Zaburi 79

79 ¹ Baba yetu, mataifa yameuvamia urithi wako; wamelinajisi hekalu lako takatifu; wameifanya Yerusalemu kuwa magofu.

² Wametoa maiti za watumishi wako ziwe chakula cha ndege wa angani, nyama ya waaminifu wako kwa wanyama wa nchi. ³ Wamemwaga damu yao kama maji pande zote za Yerusalemu, wala hakuna wa kuwazika. ⁴ Tumekuwa kitu cha kudharauliwa kwa jirani zetu, tunadhihakiwa na kufanyiwa mzaha na wale wanaotuzunguka.

⁵ Hata lini, Baba yetu? Je, utakasirika milele? Je, wivu wako utawaka kama moto? ⁶ Mimina ghadhabu yako juu ya mataifa yasiyokujua wewe, na juu ya falme zisizoliitia jina lako. ⁷ Kwa maana wamemla Yakobo na kuiharibu nchi yake. ⁸ Usituhesabie dhambi za baba zetu; huruma yako ya upole na itujie upesi kutulaki, kwa maana tumeshushwa chini sana.

⁹ Utusaidie, Baba yetu utuokoaye, kwa ajili ya utukufu wa jina lako; utuokoe na kuzifunika dhambi zetu kwa ajili ya jina lako. ¹⁰ Kwa nini mataifa waseme, "Yuko wapi Mungu wao?" Mbele ya macho yetu, na ijulikane katika mataifa ya kuwa unatenda haki kwa ajili ya damu ya watumishi wako iliyomwagwa. ¹¹ Kilio cha mfungwa na kifike mbele zako; kwa ukuu wa mkono wako, uwahifadhi wale waliohukumiwa kufa.

¹² Uwalipe jirani zetu mara saba vifuani mwao dhihaka waliyokudhihaki wewe, Ee Baba Mwenye Enzi. ¹³ Ndipo sisi, watu wako, kondoo wa malisho yako, tutakushukuru milele; toka kizazi hata kizazi tutazitangaza sifa zako.