Nagapadayon ang Sugilanon

Ang sugilanon sang bag-o nga simbahan pagkatapos sang pagsaka ni Jesus sa langit—ang pagkari sang Espiritu sa Pentecostes kag ang pagkalapnag sang ebanghelyo halin sa Jerusalem tubtob sa kaduluhan sang kalibutan.

Kapitulo 1.

Sa akon nahauna nga libro, Teofilo, ginsulat ko ang tanan nga ginsugdan ni Jesus nga himuon kag itudlo, tubtob sang adlaw nga ginbayaw sia, human niya mahatagan sing mga sugo paagi sa Espiritu Santo ang mga apostoles nga iya ginpili. Human sang iya pag-antus, ginpakita niya ang iya kaugalingon nga buhi sa ila paagi sa madamo nga pamatuod. Nagpakita sia sa ila sa sulud sang kap-atan ka adlaw kag naghambal parte sa ginharian sang aton Amay. ^a

Samtang nagaupod sia sa ila, ginsugo niya sila nga indi magbiya sa Jerusalem kondi maghulat sang saad sang akon Amay—“nga,” siling niya, “nabatian ninyo sa akon; kay nagbautiso si Juan sa tubig, apang sa sulud sang pila ka adlaw bautisuhan kamo sa Espiritu Santo.”

Gani, sang nagtilipon sila, nagpamangkot sila sa iya, “Ginoo, ibalik mo bala karon ang ginharian sa Israel?”

Nagsiling sia sa ila, “Indi para sa inyo ang pagkahibalo sang mga tion ukon mga panahon nga gintalana sang akon Amay paagi sa iya kaugalingon nga awtoridad. Apang kon magkunsad sa inyo ang Espiritu Santo, makabaton kamo sing gahum agud mangin akon mga saksi—sa Jerusalem, sa bug-os nga Judea, sa Samaria, kag tubtob sa pinakamalayo nga bahin sang duta.”

Human niya mahambal ini nga mga butang, samtang nagatulok sila, ginbayaw sia, kag ginkuha sia sang isa ka panganod halin sa ila panulok. Samtang nagatulok sila sing tutok sa langit sang nagalakat sia, hinali lang may duha ka lalaki nga nagabayo sing puti nga nagtindug tupad sa ila. Nagsiling sila, “Mga taga-Galilea, ngaa nagatulok kamo sa langit? Ining si Jesus, nga ginbayaw halin sa inyo pakadto sa langit, magabalik sa amo gid nga paagi sang inyo pagkakita sa iya nga nagkadto.”

Isa ka Saksi nga Ginpili nga Ilis sa Iya

Niyan nagbalik sila sa Jerusalem halin sa Bukid nga ginatawag Olivo, nga malapit sa Jerusalem, mga tunga sa milya ang kalayuon. Sang nakasulud sila, nagtaklad sila sa kuarto sa ibabaw nga ila ginadayunan: si Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago nga anak ni Alfeo, si Simon nga Zelote, kag si Judas nga anak ni Santiago. Nagpadayon ini sila tanan sing tingub sa pangamuyo, upod ang mga babayi, si Maria nga iloy ni Jesus, kag ang iya mga utod.

Sadto nga mga adlaw nagtindug si Pedro sa tunga sang mga kauturan (mga isa ka gatus kag duha ka pulo sila tanan) kag nagsiling, “Mga kauturan, kinahanglan matuman ang Kasulatan nga ginhambal anay sang Espiritu Santo paagi sa baba ni David parte kay Judas—nga nangin manugtuytuy sang mga nagdakup kay Jesus. Kay naisip sia upod sa aton kag nabaton niya ang iya bahin sa sini nga pag-alagad.” (Nagbakal ini nga tawo sing isa ka uma sa bayad sang iya malain nga binuhatan, dayon nahulog sia nga nauna ang ulo, nagbuka sa tunga, kag nagbulos ang tanan niya nga tinai. Nahibaluan ini sang tanan nga nagapuyo sa Jerusalem, gani ginhingalanan ang uma sa ila hambal nga Akeldama, nga buot silingon, Uma sang Dugo.). “Kay nasulat sa Libro sang mga Salmo: ‘Kabay nga mamingaw ang iya kampo, kag wala sing bisan sin-o nga magapuyo didto,’ kag ‘Kabay nga kuhaon sang iban ang iya katungdanan.’

Busa isa sa mga lalaki nga nag-upod sa aton sa bug-os nga tion, samtang nagasulud kag nagagwa ang Ginoong Jesus sa tunga naton, halin sa pagbautiso ni Juan tubtob sa adlaw nga ginbayaw sia halin sa aton—isa sa sini kinahanglan mangin saksi upod sa amon sang iya pagkabanhaw.”

Kag ginpresentar nila ang duha—si Jose nga ginatawag Barsabas, nga ginatawag man Justo, kag si Matias. Nagpangamuyo sila kag nagsiling, “Ikaw, Ginoong Jesus, nga nakahibalo sang tanan nga tagipusuon, ipakita kon sin-o sa sining duha ang imo ginpili, ^b agud kuhaon ang duog sa sini nga pag-alagad kag pagkaapostol nga ginbayaan ni Judas agud magkadto sa iya kaugalingon nga duog. Nagpalabunot sila para sa ila; nahulog ang palabunot kay Matias, kag naisip sia upod sa napulog-isa ka apostoles.” ^c