Jerusalem Müshü Va
Asaph chele.
Jerusalem müshü vayi ba, kesa uthiko tüyorako themu tsüta, mu risa kebamiko süolü nü tayo. Prayie ha Po lü kephomako whuyi mu ngokemezhe tapü mipü kena müzhe, mu pü libi thüma metü mhüjülü ba: kemoko, 'Uko Jihova lebita?' po tayo.
79 1Ha Po, kemoko no heshelü vorita; pukoe no kemesa kereshüce mesakemo thita; pukoe Jerusalem müshü vasü.
2Pukoe no cetamiko kesa uthiko tüyorako themu tsüta, no kemesako uthi cejülü khonuko tsüta. 3Pukoe uko za dzü zü mekrüve Jerusalem risa metülü, side mipüri uko khrüva keto bamota. 4Ha zanumiko ce ha krünyü thi vota, ha risa kebamiko ha krünyü mu zhoshu süta.
5Ha Po, dopü ketola de? No kechothe rüda süh bato tome? No jü me zü tiyi tato tome? 6No semo kemoko cejülü, no za cümo kedeko cejülü, no lekhu rü süte. 7Kekrelamori pukoe Jacob patita mu pü rünapü müshü vata. 8Ha potsaneko kephomako ha ngo mütü tahite; no ngokemezhe ha ce mhaizi vori hite, ha züh küsühte, kekrelamori ha mhane renu thi vata.
9Ha kelayi ketoo ha Po, no za zapozale lano ha khrühi süte; ha süphra süte mu ha kephomako whuyi te, no za-o lano. 10Dipüla kemoko, “Uko Jihova lebita?” po süto? Ha mhü ngolü, no cetamiko za mekrüve no khüpo thisüto zisü, kemoko dolü se bayite. 11Dzü panyo no ngo vori hite; no bo kümüre lü, kesa lano mejo süko presa süte.
12Ha zanumiko ce uko medolü thüna heda zhokhro khasü te, ukoe no krünyü süba sakeshü, Niepoo Apo. 13Süsa ha, no thüma, no püco tükoko, no ce kechothe kethezü shusüto; nushünuye metülü ha no swüyi po süto.
