nimite kaam korise. 29Jerusalem te thaka Apuni laga mondir laga karone, raja khan Apuni ke inam khan loi anibo. 30Nol-khagri majot te thaka janwar ke dhomki dibi, manuh khan laga bacha-goru logote thaka saand goru laga jhak ke. Chandi nimite lalchi kora khan ke theng pora chepi dibi; lorai te khushi kora manuh khan ke titili-biti kori dibi. c c v30 Nol-khagri laga janwar tu ekta kumhir nahole jol-hati hobo pare—Nile nodi laga nol-khagri te lukai thaka Egypt laga purana nishani. 31Egypt pora doot khan ahibo; Cush amar Pitri phale nijor hath khan uthai dibole joldi koribo. 32Prithibi laga rajyo khan, amar Pitri ke gana gabi; Prabhu Pitri ke stuti laga gana gabi, 33sorgo khan te, purana sorgo khan te ghuri phura Ekjon ke—huni bi, Tai nijor awaj ulai diye, Tar mohan awaj. 34Amar Pitri ke takot ase koi dibi, kun laga mohima Israel upor te ase aru kun laga sakti akas khan te ase. 35Amar Pitri Tar pobitro-sthan pora bhoi lagikena mohan ase; Israel laga Pitri—Tai nijor manuh khan ke takot aru sakti diya Ekjon ase. Amar Pitri ke asirbad hobi!