Salmo 79

79 ¹Amahan namo, gisulong sa kanasoran ang imong panulondon; gihugawan nila ang imong balaang templo; gigun-ob nila ang Jerusalem.

²Gihatag nila ang mga patayng lawas sa imong mga alagad ingon nga pagkaon sa mga langgam sa kawanangan, ang unod sa imong mga matinumanon ngadto sa mga mananap sa yuta. ³Gibubo nila ang ilang dugo sama sa tubig palibot sa Jerusalem, ug walay bisan usa nga molubong kanila. ⁴Nahimo kaming talamayon sa among mga silingan, gibugalbugalan ug gikataw-an sa mga naglibot kanamo.

⁵Hangtod kanus-a, Amahan namo? Masuko ka ba sa walay kataposan? Modilaab ba ang imong pangabugho sama sa kalayo? ⁶Ibubo ang imong kapungot sa kanasoran nga wala makaila kanimo, ug sa mga gingharian nga wala magtawag sa imong ngalan. ⁷Kay gilamoy nila si Jacob ug gilaglag ang iyang yutang natawhan. ⁸Ayaw isipa batok kanamo ang mga sala sa among mga katigulangan; paabuta dayon ang imong malumong kaluoy aron sa pagsugat kanamo, kay naluya na kami pag-ayo.

⁹Tabangi kami, Amahan namo nga nagluwas kanamo, alang sa himaya sa imong ngalan; luwasa kami ug taboni ang among mga sala tungod sa imong ngalan. ¹⁰Nganong magaingon man ang kanasoran, “Hain man ang ilang Dios?” Sa among atubangan, ipaila sa kanasoran nga ikaw magadala ug hustisya alang sa giula nga dugo sa imong mga alagad. ¹¹Padangata sa imong atubangan ang pag-agulo sa binilanggo; pinaagi sa pagkagamhanan sa imong bukton, luwasa kadtong gihukman nga mamatay.

¹²Baslan mo ang among mga silingan sa makapito ngadto sa ilang mga sabakan tungod sa pagbiaybiay nga ilang gibiaybiay kanimo, O Soberanong Amahan. ¹³Unya kami, nga imong katawhan, ang mga karnero sa imong sibsibanan, magpasalamat kanimo sa walay kataposan; gikan sa kaliwatan ngadto sa kaliwatan among imantala ang imong pagdayeg.