Yirusalem Teraksa Aküm
Asaf psalm.
Yirusalem alinang ka dang kümdakogo, tasümang menena mali ozü nem chiyungtsü agütsü, aser kiyongertem aji nung pelatsü. Sarasademi asen Tebu dang tai toktsü aser tesashi mapang katisa kur, aser pa o ayimsünga lir: kintemi parnok Tsüngrem kongi aoogo ta kur.
79 1Oba, kintemi ne senmang nung aitogo; parnoki ne temeshi kidang menentsüogo; parnoki Yirusalem alinang ka dang kümdaktsüogo.
2Parnoki ne tenzükertem tasümang anüng ozü nem chiyungtsü agütsü, aser ne temeshi nübur shi alima shiruru nem agütsüogo. 3Parnoki azü tzü ama Yirusalem meketa shitokogo, aser parnok aremtsü shinga maliasü. 4Onok kiyongertem dang maksü ka küma akümogo, onok meketa alirtemi onok atala aser sensaka kümdaktsü.
5Oba, arishi tashi? Na teti tatem makai ain adoka alitsü no? Ne nükmiba mi ama samatsü no? 6Na memetetba kintem dang, aser ne tenüng mayimtenemba yimlitem dang, ne terasaba shitokang. 7Kechiaser parnoki Yakob meyokadokogo, aser pa lima raksatsüogo. 8Asen tsürabur taitem onok anema tebilemtettsü; ne taochi yakta onok dangi arudakjang, kechiaser onok kanga tajemrep akümogo.
9Onok kümzükba Oba, ne tenüng sentsüwangshi asoshi onok yariang; onok kümzükang, aser ne tenüng atema onok temenen tokangma. 10Kechiba kintemi, “Parnok Tsüngrem kongi lir?” ta ashitsü? Onok nükdang, nai ne tenzükertem tokshiba azü asoshi o bendangtsü ta, kintem rongnung metetdakjang. 11Alentemba nisung ola ne madang arudakjang; ne tepen tulu agi, asütsü aijadokbatem kümzükang.
12Oh Oba, onok kiyongertem dang na dang parnoki sensatsüba maksü atema, parnok telung nung tenetpezü tajangzük agüjangma. 13Anungji onok, ne nübur, ne chiyungtsü san, teti tatem makai ne nem tenüngsang agütsü; putu nungi putu tashi onoki ne nüngsang atentsü.