Kuzangana kwa Yelusalemi
Mukunga wa Asafu.
Yelusalemi dyenina mu kubebwa, bamvumbi bakonda kuzikwa amana baheka hanga madya kwena banuni, amana bakwa mukombu bisi sephila mawu. Lombilu lwisi lomba Tata wetu lolusu yi mvutusu mu mwela wumosi, amana ndonga yandi yenina ha mesu ma boosu: makanda masi phyula ni kweti kwénda Nzambi wa bawu.
79 1Tata wetu, makanda ma baphani mákota mu kuvwa kwaku; mábebisa nzu yaku yatoma; mázangisa Yelusalemi.
2Máheka bamvumbi ba basadi baku hanga madya kwena banuni ba ku zilu, misuni mya batu baku ba kwikama kwena bambisi ba ha tsi. 3Menga ma bawu mátyakana hanga mamba mu kinzunga kyosu kya Yelusalemi, amana ka mutu ku wákala mu kubazika. 4Thwákhitula kima kya nseyi kwena bakwa mukombu wetu, bana bena mu kinzunga kyetu bawu bisi kutuseya yi kutuléwula.
5Nate kweti, A Tata wetu? Wukála mu khabu mvula yi mvula? Kiphala kyaku kyavúkula hanga mbawu? 6Mwanga khabu zaku hana thandu ya makanda mana masiku zaya ngeyi, amana hana thandu ya bipfumu bina bisiku tela khumbu yaku. 7Mukuma mádya Yakobi amana mázangisa tsi yandi. 8Wutubánzilaku masumu ma batata betu; khenda zaku za kyadi zakwísa tswatsu mu kutundakana betu, mukuma thwákhitula mu kiphutu lawu.
9Tusadisa, A Tata wetu wuna wisi tuhulula, kikuma kya khembu ya khumbu yaku; tutabula amana fidinga masumu metu kikuma kya khumbu yaku. 10Kikuma kya biki makanda masi zimbula: «Kubiki kenina Nzambi wa bawu?» Ku thwala ya mesu metu, makanda mazaya ni ngeyi wisi futisa menga ma basadi baku mana mátyakana. 11Bibimu bya mutu wa boloku byakwísa ku thwala yaku; mu ngolu za koku dyaku, hulula bana bazengilu ndola ya lufwa.
12Futa bakwa mukombu wetu mu mbala tsambwadi muna mabundu ma bawu kikuma kya kulewula kuna bákulewula ngeyi, A Pfumu, Tata wetu. 13Buna betu, batu baku, mikoku mya phila yaku, tukavútula matondu kwaku mvula yi mvula; tuka mbandu ku mbandu, tukasámuna khembu yaku.
