ଯିରୂଶାଲମ ଉଜାଡ଼ ହୋଇଅଛି

ଆସଫଙ୍କର ଗୀତ।

ଯିରୂଶାଲମ ଧ୍ୱଂସସ୍ତୂପ ହୋଇ ପଡ଼ିଛି, ମୃତଦେହଗୁଡ଼ିକ ଅସମାଧିତ ହୋଇ ପକ୍ଷୀମାନଙ୍କ ଖାଦ୍ୟ ହୋଇଛି, ଏବଂ ପଡ଼ୋଶୀମାନେ ଏହାକୁ ଉପଭୋଗ କରୁଛନ୍ତି। ପ୍ରାର୍ଥନାଟି ଏକା ନିଶ୍ୱାସରେ ଆମ ପିତାଙ୍କ ନିକଟରେ କ୍ଷମା ଓ ପ୍ରତିଶୋଧ ମାଗେ, ଏବଂ ଏହାର ଯୁକ୍ତି ସାର୍ବଜନୀନ: ଜାତିମାନେ ପଚାରୁଛନ୍ତି ସେମାନଙ୍କ ଈଶ୍ୱର କେଉଁଆଡ଼େ ଗଲେ।

ଅଧ୍ୟାୟ 79।

ହେ ଆମ୍ଭମାନଙ୍କ ପିତା, ଅନ୍ୟ ଜାତିମାନେ ତୁମ୍ଭର ଅଧିକାରରେ ଅନୁପ୍ରବେଶ କରିଅଛନ୍ତି; ସେମାନେ ତୁମ୍ଭର ପବିତ୍ର ମନ୍ଦିର ଅଶୁଚି କରିଅଛନ୍ତି; ସେମାନେ ଯିରୂଶାଲମକୁ ଉଜାଡ଼ କରି ପକାଇଅଛନ୍ତି।

ସେମାନେ ତୁମ୍ଭ ଦାସମାନଙ୍କ ଶବ ଆକାଶ ପକ୍ଷୀଗଣଙ୍କୁ ଖାଦ୍ୟ ରୂପେ, ଆଉ ତୁମ୍ଭ ସଦ୍‌ଭକ୍ତମାନଙ୍କର ମାଂସ ପୃଥିବୀର ପଶୁଗଣଙ୍କୁ ଦେଇଅଛନ୍ତି। ସେମାନେ ଯିରୂଶାଲମର ଚତୁର୍ଦ୍ଦିଗରେ ଜଳ ପରି ସେମାନଙ୍କ ରକ୍ତ ଢାଳିଅଛନ୍ତି, ପୁଣି ସେମାନଙ୍କୁ କବର ଦେବାକୁ କେହି ନ ଥିଲା। ଆମ୍ଭେମାନେ ଆପଣା ପ୍ରତିବାସୀମାନଙ୍କ ନିକଟରେ ନିନ୍ଦାର ପାତ୍ର ହୋଇଅଛୁ, ଆମ୍ଭ ଚତୁର୍ଦ୍ଦିଗସ୍ଥ ଲୋକଙ୍କ ଦ୍ଵାରା ପରିହାସିତ ଓ ଉପହସିତ ହୋଇଅଛୁ।

ହେ ଆମ୍ଭମାନଙ୍କ ପିତା, କେତେ କାଳ? ତୁମ୍ଭେ କʼଣ ଅନନ୍ତକାଳ କ୍ରୁଦ୍ଧ ହୋଇ ରହିବ? ତୁମ୍ଭର ଅନ୍ତର୍ଜ୍ଵାଳା କʼଣ ଅଗ୍ନି ପରି ଜ୍ଵଳିବ? ଯେଉଁ ଜାତିମାନେ ତୁମ୍ଭକୁ ଜାଣନ୍ତି ନାହିଁ, ସେମାନଙ୍କ ଉପରେ, ପୁଣି ଯେଉଁ ରାଜ୍ୟସମୂହ ତୁମ୍ଭ ନାମରେ ପ୍ରାର୍ଥନା କରନ୍ତି ନାହିଁ, ସେମାନଙ୍କ ଉପରେ ତୁମ୍ଭର କୋପ ଢାଳି ଦିଅ। କାରଣ ସେମାନେ ଯାକୁବକୁ ଗ୍ରାସ କରିଅଛନ୍ତି ଓ ତାହାର ବାସସ୍ଥାନ ଉଚ୍ଛିନ୍ନ କରିଅଛନ୍ତି। ଆମ୍ଭମାନଙ୍କ ପିତୃପୁରୁଷଗଣଙ୍କ ପାପ ଆମ୍ଭମାନଙ୍କ ବିରୁଦ୍ଧରେ ମନେ ରଖ ନାହିଁ; ତୁମ୍ଭର ସ୍ନେହପୂର୍ଣ୍ଣ କରୁଣା ଶୀଘ୍ର ଆମ୍ଭମାନଙ୍କ ସଙ୍ଗେ ସାକ୍ଷାତ କରିବାକୁ ଆସୁ, କାରଣ ଆମ୍ଭେମାନେ ଅତ୍ୟନ୍ତ ହୀନ ହୋଇଅଛୁ।

ହେ ଆମ୍ଭମାନଙ୍କୁ ପରିତ୍ରାଣ କରୁଥିବା ଆମ୍ଭମାନଙ୍କ ପିତା, ତୁମ୍ଭ ନାମର ମହିମା ନିମନ୍ତେ ଆମ୍ଭମାନଙ୍କୁ ସାହାଯ୍ୟ କର; ତୁମ୍ଭ ନାମ ସକାଶେ ଆମ୍ଭମାନଙ୍କୁ ଉଦ୍ଧାର କର ଓ ଆମ୍ଭମାନଙ୍କ ପାପ ଆଚ୍ଛାଦନ କର। ଅନ୍ୟ ଜାତିମାନେ କାହିଁକି କହିବେ, “ସେମାନଙ୍କ ଈଶ୍ଵର କାହାନ୍ତି?” ଆମ୍ଭମାନଙ୍କ ଦୃଷ୍ଟିଗୋଚରରେ ତୁମ୍ଭ ଦାସମାନଙ୍କ ପତିତ ରକ୍ତ ନିମନ୍ତେ ତୁମ୍ଭେ ଯେ ନ୍ୟାୟ ସାଧନ କରୁଅଛ, ତାହା ଅନ୍ୟ ଜାତିମାନଙ୍କ ମଧ୍ୟରେ ଜଣାଯାଉ। ବନ୍ଦୀର ଆର୍ତ୍ତସ୍ଵର ତୁମ୍ଭ ସମ୍ମୁଖରେ ଉପସ୍ଥିତ ହେଉ; ତୁମ୍ଭ ବାହୁର ମହତ୍ତ୍ଵ ଅନୁସାରେ ମୃତ୍ୟୁଦଣ୍ଡ ପ୍ରାପ୍ତ ଲୋକମାନଙ୍କୁ ରକ୍ଷା କର।

ହେ ସର୍ବାଧିପତି ପିତା, ଆମ୍ଭ ପ୍ରତିବାସୀମାନେ ତୁମ୍ଭକୁ ଯେଉଁ ନିନ୍ଦା ଦ୍ଵାରା ନିନ୍ଦା କରିଅଛନ୍ତି, ତାହା ସେମାନଙ୍କ କୋଳରେ ସାତ ଗୁଣ କରି ପରିଶୋଧ କର। ତେବେ ଆମ୍ଭେମାନେ ତୁମ୍ଭର ଲୋକ, ତୁମ୍ଭ ଚରାସ୍ଥାନର ମେଷ, ଅନନ୍ତକାଳ ତୁମ୍ଭକୁ ଧନ୍ୟବାଦ ଦେବୁ; ପୁରୁଷାନୁକ୍ରମେ ଆମ୍ଭେମାନେ ତୁମ୍ଭ ପ୍ରଶଂସା ପ୍ରଚାର କରିବୁ।